CIGONDZO 2
Nungungulu i mahile wanuna wo sangula ni wasati wo sangula
Jehovha i no maha jardhim ka wutshamu go kari gi vitaniwako ku i Edheni. Ka jardhim leyo ku wa hi ni zvitsangi zvo tala, ni tisinya to tala, ni zvihari. Nungungulu i no gumesa a maha wanuna wo sangula hi ntshuri wa misava — ku nga Adhamu — a gumesa a mu pupuxela a moya wa wutomi lomu tinhovhini takwe. Wa zvi tiva a ku zvini zvi nga maheka hi kulandzela? A wanuna loye i no sangula ku hanya! Jehovha i no veka Adhamu lomu jardhim ya Edheni, a mu nyika ntiro wa ku hlayisa jardhim ni ku zvi chula mavito a zvihari zvontlhe.
Andzhako ka lezvo, Jehovha i no nyika Adhamu a nayo wa lisima. I no mu byela ku: ‘U ngaga a mihandzu ya tisinya tontlhe, kanilezvi u ngagi a mihandzu ya sinya yin’we basi yo hlawuleka. Loku uga mihandzu ya sinya leyo, u tafa’.
Hi ndzhako ka cikhati, Jehovha ite: ‘Ndza ha mu mahela a muvhuni Adhamu’. I no maha ku Adhamu a etlela wurongo ga hombe nguvhu, a gumesa a mu susa limbambu lin’we a mu mahela sati. A vito ga sati wakwe ku wa hi Evha. Adhamu na Evha va nova ngango wo sangula. U alakanya ku Adhamu i ti zwisile kuyini hi kuva ni sati? Adhamu i no tsaka nguvhu laha ka kuza aku: ‘Hi nga wona lezvi Jehovha a nga maha hi limbambu la mina! Ndzi wa nga wuli! Ndzi mahelwe munhu wo fana na mina’.
Jehovha i no byela Adhamu na Evha lezvaku va pswala vana va tata misava. I wa lava ku va tira zvin’we na va tsakile va cica misava yontlhe yiva paradhise, kutani jardhim yo saseka, a ku fana ni jardhim ya Edheni. Kanilezvi, lezvi Jehovha a nga zvi lava a zvi mahekangi. Hikuyini? Hi ta zvi tiva ka cigondzo ci landzelako.
“Loyi a va vangileko kusanguleni i no maha wanuna ni wasati”. — Matewu 19:4