4 wa vapizani va ngava vakukuti va vanhu

Andzhako ka loku a vanhu va le Nazareta va zamile ku daya Jesu, i noya dhoropeni ga Kapernawume, kusuhani ni Bimbi ga Galileya legi gi nga vitaniwa kambe a ku i ‘tiva ga Genesareta’. (Luka 5:1) Lezvo zvi tatisile a ciphrofeto ca Isaya ci nga wula lezvaku a vanhu va le Galileya va wa ta wona kuwonekela ka hombe. — Isaya 9:1, 2.

Ni kwale Galileya, Jesu i no simama a kanela lezvaku ‘a mufumo wa Nungungulu wu tshinele.’ (Matewu 4:17) Jesu i no kuma vapizani vakwe va 4. A vapizani lavo va wa fambafambile na Jesu. Makunu a cikhati leci Jesu a nga tlhela Judhiya, vona va no hlawula ku sala va simama ni ntiro wabye wa ku kukuta tinjhanjhi. (Johani 1:35-42) Makunu yi wa chikele nguva ya ku va tlhela va ya tira na Jesu hi cikhati contlhe a fela ku va gondzisa ntiro wa ku chumayela kasi va zvi kota ku sala va chumayela loku a tlhelile tilweni.

Ka siku go kari Jesu na a fambafamba le mbhirini ya bimbi, i no wona Simoni Pedro ni makabye wakwe Andrewu ni vakukuti van’wani, na va kari va hlola tikoka tabye lezvaku ti nene ke. Jesu i no va yela, a nghena lomu ngalaveni ya Pedro. Kota lezvi laha mbhirini ya bimbi ku nga hi ni vanhu vo tala, Jesu i no kombela Pedro lezvaku a nikinya ngalava yakwe yi nghenanyana lomu matini. Laha yi nga nghenilenyana, Jesu i no tshama, a sangula ku va gondzisa lisine xungetano hi Mufumo wa Nungungulu.

Jesu i no gumesa a byela Pedro aku: “Nikinya ngalava yiya laha ku etileko mu ya peta tikoka ta n’wina mu kukuta.” Kanilezvi Simoni i no mu hlamula aku: “Mugondzisi, hi tirile wusiku gontlhe, a hi kumangi nchumu, kanilezvi kota lezvi u wulako ndzi ta peta tikoka.” — Luka 5:4, 5, NM.

Va no peta tikoka va phasa tinjhanjhi to tala nguvhu laha ka ku a tikoka tabye ti sangula ku handzuka! A vavanuna lavo va no tekela ku khweneta vanghana vabye va nga hi lomu ka ngalava yi nga hi kusuhani lezvaku vata va ta va vhuna. A tingalava leto ta timbiri ti no tala nguvhu hi tinjhanjhi, laha ka kuza ti sangula ku rikha hi ku bindza. A cikhati leci Pedro a nga zvi wona, i no khizama laha mikondzweni ya Jesu, aku: “Hosi, suka ka mina, hakuva ndzi muwonhi.” Jesu i no mu byela lezvi: “U nga chavi; hakuva ku sukela lezvi u ta kukuta vanhu.” — Luka 5:8, 10.

Jesu i no gumesa a ramba Pedro na Andrewu aku: “Ndzi landzeleni, ndzi ta mu maha vakukuti va vanhu.” (Matewu 4:19) I no ramba ni vavanuna van’wani va vambiri — Jakobe na Johani, a vana va Zabhedhi. Vonawu va no tekela ku vhumela. Hi ndlela leyo, a vavanuna lava va 4 va no tsika mabhindzu yabye vava vona vo sangula ku landzela Jesu hi cikhati contlhe.