XIPANZE XA WUNTLHANU

Wuya “ka Murisi ni Muhlayisi wa mihefemulo ya nwina”

Xana u yimisana ni xikarato xo kari xa lezi zi tlhamuselweko ka broxura legi? Loku zi hi tano, tiva lezaku a hi wena wece. A malanza yo tala yo tsumbeka ya Nungungulu — ya xikhatini xa kutsaliwa ka Biblia ni ya masikwini ya hina — ma yimisene ni zikarato zo fana. Kota lezi Jehova a ma vunileko ku zi hlula, tiyiseka lezaku i ta ku vunawo.

Jehova i ku rinzele kasi ku ku amukela hi matsenya a xikhati lexi u to tlhelela kakwe

TIYISEKA lezaku Jehova i ku rinzele kasi ku ku amukela hi matsenya a xikhati lexi u to wuya kakwe. I ta ku vuna ku yimisana ni kukarateka, kukhunguvanyiswa, a tlhela a ku vuna a ku kuma kurula ka maalakanyo ni ka mbilu loku ku kumiwako hi kuva ni livalo li basileko. Hi kumaha loko, u nga tlhela u kuceka ku tirela Jehova na u hi zinwe ni vakhozeli-kuloni. Hikwalaho a xiyimo xa wena xi ta fana ni lexi xa maKristu yo kari ya zana ga malembe go sangula, lawa Pedro a nga ma tsalela aku: “Mu wa pengile khwatsi hi tiyivu ti lahlekileko; kanilezi makunu mu tlhelele ka Murisi ni Muhlayisi wa mihefemulo ya nwina.” — 1 Pedro 2:25.

A kuwuyela ka Jehova hi wona nchumu wa wunene nguvu u nga wu mahako. Hikuyini? Hakuva a ku maha lezo zi ta tsakisa a mbilu ya Jehova. (Mavingu 27:11) Kota lezi u zi tivako, Jehova i na ni kutizwa, hikwalaho lezi hi zi mahako za mu khumba. Hakunene, Jehova a nga hi kurumeti lezaku hi mu ranza kutani ku mu tirela. (Deuteronome 30:19, 20) A tlhari yo kari ya ku hlola Biblia yi zi tlhamuselisa lezi: “A mbilu ya munhu a yi vuliwi hi munwani. Yi vuliwa hi nwinyi.” A ku khozela Jehova hi mbilu yi teleko hi liranzo ha yena zi nga hi maha hi vulula a livati la mbilu ya hina. Loku hi maha lezo, hi ta ngha hi nyika Jehova a xinyikiwo xa lisima nguvu — ku nga kutsumbeka ka hina — niku lezo zi ta mu tsakisa nguvu. Kunene, a ku na litsako hi nga li fananisako ni leli hi li kumako hi ku nyika Jehova a wukhozeli legi gi mu faneleko. — Mitiro 20:35; Kuvululelwa 4:11.

Bandla gi hoyozelako hi litsako a muKristu wa xisati a nga holile hi tlhelo ga moya

Tlhatakumbiri, loku u tlhela u vuxeta a wukhozeli ga wena ga wuKristu u ta tatisa a xilaveko xa wena xa moya. (Mateu 5:3) Hi ndlela muni? A vanhu va matlhelo wontlhe ya misava va ti wutisa ku, ‘Hikuyini hi nga laha?’ Va na ni ndlala ya ku tiva a mihlamulo ya ziwutiso xungetano hi kungo ga wutomi. A vanhu va na ni xilaveko lexo xa zilo za moya hakuva Jehova i va vangile naxo. I hi mahile hi ndlela ya ku hi tsakiswa hi ku mu tirela. A hi ngevi ni litsako la hombe lo hunza leli li tako hi ku tiva lezaku hi khozela Jehova hakuva ha mu ranza. — Tisimu 63:1-5.

Alakanya lezaku Jehova i lava lezaku u wuya kakwe. U nga tiyisekisa kuyini hi mhaka leyo? Ehleketa hi mhaka leyi: Hi mikhongelo yo tala hi longisele a broxura legi hi wukheta. A wokari — kuzilava dota ga wuKristu kutani mukholwa-kulori — i lo ku nyika a broxura legi. Zonake u lo kuceka ku gi lera u tlhela u khumbiwa hi mahungu ya gona. Zontlhe lezo xikombiso xo hanya xa lezaku Jehova a nga ku rivalangi. A ku hambana ni lezo, wa ku koka hi matsenya lezaku u wuya kakwe. — Johani 6:44.

