Simama hlengeletanweni ya Jehova

MUPIZANI Jakobe i tsalile lezi: “Tshinelani ka Nungungulu, na yena i ta tshinela ka nwina.” (Jak. 4:8) Kunene, Jehova a nga le kule nguvu na hina vanhu vo kala ku mbhelela laha ko kala a ngazwi a mikhongelo ya hina. (Miti. 17:27) Makunu, hi nga tshinelisa kuyini ka Nungungulu? Hi nga maha lezo hi ku hlakulela a wunghana ga hombe na yena hi ku khongela kakwe hi mbilu yontlhe ni ku gonza a Biblia hi kukhanzakanya. (Tis. 39:12) A xigonzo lexo xi ta hi vuna a ku mu tiva khwatsi Jehova Nungungulu hi tlhela hi tiva a makungo yakwe ni lezi a lavako lezaku hi mu mahela. (2 Tim. 3:16, 17) Hi ndlela leyo, hi ta mu ranza hi tlhela hi potsa a zilo lezi zi nga mu tsakisiko. — Tis. 25:14.

² Hambulezo a kutshinela ka Nungungulu zi koteka ntsena hi ku tiva a N’wana wakwe Jesu. (Joh. 17:3; Rom. 5:10) A ku na munhu a mu tivako khwatsi Jehova a ku hunza Jesu. Kristu i wa hi ni wunghana ga hombe nguvu ni Dadani wakwe Jehova laha ka kuza a wula lezi: “A nga kona a mu tivako N’wana lezaku himani, sine Dadani yece; niku himani Dadani, sine N’wana yece, ni wihi loyi N’wana a xuvako ku mu wonekelisa ka yena.” (Luka 10:22) Hikwalaho, a xikhati lexi hi gonzako a mabhuku ya tiIvangeli, lawa ma kombako a maalakanyo ni kutizwa ka Jesu, ka xikhati xalexo ho gonza maalakanyo ni kutizwa ka Jehova. A wutivi lego ga hi vuna a ku tshinela ka Jehova.

³ Na hi rangelwa hi N’wana wa Nungungulu, hi hlakulela a wunghana na Jehova hi ku simama lomu hlengeletanweni yakwe leyi yi hi vunako a ku tiva ni ku maha kuranza kakwe. Kota lezi zi profetilweko ka Mateu 24:45-47, Jesu Kristu, a Hosi ya hina, i yimisile a “nanza gi tsumbekileko ni go tlhariha” lezaku gi “nyika zakuga hi xikhati xi faneleko” ka va ngango wa kukholwa. Inyamutlha, a nanza gi tsumbekileko ga hi phamela a zakuga zo tala za moya hi ku tirisa a mabhuku ma seketelwako ka Biblia ni mitlhangano ya xipanze zinwe ni migotsovanyano. Hi ku tirisa a nanza legi, Jehova wa hi kuca lezaku hi lera a Mhaka yakwe siku ni siku, hi nga choti mitlhanganweni ya wuKristu ni ku xumayela a “ivangeli . . . ya Mufumo” hi ku hiseka. (Mat. 24:14; 28:19, 20; Jox. 1:8; Tis. 1:1-3) Hi fanele kuva ni mawonela ma nene hi nanza go tsumbeka hi tlhela hi ti karatela ku simama kusuhani ni xipanze xi wonekako xa hlengeletano ya Jehova ni ku ingisa a wurangeli ga yona. Hi ndlela leyo, hi ta tshinela ka Nungungulu wa hina Jehova, niku hi ta tiyisiwa hi tlhela hi vikelwa hambu loku hi kumana ni minzhingo.

HIKUYINI A MINZHINGO YI TSHINGAKO?

