A malanza ya wutireli ma maha ntiro wa lisima

NA A tsalela a bandla ga le Filipi, mupostoli Paule i te: “Paule na Timote, a malanza ya Jesu Kristu, ha losa a vobasa ka Kristu Jesu, lava va nga le Filipi, zinwe ni varisi ni malanza ya wutireli.” (Fil. 1:1, NM) Wona lezaku i kumbukile a malanza ya wutireli. Zi laha kubaseni lezaku a vavanuna lava va wa nyika xivuno xa lisima a madota ya bandla ya xikhatini lexo. Ni nyamutlha za ha tshamisile lezo. A malanza ya wutireli ma maha a mitiro leyi yi vunako a madota ni bandla gontlhe kasi zontlhe zi famba hi fanelo ni nayo.

² Xana wa ma tiva a malanza ya wutireli ma nga bandleni ga wena? Wa zi tiva lezi va ku mahelako ni lezi va mahelako a bandla gontlhe? Handle ko kanakana, Jehova wa yi nyika nguvu lisima a mizamo leyi yi mahiwako hi vavanuna lava. Paule i tsalile lezi: ‘A vavanuna lava va tirako khwatsi kota malanza ya wutireli va ti kumela a xiyimo xi nene, va hi ni kutiya ka hombe kuwulawuleni hi kukholwa loku ku nga ka Kristu Jesu.’ — 1 Tim. 3:13.

ZILAVEKO ZA MITSALO KA MALANZA YA WUTIRELI

³ Ku rinzelwa lezaku a malanza ya wutireli ma hanya a wutomi ga gi nene ga wuKristu, mava vavanuna va nga ni wutihlamuleli, niku va khatalela khwatsi a ziavelo zabye. Lezi za dlunyateka khwatsi loku hi kambisisa magezu ya Paule xungetano hi lezi zi lavekako kasi va ringanelwa. Ka papilo gakwe ka Timote i te: “A malanza ya wutireli kambe a mave lawa ma dzunzekako, ma nga hi na tirimi timbiri, ma nga ti nyiketi kunweni ka byala, na ma nga naveli a bhinzu go biha; kanilezi ma hi yo hlayisa a fihlakalo wa kukholwa hi livalo li nene. Na wonawu a ma hloliwe kuranga; zonake a ma tire kota malanza ya wutireli loku ma kumeka na ma nga soleki. A malanza ya wutireli a mave vanuna va sati munwe, ma fumela khwatsi vana vabye ni mingango yabye.” (1 Tim. 3:8-10, 12, NM) A ku namarela a matshinya yo tlakuka ya milayo ma vekelweko a malanza ya wutireli zi vikela bandla ka ziruko lezi zi nga ha wuliwako xungetano hi vavanuna lava va nyikiwako wutihlamuleli go hlawuleka.

⁴ Kani vaswa kutani vanhu va hombe, a malanza ya wutireli ma hiseka nguvu ntirweni wa simu hweti ni hweti. Na ma pimanyisa Jesu, a malanza lawa ma hiseka nguvu hi ntiro wo xumayela. A kuhiseka kabye, ku komba a kuxuva ka hombe ka Jehova ka lezaku a vanhu va hanyiswa. — Isa. 9:7.

⁵ A vavanuna lava va tirako kota malanza ya wutireli va nyika xikombiso xi nene kambe hi maambalela yabye, ma ti sasekisela, mawulawulela, matshamela, ni mahanyela. Vanhu va tlharihileko, niku hi kota ya lezo va kombisiwa xichawo hi vanwani. Tlhatakumbiri, va gi nyika nguvu lisima a wunghana gabye na Jehova ni malungelo lawa va nyikilweko bandleni. — Tit. 2:2, 6-8.

⁶ A vavanuna lava ‘va hlolilwe kuranga.’ Na va nga se yimisiwa kota malanza, va kombile lezaku vanhu va ti yimiseleko ku tirela Jehova. Va kombile kambe lezaku va rangisa a zilaveko za Mufumo wutomini gabye niku va ti yimisele ku amukela ni gihi a lungelo gi va vululekelako. Hakunene, zikombiso zi ringanelwako hi kupimanyisiwa hi vanwani lomu bandla. — 1 Tim. 3:10.

