Abrahama na Sara va ingisile Nungungulu

Kusuhani nguvhu ni Bhabheli ku wa hi ni dhoropa gi nga vitaniwa ku i Ure. A vanhu va kona va wa khozela vanungungulu vo tala. Va wa nga khozeli Jehovha. Kanilezvi kwale Ure ku wa hi ni wanuna a nga khozela Jehovha basi. A vito gakwe hi Abrahama.

Jehovha i no byela Abrahama, aku: ‘Suka laha kaya ka wena ni le maxakeni ya wena, uya ka tiko legi ndzi to ku komba’. Jehovha i no gumesa a mu tsumbisa lezvi: ‘U tava tiko ga hombe, niku ndzi ta katekisa vanhu vo tala laha misaveni hi kota ya wena’.

Abrahama i wa nga ku tivi lomu Jehovha a nga kari a mu ruma kuya kona, kanilezvi i no tsumba Jehovha. Hikwalaho, Abrahama ni sati wakwe Sara, ni papayi wakwe Tera, na Loti, a n’wana wa makabye wakwe, va no ingisa Jehovha va rwala zvilo zvabye va sangula lipfhumba la hombe.

Abrahama i wa hi ni 75 wa malembe a cikhati leci yena ni ngango wakwe va nga chikela tikweni legi Jehovha a nga lava ku va komba. A tiko lego gi wa vitaniwa ku i Khanani. Na a hi seyo, Nungungulu i no mu tsumbisa lezvi: ‘A tiko gontlhe legi u gi wonako, ndzi ta nyika vana va wena’. Kanilezvi Abrahama na Sara va wa kumbile niku va wa nga hi na n’wana. Xana Jehovha i wa ta ci tatisisa kuyini a citsumbiso cakwe?