Hi nga chavelelwa hi ku tiva lezaku Jehova a nga tshuki a rivala a malanza yakwe ma hambukileko. Lezo hi zona lezi a makabye wo kari wa xisati a vitwako Donna a nga guma a zi zwisisa. I ngalo: “Hi kutsongwani-kutsongwani nzi lo hambuka lisineni, hambulezo nzi wa tolovela ku ehleketa hi Tisimu 139:23, 24, a nge: ‘Nzi hlole, u tiva mbilu ya mina; nzi ringe, u tiva a maalakanyo ya mina. U cuwuka loku nzi kari nzi famba hi ndlela ya kubiha, u nzi rangela ndleleni ya pinzukelwa.’ Nzi wa zi tiva lezaku nzi wa nga hi wa misava — niku hakunene a nzi tshukangi nzi zi tsakela kuva ka yona — niku nzi wa zi tiva lezaku nzi wa fanele kuva hlengeletanweni ya Jehova. Nzi sangulile ku zi zwisisa lezaku Jehova a nga tshukangi a nzi tsika; lexi nzi nga fanele ku maha ntsena ku tlhelela kakwe. Niku nza tsaka hi lezi nzi nga maha lezo futsi!”

“Nzi sangulile ku zi zwisisa lezaku Jehova a nga tshukangi a nzi tsika; lexi nzi nga fanele ku maha ntsena ku tlhelela kakwe”

A mukhongelo wa hina wa mbilu yontlhe ku wenawo u tlhela uva ni “litsako la Jehova.” (Nehemia 8:10) U nga ta tshuka u ti laya hi ku hlawula kuwuya ka Jehova.

Mihlamulo ya ziwutiso xungetano hi kuwuyela ka Jehova

NZI TA ZI SANGULISA KUYINI?

A munhu loyi a kalamukako ka nghumbe a nga tekeli ku kuma ntamu wa ku maha a mitiro yontlhe leyi a nga maha na a nga se babya. A ntamu wakwe wu tala ku wuya hi kutsongwani-kutsongwani. Hi kufanana, u nga vuxeta a ntamu wa wena kota muKristu hi ku ti karatela kuga zakuga zitsongwani za moya hi wutsongwani ga kona siku ginwe ni ginwani. U nga alakanyi lezaku u fanele ku tekela ku maha zontlhe. Kuzvilava u nga mbheta timinuto ti tsongwani na u lera kutani ku ingisela a gravhasawu ya Bhibhiliya, na u gondza a ginʼwe ga mabhuku ya hina, na u nghena laha ni lahayani ndzeni ka saite ya jw.org, kutani ku sixtira a yinʼwe ya tiprograma ti haxiwako ka jw.org. Tlhatakumbiri, ti karatele kuya mitlhanganweni ya bandla neti u vululekelwa hi mole wa ku maha lezo. Hehla ka zontlhe lezo, khongela ka Jehova u kombela lezaku a ku vuna. “Vekani hehla ka yena kontlhe a kukarateka ka nwina, hakuva wa mu khatalela.” — 1 Pedro 5:7.

“A xikhati lexi nzi nga holile hi tlhelo ga moya nzi wa hi ni tingana ta ku khongela. Laha nzi nga xinyata nzi khongela, a dota go kari ga bandla ga hina gi lo nzi enzela. Gi nzi vunile a ku wona lezaku Jehova a nga nzi fularelangi magumo. Gi tlhelile gi nzi kuca a ku sangula ku lera a Biblia siku ni siku. A xikhati lexi nzi nga sangula ku lera a Biblia siku ni siku, nzi lo kuceka kuya mitlhanganweni. Hi kufamba ka xikhati, nzi lo sangula kuya kambe ntirweni wa simu. Nza tsaka nguvu hi lezi Jehova a nga kala ku nzi tsikela magumo.” — Eeva.

XANA A BANDLA GI TA NZI AMUKELISA KUYINI?

Tiyiseka lezaku a ziro za bandla ga wena zi ta ku hoyozela hi matsenya. Wutshanwini ga ku ku solasola, kutani ku ku lamula, zi ta ku tiyisekisa lezaku za ku ranza niku zi ta tlhela zi maha zontlhe zi nga ntanwini wa zona kasi ku ku tiyisa. — Maheberu 10:24, 25.

