Va tsikile ku ingisa Jehovha

Andzhako ka loku a vaIzrayeli va tshamile cikhati co kari lomu ciwuleni, Kora na Dhatani na Abhiramu, ni van’wani va 250, va no vhukela Mosi na Aroni. Va no va byela lezvi: ‘Hi karele hi n’wina vasa! Hikuyini wena Mosi u ti mahako hosi ya hina, Aroni a ti maha mupristi wa hombe? Jehovha i na hina hontlheni. A nga na wena na Aroni basi’. Lezvo a zvi mu tsakisangi Jehovha; i zvi wonile na vo vhukela yena!

Mosi i no byela Kora ni lava va nga mu seketela, aku: ‘A mandziko tanani laha tabhernakelini niku ngonani ni zvibya zva n’wina zva ku woka hi zvona ndzilo na zvi tele hi libani. Jehovha i ta hi komba loyi a mu hlawulileko’.

Hi mandziko wa kona, Kora ni 250 wa vavanuna va no ya tlhangana na Mosi laha tabhernakelini. Va no ya hisa libani a ku khwatsi hi loku va hi vapristi. Jehovha i no byela Mosi na Aroni, aku: ‘Ti hambaniseni na Kora ni vanhu vakwe’.

Kora i noya ka Mosi le tabhernakelini kanilezvi Dhatani, na Abhiramu ni maxaka yabye a va vhumelangi ku famba. Jehovha i no byela vaIzrayeli lezvaku va nga tshineli kusuhani ni matenda ya Kora na Dhatani na Abhiramu. A vaIzrayeli va no tekela ku suka va ya yima kule ni matenda yabye. Dhatani, na Abhiramu ni maxaka yabye va no yima le handle ka matenda yabye. