Jesu a wula zvilo zvi djudja kupima ka vanhu vo tala

Ka khati go kari Jesu na a hi lomu sinagogeni le Kapernawume, i no gondzisa vanhu lezvaku yena cibaba ci releleko hi le tilweni. Ko khwatsi a magezu yakwe ma wa yelana ni lezvi a nga byela lava va nga tile hi le Mutsuwuka-gambo wa Bimbi ga Galileya, lava a nga katekisile tipawa ni tinjhanjhi vaga va xura.

Jesu i no simama ku tlhamusela, aku: ‘A vakokwani va n’wina va gile manna ciwuleni, kanilezvi va file.’ I no guma a va komba kuhambana, hi ku wula lezvi: ‘Mina ndzi cibaba leci ci hanyako, leci ci nga relela hi le tilweni; loku munhu aga cibaba leci, i ta hanya kala kupindzuka. Ni cibaba leci ndzi ta nga nyika cona, hi nyama ya mina, yi nyikilweko kasi tiko gi hanya.’ — Johani 6:48-51.

Ka Phasika ga 30 Nguveni ya Kristu, Jesu i wa byelile Nikodhemusi aku Nungungulu i randzile tiko laha ka kuza a nyikela N’wana wakwe kasi ku tlhatlhisa vanhu. Laha makunu, i wo khanyisa lisima la ku a vanhu vaga nyama yakwe hi ku kholwa muphahlo lowu a nga wa ta wu maha. Leyo hi yona ndlela ya ku kuma wutomi ga pindzukelwa.

Hambulezvo, a vanhu va no ala lezvi a nga zvi wula, va wutisana vaku: “A munhu loyi i ta hi nyikisa kuyini a nyama yakwe a kuva hi yiga ke?” (Johani 6:52) Jesu i wa lava lezvaku va zvi zwisisa ku i wa nga wuli kuga loku ka kuga futsi; kanilezvi i wo fananisa. Lezvo hi zvi wona khwatsi ka lezvi a nga wula hi kulandzela.

I te: “Loku mu ngagi a nyama ya N’wana wa munhu, munwa a nkhata wakwe, a mu na wutomi ndzeni ka n’wina. Loyi a gako a nyama ya mina, anwa a nkhata wa mina, i na ni wutomi ga pindzukelwa; . . . Hakuva a nyama ya mina hi kuga hakunene, ni nkhata wa mina hi kunwa hakunene. Loyi a gako a nyama ya mina, anwa a nkhata wa mina,” i tava zvin’we na mina. — Johani 6:53-56.

Handle ko kanakana, a vaJudha lava va nga zvizwa va zvi wonile zvi hi ciruko! Kuzvilava va alakanyile ku Jesu i wo kuca vanhu lezvaku vaga nyama ya munhu futsi, va tlhela va tshova nayo wa Nungungulu wu betelako kuga nkhata. (Genesisi 9:4; Levhi 17:10, 11) Kanilezvi, Jesu i wa nga wuli ku vaga nyama yakwe va tlhela vanwa nkhata wakwe futsi. I wo komba lezvaku vontlhe lava va nga lava ku kuma wutomi ga pindzukelwa va wa fanele ku kholwa ka muphahlo lowu a nga wa ta wu maha hi ku nyikela miri wakwe wo mbhelela a tlhela a halata nkhata wakwe. Kanilezvi, hambu vapizani vakwe a va zvi zwisisangi lezvi a nga kari a gondzisa, niku va tele va nga kala ku zvi zwisisa. A vokari va te: “A mhaka leyi ya nonoha, himani a ta nga yi ingisa ke?” — Johani 6:60.

Kota lezvi Jesu a nga kari a wona ku a vapizani vo kari va wo ngurangura, i no wutisa lezvi: “Xana a mhaka leyi ya mu khunguvanyisa ke? Zvonake mu taku yini loku mu wona N’wana wa munhu na a kandziha laha a nga hi kona hi kusanguleni ke? . . . A timhaka leti ndzi mu byelileko tona, hi moya ni wutomi. Kanilezvi va kona van’wani cikari ka n’wina lava va nga kholwiko.” A vapizani vo tala va no tekela ku suka va famba, va nga ha mu landzeli gimbe. — Johani 6:61-64.

I no wutisa vapostoli vakwe lava va 12, aku: “N’winawu mu lava ku [famba] ke?” Pedro i no hlamula aku: “Hosi, hi taya ka mani ke? Wena u na ni timhaka ta wutomi ga pindzukelwa. Hi kholwile, ha zvi tiva lezvaku wena u Loyi wa Kubasa wa Nungungulu.” (Johani 6:67-69) Hi ngazwa magezu ma kombisako ku tsumbeka! Hambulezvo, yenawu Pedro ni vapostoli lava van’wani va wa nga zvi zwisisi khwatsi lezvi Jesu a nga kari a gondzisa ka mhaka leyi.

Jesu i no tsaka hi lezvi Pedro a nga hlamula, zvonake aku: “Hi mina ndzi nga hlawula n’wina va 12, a hi zvona ke? Hambulezvo, a mun’we wa n’wina i sathani.” (Johani 6:70, NM) I wa wula Judhasi Iskariyoti. Ko khwatsi ka cikhati leco Jesu i wa zvi wona ku Judhasi i sangulile kuva ni mixuvo ya hava.

Hambulezvo, Jesu i wa xalala hi ku tiva lezvaku Pedro ni vapostoli lava van’wani va wa nga mbhelangi ntamu, ne va wa nga lavi ku tsika ku mu landzela kutani ku tsika ntiro wo hanyisa lowu a nga kari a maha.