“Nzi wa hi ni tingana nguvu ta ku tlhela nziya Salawini ya Mufumo. Nzi wa ti wutisa ku xana lava va nga hi vanghana va mina va ta nzi khomisa kuyini. A makabye munwe wa xisati loyi a nga hi kona Salawini ya Mufumo a siku lego — kwalomo ka 30 wa malembe ma hunzileko — i nzi byelile lezi, ‘Wuyani nwananga!’ A magezu lawo ma nzi khumbile nguvu mbilu. Nzi ti zwisile ku khwatsi nzi laha kaya.” — Javier.

“Nzi loya Salawini ya Mufumo nzi ya tshama ka bako yo gumesa kasi nzi nga woniwi hi munhu. Kanilezi, a votala va lo nzi wona va tlhela va nzi tiva hakuva a kale, na nza ha hi nwanana, nzi waya mitlhanganweni. Va lo nzi hoyozela hi matsenya va nzi wukarela hi liranzo laha ka kuza a mbilu ya mina yi tala hi kurula. Nzi ti zwisile ku khwatsi nzi lo wuya kaya.” — Marco.

XANA A MADOTA MA TA NZI VUNISA KUYINI?

A madota ma ta ku khoma hi liranzo. Ma ta ku dzunza nguvu hi lezi u xuvako ku vuxa “a liranzo la wena lo sangula.” (Kuvululelwa 2:4) Hi tipswalo, ma ta ku vuna a ku lulamisa a zihoxo lezi u zi mahileko. Ma ta maha lezo hi “moya wa kuolova.” (Va Le Galatia 6:1; Mavingu 28:13) A madota ma nga ha maha malulamiselo ya lezaku a wokari a ku fambisela xigonzo, kuzilava hi ku tirisa a bhuku Seja Feliz Para Sempre! kutani Achegue-se a Jeová. Tshama na u zi tiva lezaku a madota ma ta ku chavelela ma tlhela ma ku seketela ka zontlhe lezi u to maha kasi ku vuxeta a kuzwanana ka wena na Nungungulu. — Isaya 32:1, 2.

“Ka malembe wontlhe ya 8 lawa nzi nga holile hi tlhelo ga moya, a madota a ma tsikangi ku nzi vuna. Ka siku go kari, a dota go kari gi lo nzi komba a zithombe gi nga hi susile. A zithombe lezo zi nzi alakanyisile a zilo zo tala zo tsakisa laha ka kuza nzi sangula ku vilela a litsako leli nzi nga hi nalo a xikhati lexi nzi nga ha tirela Jehova. Hi liranzo, a madota ma nzi vunile a ku vuxeta a mitiro ya mina ya moya.” — Victor.

Jehovha i ta ku tiyisa

A bhuku ga hina ga tisumu gaku: “Yimbelela ka Jehovha hi kutsaka”, gi na ni tisimu to hlaya to khumba mbilu ta ku ti nga ku chavelela ni ku ku tiyisa laha u vhuxetelako ku maha mitiro ya wena ya moya. Hi cikombiso, wona a magezu ya lisimu numero 38. A lisimu leli li seketelwe ka magezu ma nga ka 1 Pedro 5:10, na li hi ni hloko ya mhaka yaku: “Jehovha i ta ku tiyisa.”

Nungungulu i ku tisele lisine;

I ku humesile munyameni.

Mbilwini ya wena u wa hi ni tora

Go hanya hi lisine la yena.

U ti nyikele mandleni yakwe;

I ta ku vhuna ntirweni wakwe.
Nungungulu i ku xavile hi nkhata

Wa N’wana wa yena wo randzeka.

Hi kota ya lezvo, u nga kanakani.

I ta ku nyika ntamu wa hombe.

A nge rivali ntiro wa wena,

A nga ta tsika ku ku hlayisa.

(KORU)

A wutomi ga wena gi lumba Jehovha.

I gi hakhelile hi nkhata wa Jesu

I ta ku vhunetela ni ku ku vhikela.

I ta ku tiyisa, a ku nyika ntamu.

Kasi ku ingisela a lisimu leli ni tinwani tisimu ta Mufumo ti yimbelelweko hi magezu ni tiviyola, nghena ka PUBLICAÇÕES > MÚSICAS.