NTIRO WA WONA

⁷ A malanza ya wutireli ma maha a mitiro yo tala yi vunako a bandla, niku a xivuno xabye xi vuna a madota a kuva ni xikhati xo tala xa ku gonzisa ni ku risa a ntlhambi. Na yi nga se ma nyika a ziavelo, a hubye ya madota yi ranga hi ku alakanyela a wuzikoti ga nanza ginwe ni ginwani ni zilaveko zi nga bandleni.

⁸ A hi woneni a mitiro yo kari yi mahiwako hi malanza ya wutireli: A nanza go kari ga wutireli gi nga ha nyikiwa ntiro wa ku khatalela mabhuku lawa hi gonzako hi wona ni ku ma tirisa ntirweni wo xumayela. A ginwani gi nga ha khatalela a marevista. A manwani kambe ma nyikiwa a ntiro wa ku khatalela a mibiko ya timali ta bandla kutani kartawu ga zipanze. A manwani ma nyikiwa a ntiro wa ku khatalela a mimikrofone, michini ya pfumawulo, ku tira kota vakombeteli, ni ku vunetela a madota hi tindlela tinwani. Ku na ni zotala zi faneleko ku mahiwa kasi a Salawu ya Mufumo yi tshama yi basile, hikwalaho a malanza ya wutireli ma tolovela ku kombeliwa lezaku ma vunetela ntirweni lowu.

⁹ Ka mabandla yo kari, za koteka ku a nanza ginwe ni ginwani gi khatalela a ntiro munwe basi. Kanilezi, ka mabandla manwani, a nanza ginwe gi khatalela mitiro yo tala. Ka ziyimo zo kari, a ntiro walowu wa wunwe wu nga mahiwa hi malanza yo tala. Loku ku nga hi na malanza yo enela lezaku ma khatalela a mitiro yo kari, a hubye ya madota yi nga ha kombela a vamakabye vanwani va xinuna va bapatizilweko, lava va nga xikombiso xi nene, lezaku va maha mitiro leyo. A mahela legi gi ta vuna a vamakabye lavo lezaku va kuma a wutlhari legi gi to va vuna a xikhati lexi va to ringanelwa hi kuva malanza ya wutireli. Loku ku nga hi na vamakabye va xinuna, ku nga ha kombeliwa makabye wa xisati a nga xikombiso xi nene lezaku a maha mitiro leyi yi lavekako, hambu lezi a to kala a nga tshuki a yimisiwa kota nanza ga wutireli. A makabye a nga xikombiso xi nene, hi loyi a mahanyela yakwe ni makhozelela yakwe ma ringanelwako hi ku pimanyiswa. A kukumeka kakwe mitlhanganweni, kuhlengela kakwe ntirweni wo xumayela, hanyela gakwe laha ngangweni, mihlakano a yi hlawulako, maambalela ni ma ti sasekisela ni zinwani — zikombiso zi nene lezi zi nga pimanyiswako hi vanwani.

¹⁰ Ka mabandla lawa ku nga ni wuna ga madota, a malanza ya wutireli ma ringanelwako ma nga kombeliwa ku kambela lava va lavako ku bapatiziwa hi ku tirisa ziwutiso zi yelanako ni timhaka ta tigonzo. A ziwutiso lezo zi kumeka ka Xiengetelo, “Xipanze 1, Tigonzo to sangula ta Biblia” ni “Xipanze 3, Lezi Jehova a xaxametisako zona zilo.” Kota lezi a “Xipanze 2, Milayo ya Jehova yo lulama” xi wulawulako hi timhaka ta munhu wutsumbu, zi chukwana ku xi fambisiwa hi dota.

¹¹ Hi kota ya xigelo xo kari xo zwala, a hubye ya madota yi nga ha boha kuta na yi cicacica a mitiro leyi yi nyikileko a malanza ya wutireli. Hambulezo, za vuna nguvu ku tsika vamakabye va maha ntiro walowu wa wunwe hi xikhati xo leha lezaku va buva ka wona.

