8 wa vanhu va nga pona a Ndambi

Nowa, ni ngango wakwe zvin’we ni zvihari va no nghena lomu ka taru. Jehovha i no vhala livati, a vhula yi sangula kuna. Yi nona nguvhu laha ka kuza a taru gi sangula ku deluka. Hi magumo, a misava yontlhe yi no tala hi mati, kufa vanhu vontlhe va mahanyela yo biha va nga hi lahandle ka taru. Kanilezvi, Nowa ni ngango wakwe va wa hi lomu ndzeni ka taru niku a va fangi. Hikwalaho, va tsakile nguvhu hi lezvi va nga ingisa Jehovha.

A vhula yi no mbheta 40 wa masiku na yina wusiku ni mumu; yi guma yica. A mati ma no sangula kupswha hi kutsongwani-kutsongwani. Hi ku gumesa, a taru gi no ya nyima le hehla ka zvitsunga. Kanilezvi ku wa ha hi ni mati yo tala laha misaveni yontlhe, hikwalaho Nowa ni ngango wakwe a va tekelangi ku huma lomu ka taru.

Hi kutsongwani-kutsongwani, a misava yi no woma. Nowa ni ngango wakwe va tshamile lembe ni ku hundza lomu tarwini. Jehovha i no gumesa a va byela lezvaku va huma. A cikhati va nga huma, va ti zwile na va hi misaveni yiswa. Va wa mu bonga nguvhu Jehovha hi lezvi a nga va ponisa, va gumesa va zvi kombisa hi ku mu mahela muphahlo.

Jehovha i tsakile hi muphahlo wabye. I no va tsumbisa lezvaku a nga ta ha lovisa kambe misava hi ndambi. Kota cikombiso ca citsumbiso cakwe, i no humesa a wura go sangula ga nyazimi le tilweni. Wa tshuka u gi wona a wura ga nyazimi?

Jehovha i no tlhela a byela Nowa ni ngango wakwe lezvaku va pswala vana va tata misava.