⁴ Kuzilava u na ni malembe yo tala na u hi lisineni. Loku zi hi tano, handle ko kanakana u timisele a minzhingo yo tala leyi yi nga ringa a kutsumbeka ka wena. Kanilezi, hambu loku u nga hi na malembe yo tala na u tivile Jehova ni ku ti patsa ni vanhu vakwe, wa zi wona hi ya wena mahlo lezaku Satani Diabolus i xanisa ni wihi munhu a ingisako a wuhosi ga Jehova. (2 Tim. 3:12) Hikwalaho, kani u timisele minzhingo yo tala kutani ahihi, a wu faneli ku chava kutani ku mbhela ntamu. Jehova i tsumbisa lezaku i ta ku vuna a tlhela a ku chachazela hi ku ku ponisa ni ku ku nyika wutomi xikhatini xi tako. — Maheb. 13:5, 6; Kuv. 2:10.

⁵ Ka masiku lawa yo gumesa ya tiko go biha ga Satani, kuzilava hontlheni ha ha ta yimisana ni minzhingo. Kusukela loku a Mufumo wa Nungungulu wu yimisilwe le tilweni hi 1914, Satani a nga ha vumelelwi a ku nghena matilweni. Yena ni tingelosi takwe to biha va hoxilwe laha misaveni. A kuengeteleka ka zikarato laha misaveni ni kutshinga ka tixanisa leti ti welako a vanhu lava va ti hendleletileko ka Jehova, xitiyisekiso xa lezaku hakunene Satani i zangarile nguvu ni lezaku a mufumo wakwe wo biha wu salelwe hi masiku matsongwani. — Kuv. 12:1-12.

⁶ Satani i zangarile nguvu hi lezi a hlongolilweko le tilweni ni lezi a zi tivako lezaku a xikhati xi mu saleleko xitsongwani. Yena ni madimoni yakwe va maha zontlhe va zi kotako kasi ku colopetela a ntiro wa ku xumayela ni ku onha a kuzwanana ka malanza ya Jehova. Hi kota ya lezo, hina hi yimpini ya moya. “A hilwi ni nyama ni nkhata, kanilezi hilwa ni tihosana ta mimoya, ni mintamu, ni tihosi ta munyama lowu, ni mimoya ya kubiha ya le hehla.” Kasi hi hlula a hi faneli ku rereka yimpini leyi hi ku tsika a xitlhangu xa hina xa moya xi chacharela. Hi fanele ku simama hi tiya kasi hi “hlula a mano ya Satani.” (Efe. 6:10-17) A magezu lawa ma komba lezaku hi fanele ku timisela.

HLAKULELA A MOYA WA KU TIMISELA

⁷ A gezu kutimisela gi wula a “wuzikoti legi a munhu a nga nago ga kulwa ni zikarato, kutani ziyimo zinwani zo nonoha.” Kanilezi hi tlhelo ga moya, a kutimisela zi wula ku tiya u maha lezi zi nga zi nene hambu loku u xanisiwa, u kanetiwa kutani ku mahiwa zilo zinwani zi lavako ku tshova a kutsumbeka ka wena ka Nungungulu. A maKristu ma fanele ku hlakulela a moya wa kutimisela. Niku zi teka xikhati kasi a munhu ava ni tshamela lego. Gona gi simama ku kula a xikhati lexi hinawu hi kulako hi tlhelo ga moya. Laha hi timiselako a minzhingo ya yi tsongwani ya kukholwa, leyi yi humelelako a xikhati lexi hi sangulako ku hanya kota maKristu, ho lota a wuzikoti ga hina ga ku timisela kasi hi zi kota ku yimisana ni minzhingo ya hombe leyi hi to tlhangana nayo. (Luka 16:10) A hi faneli ku kondla mawoko hi rinzela minzhingo yi chikela hi kona hi tiyisako a kukholwa ka hina. Hi fanele ku ku tiyisa na minzhingo yi nga se chikela. Na a komba lezaku a xikhati lexi hi hlakulelako a kutimisela hi fanele ku hlakulela a matshamela manwani ma tsakisako Nungungulu, mupostoli Pedro i tsalile lezi: “Ngha mu pinyamela a kuva ni wunene kukholweni ka nwina; ni wuneneni ga nwina muva ni kutiva; ni kutiveni ka nwina muva ni kutikhoma; ni kutikhomeni ka nwina muva ni kutimisela; ni kutimiseleni ka nwina muva ni xichawo xa wuNungungulu; ni kuchaveni ka nwina Nungungulu ngha mu ranza vamakabye, ni kuranzeni ka nwina vamakabye muva ni liranzo.” — 2 Ped. 1:5-7; 1 Tim. 6:11.