¹² Hi ku ya hi lezi zi tolovelekileko lomu xipanzeni, a malanza lawa a kukula ka wona ku ‘wonekako ka vanhu vontlhe,’ ma nga ha nyikiwa a wutihlamuleli go engeteleka. (1 Tim. 4:15) Loku ku nga hi na madota yo enela, a nanza ga wutireli gi nga ha tira kota muvuneteli wa muwoneleli wa ntlawa, kutani ku tira kota nanza ga ntlawa, na gi wonelelwa hi madota. Loku zi laveka, a malanza ya wutireli ma nga ha avelwa ku khatalela a zipanze zo kari za Mutlhangano wa Ntiro ni Mahanyela, ku fambisa a Xigonzo xa Biblia xa Bandla, ni ku veka a tikanelo ta vanhu vontlhe. Loku ku hi ni xilaveko ni loku ma ringanelwa hi ku maha a ntiro lowo, a malanza ya wutireli ma nga nyikiwa a malungelo yo engeteleka. (1 Ped. 4:10) Xungetano hi ku vunetela a madota, a malanza ya wutireli ma fanele ku ti nyikela hi kuziranza.

¹³ Hambu lezi a mitiro ya malanza yi hambanako ni leyi yi mahiwako hi madota, a mitiro yabye xipanze xa lisima xa ntiro wo basa wa Nungungulu niku ya lisima kasi a bandla gi simama gi tira khwatsi. Hi kufamba ka xikhati, loku zi woneka lezaku ma khatalela khwatsi a mitiro yabye niku ma ringanelwa hi kuva varisi ni vagonzisi, ma nga yimisiwa kota madota.

¹⁴ Loku u hi makabye wa xinuna a ha hiko muswa kutani a ha hi ku bapatiziwako, xana wa maha lezi zi lavekako kasi u ringanelwa hi kuva nanza ga wutireli? (1 Tim. 3:1) Kota lezi a vanhu vo tala va tako hlengeletanweni lembe ni lembe, ku laveka vavanuna va ringanelwako lezaku va khatalela a bandla. U nga ti karatela kuva nanza hi ku hlakulela a moya wa ku vuna vanwani. A yinwe ya tindlela ta ku maha lezo ku ehleketa hi xikombiso xi nene xa Jesu. (Mat. 20:28; Joh. 4:6, 7; 13:4, 5) A kunavela ka wena ku taya ku kula nguvu laha u wonako a litsako leli li tako hi ku vuna vanwani. (Miti. 20:35) Hikwalaho, ti hendlelete lezaku u vuna vanwani ka zilaveko zabye, vunetela kuhlayiseni ka Salawu ya Mufumo, kutani ku valeta lava va tsanzekako ku maha a ziavelo zabye Mutlhanganweni wa Ntiro ni Mahanyela. Laha u zamako ku ringanelwa hi kuva nanza, u nga rivali ku hlakulela a matshamela ya moya ni kuva ni tolovelo wu nene wa xigonzo xa munhu wutsumbu. (Tis. 1:1, 2; Gal. 5:22, 23) Tlhatakumbiri, a makabye loyi a ti karatelako kuva nanza, i tshama na a longile ku vumela a ziavelo a nga ha nyikwako bandleni, niku i tatisa a ziavelo lezo hi kutsumbeka. — 1 Kor. 4:2.

¹⁵ A malanza ya wutireli ma yimisiwa hi moya wa ku basa lezaku ku vuneka a bandla. A bandla gi nga komba lezaku ga wu bonga nguvu a ntiro wa malanza ya wutireli hi ku tirisana khwatsi nawo a xikhati lexi ma tatisako a mitiro leyi ma nyikilweko. Hi ku maha lezo, a bandla gi ta komba lezaku ga nyika lisima a lulamiselo legi Jehova a gi yimisileko lezaku a zilo zontlhe bandleni zi mahiwa hi fanelo. — Gal. 6:10.