⁸ A lisima la ku hlakulela a kutimisela li wulilwe hi Jakobe a xikhati a nga tsala lezi: “Vamakabye va mina, ngha mu wula lezaku kutsaka ntsena loku mu wela lomu minzhingweni yi tsalangeneko; na mu tiva lezaku a kuringwa ka kukholwa ka nwina ku vanga kutimisela. Kanilezi a kutimisela a kuve ni ntiro lowu wu mbheleleko, lezaku mu mbhelela ni ku tala, mu nga kiyelelwi ha nchumu.” (Jak. 1:2-4) Jakobe i kombile lezaku a maKristu ma fanele ku tsaka loku ma kumana ni minzhingo hakuva a minzhingo ya hi vuna a ku hlakulela a moya wa ku timisela. Xana wena wa tsaka loku u yimisana ni minzhingo? Jakobe i tlhelile a komba lezaku a kutimisela ka hi vuna a ku chukwatisa a wumunhu ga hina ga wuKristu kasi hi amukeleka khwatsi ka Nungungulu. Kunene, a tshamela legi giya gi kula a xikhati lexi hi hlulako a minzhingo leyi hi kumanako nayo siku ni siku. Tlhatakumbiri, a kutimisela ku pswala a matshamela manwani ma amukelekako ka Nungungulu.

⁹ Jehova wa tsaka loku a hi wona na hi timisela a minzhingo; niku i ta hi chachazela hi wutomi ga pinzukelwa. Jakobe i lo engeta aku: “I katekile a munhu loyi a timiselako minzhingweni; hakuva loku a ringilwe a kumeka na a tiyile, i ta amukeliswa a xidlodlo xa wutomi, lexi a Hosi yi tsumbisileko lava va yi ranzako.” (Jak. 1:12) Hakunene, a kutimisela ku hi yisa wutomini ga pinzukelwa. A hi nge zi koti ku simama lisineni loku hi nga timiseli. Loku hi tsika a kucetelo wa hava wu hi hlula, hi ta kurumeteka ku tlhela tikweni. Loku hi nga timiseli, Jehova a nga ta ha hi nyika a moya wakwe; niku loku hi nga hi na moya wa Jehova hi nga ta ha kombisa a matshamela lawa ma vangiwako hi wona.

¹⁰ Kasi hi zi kota ku simama hi timisela masikwini lawa yo karata, hi fanele ku hlakulela a mawonela ma nene hi minzhingo leyi a maKristu ma kumanako nayo. Alakanya a magezu ya Jakobe yaku: “Ngha mu wula lezaku kutsaka.” Lisine lezaku a zi olovi a kutsaka loku u welwa hi minzhingo hakuva yi vanga a kuxaniseka hi tlhelo ga nyama kutani kukarateka mbilwini. Kanilezi u nga rivali lezaku lexi hi xi lwelako wutomi ga pinzukelwa legi hi to gi kuma lokuloku. Lezi zi humeleleko a vapostoli za hi vuna a ku tiva a xigelo xa kuva hi tsaka a xikhati hi xanisiwako. A tshango lego gi kumeka ka bhuku ga Mitiro; gona gi ngalo: “Laha na va vitanile a vapostoli, va lo vaba, va va laya lezaku va nga ha kaneli hi vito ga Jesu, va va tsika va famba. A vapostoli va lo suka hi laha hubyeni, na va tsaka hilezi va hlayelweko lava va faneleko a ku xaniseka hi kota ya vito ga Jesu.” (Miti. 5:40, 41) A vapostoli va tekele ku zi wona lezaku a kuxaniswa kabye zi wa hi xitiyisekiso xa lezaku va kari va ingisa a xileletelo xa Jesu niku Jehova wa va tsakela. A xikhati lexi a nga tsala a papilo gakwe go ranga gi pimisilweko, Pedro i lo wulawula hi lisima la ku xaniseka hi kota ya kululama. — 1 Ped. 4:12-16.

¹¹ A tshango ginwani gi humelele Paule na Silasi a xikhati lexi va nga hi ntirweni wabye wa wurumiwa le Filipi. Va lo khonwa va tlhela va lumbetwa ku ngha va vuxa a gujeguje doropeni ni ku kanela a mikhuwo yi nga hiko ya nayo. Hi kota ya mawunwa lawo, va lo biwa ti nga teki va tlhela va valelwa paxweni. A tlhatlhambutelo wa Biblia wu komba lezaku na va ha hi ni zilonza zabye zo kala ni ku khatalelwa, “hi laha xikari ka wusiku, Paule na Silasi va wa kari va khongela, va yimbelela tisimu to dumisa Nungungulu, a tiperesu na ti va ingisela.” (Miti. 16:16-25) Hi kufaneleko, Paule ni vanghana vakwe a va wonangi a kuxaniseka kabye hi kota ya Kristu kota xikombiso ntsena xa lezaku va wa tsumbeka mahlweni ka Nungungulu ni ka vanhu kanilezi va ku wonile kambe kota ndlela ya ku hangalasa a mahungu yo saseka ka vanhu va timbilu ti nene. A matimu lawa ma khumbile a wutomi ga vanwani. Ka wusiku galego, a murinzeli wa paxo ni ngango wakwe va lo ingisa a mahungu ya Paule na Silasi va tlhela vava vapizani. (Miti. 16:26-34) Paule na Silasi va tsumbile Jehova ni moya wakwe wa ku basa, va tlhela va tsumba lezaku Jehova i wa ti yimisele ku va vuna a xikhati lexi va xanisekako. Niku handle ko kanakana i va vunile.

¹² Nyamutlha konawu Jehova wa hi nyika zontlhe lezi hi zi lavako kasi hi lwisana ni minzhingo niku i lava lezaku hi yi timisela. Jehova i hi nyikile a Mhaka yakwe yi pimisilweko leyi yi hi tivisako a kungo gakwe. A wutivi legi ga lisine xungetano hi kungo ga Jehova ga tiyisa a kukholwa ka hina. Hi na ni lungelo ga kuva zinwe ni makholwa-kulori ni ku mu mahela a ntiro wo basa. Hi na ni lungelo kambe ga ku hlayisa a wunghana gi nene na Jehova wutsumbu hi ku khongela kakwe. Wazwa a mikhongelo ya hina ya ku mu dumisa ni zikombelo hi zi mahako hi mbilu yontlhe kasi a hi vuna ku simama hi basile mahlweni kakwe. (Fil. 4:13) A hi faneli ku rivakelwa lezaku a ku ehleketa hi kutsumba loku hi nga nako za hi nyika a ntamu wa ku timisela minzhingo. — Mat. 24:13; Maheb. 6:18; Kuv. 21:1-4.

TIMISELA A MINZHINGO YO HAMBANAHAMBANA

¹³ A minzhingo leyi hi yimisanako nayo inyamutlha ya fana ni leyi ya vapizani vo sangula va Jesu Kristu. Inyamutlha, a Timboni ta Jehova ta biwa ni ku rukatelwa hi vakaneti lava va kholwako a mawunwa va byelilweko xungetano hi tona. A ku fana ni xikhatini xa vapostoli, a kutala ka zikhati hi xanisiwa hi kota ya ziro za wukhongeli ga mawunwa lezi zi hi vukelako hi kota ya lezi hi paluxako a tigonzo tabye ta mawunwa ni mitiro yabye yi koniwako hi Mhaka ya Nungungulu. (Miti. 17:5-9, 13) Kasi va ti tlhatlhisa ka tixanisa leto, a vanhu va Jehova va tshuka va lonzowota a tifanelo leti a mufumo wu nyikako a vafumelwi va wona. (Miti. 22:25; 25:11) Kanilezi, a mifumo yonawu ya tshuka yi zama a ku fuvisa ntiro wa hina wa wuKristu. (Tis. 2:1-3) Ka ziyimo lezo, hi tiya hlana hi lanzela a xikombiso xa vapostoli vo tsumbeka lava va ngaku: “Hi fanele ku ingisa Nungungulu ku hunza ku ingisa vanhu.” — Miti. 5:29.

¹⁴ Kota lezi a moya wa ku ti dzunza hi tiko ga wena wu yako wu anza nguvu, a vaxumayeli va mahungu yo saseka vonawu vaya va xaniswa nguvu kasi va tsika a ntiro lowu va nyikilweko hi Nungungulu. Wontlhe a malanza ya Jehova ma xi nyika nguvu lisima a xitlharihiso xi kumekako ka Kuvululelwa 14:9-12 lexi xi wulawulako hi ku “khozela xihari ni xifananiso xa xona.” Ha wu zwisisa a tlhamuselo wa magezu ya Johani, yaku: “Hi laha ku wonekako a kutimisela ka vobasa, lava va hlayisako milayo ya Nungungulu ni kukholwa ka Jesu.”

¹⁵ A ziringo lezi zi vangiwako hi yimpi, kucica ka mafumela, kutani kuvukelwa ka vanhu va Jehova ni kubeletelwa ka ntiro wabye hi mifumo, zi nga ku tsanzekisa ku khozela Jehova kubaseni. A ziro za bandla zi nga ha nyima ku maha mitlhangano kota bandla. A hofisa ya ravi yi nga ha nyima ku fonelana kutani ku tsalelana mapapilo ni mabandla. A vawoneleli va zipanze va nga ha nyima ku enzela mabandla hi xikhati xo kari. Niku, mu nga ha nyima ku rumelelwa mabhuku maswa. Loku lezo zo tshuka zi humelela, u ta maha yini ke?

¹⁶ Lonzowota zontlhe lezi wa ha zi kotako ku maha ka ziyimo lezo. Simama u ti mahela xigonzo xa wena wutsumbu. A bandla gi nga avanyisiwa hi mitlawa yitsongwani. A mitlawana leyo yi nga tlhangana mitini ya vamakabye kasi yi maha mitlhangano hi ku tirisa Biblia zinwe ni mabhuku ya kale. U nga chavi ge hambu ku karateka nguvu. A zi nge teki xikhati xo leha na Hubye yi Fumako yi nga se kuma ndlela yo wulawula ni vamakabye lava va nga ni wutihlamuleli.

¹⁷ Hambu loku u tshuka u hoxiwa ka wutshamu ga wena wece, alakanya lezaku wa ha hi zinwe na Jehova ni N’wana wakwe Jesu Kristu. U nga simama uva ni kutsumba ko tiya. Wa ha hi ni lungelo ga ku khongela ka Jehova niku i ta ku tiyisa hi moya wakwe wa ku basa. Mu hlote lezaku a ku rangela. U nga rivakelwi lezaku u nanza ga Jehova tlhelo mupizani wa Jesu Kristu. Hikwalaho, lonzowota ni wihi mole u wu kumako wa ku xumayela. Jehova i ta katekisa a mizamo ya wena, niku kuzilava a vanwani va ta ti patsa na wena wukhozelini ga lisine. — Miti. 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Hambu u hi mhangweni ya kufa a ku fana ni lezi zi humeleleko vapostoli ni vanwani, simama ku tsumba a “Nungungulu loyi a vuxako a vafileko.” (2 Kor. 1:8-10) A ku tsumba lezaku Jehova i ta vuxa vafileko zi nga ku vuna kutimisela a tixanisa to tshisa nguvu. (Luka 21:19) Jesu Kristu i hi vekele xikombiso; i wa zi tiva lezaku a kutsumbeka kakwe loku a kumana ni minzhingo ku ta kuca vanwani lezaku vonawu va timisela. A kutimisela ka wena ku nga kuca vamakabye lezaku vonawu va timisela a minzhingo. — Joh. 16:33; Maheb. 12:2, 3; 1 Ped. 2:21.

¹⁹ Ahandle ka ku kanetiwa ni ku xanisiwa hi kota ya kukholwa ka hina, ku nga ha humelela zikarato zinwani u faneleko ku zi timisela. Hi xikombiso, a vokari va mbhelile ntamu hi lezi a vanhu va xipanze xabye va nga tsakeliko a mahungu yo saseka. A vanwani va babya niku a kungambheleli a ku va tsiki va maha zontlhe va zi lavako. Mupostoli Paule yenawu i timisele a xikarato xo kari lexi xi nga kari xi colopetela a ntiro wakwe kutani ku wu maha wu mu karatela. (2 Kor. 12:7) A muKristu wa le Filipi a vitwako Epafroditusi, “i lo karateka nguvu hilezi [a vanghana vakwe va] nga zwile lezaku i wa kari a babya.” (Fil. 2:25-27) A kungambheleli ka hina ni loku ka vanwani ku nga hi vangela a zikarato lezi zi karatako a ku zi timisela. Zi nga karata a kuhanyisana khwatsi ni maKristu-kulori kutani ziro za ngango hi lezi hi nga ni wumunhu go hambana. Hambulezo, loku hi ingisa a wusungukati ga Mhaka ya Jehova hi ta zi kota a ku zi timisela. — Ezek. 2:3-5; 1 Kor. 9:27; 13:8; Kol. 3:12-14; 1 Ped. 4:8.

TI YIMISELE KU SIMAMA U TSUMBEKILE

²⁰ Hi fanele ku namarela ka Jesu Kristu, loyi a yimisilweko hi Jehova lezaku ava Hloko ya bandla. (Kol. 2:18, 19) Hi fanele ku tirisana khwatsi ni “nanza gi tsumbekileko ni go tlhariha” ni lava va yimisilweko lezaku va wonelela a bandla. (Maheb. 13:7, 17) Loku hi lanzela a malulamiselo ma yimisilweko hi Nungungulu hi tlhela hi tirisana khwatsi ni lava va hi rangelako, hi ta maha a ntiro wa Jehova na hi xaxametilwe khwatsi. Hi fanele ku khongela hi nga tsiki. A paxo a gi na ntamu wa ku ku tsanzekisa ku wulawula ni Dadani wa wena wa le tilweni kutani ku onha a kuzwanana loku u nga nako ni makholwa-kulori.

²¹ Kota lezi hi ti yimiseleko a ku simama hi timisela, ngha hi maha zontlhe hi zi kotako kasi hi tatisa ni ku timisela ntirweni lowu Jesu Kristu a nyikileko a valanzeli vakwe a xikhati a nga vuxiwa hi ka vafileko. I va leletele lezi: “Hikwalaho fambani, mu va maha vapizani a matiko wontlhe, mu va bapatiza hi vito ga Dadani ni ga N’wana ni ga moya wa ku basa; mu va gonzisa a ku gonga zontlhe lezi nzi mu layileko zona. Mangabye, nzi na nwina a masiku wontlhe, na kona kugumelweni ka xikhati.” (Mat. 28:19, 20) A ku fana na Jesu, ngha hi timisela. Ngha hi tshama hi ku alakanya a xitsumbiso xa Mufumo ni wutomi ga pinzukelwa. (Maheb. 12:2) Kota vapizani va Kristu va bapatizilweko, hi na ni lungelo ga ku hlengela kutatiseni ka xiprofeto xa Jesu xungetano hi “kugumesa ka tiko.” Ite: “A ivangeli leyi ya mufumo yi ta kanelwa misaveni yontlhe, kasi yiva wukustumunyu ka matiko wontlhe; hi kona ku ta nga chikela a kugumesa.” (Mat. 24:3, 14) Loku u ti tsitsirita hi mbilu yontlhe ntirweni lowu, u tava ni thomo ga ku hanya kala kupinzuka misaveni yiswa ya Jehova!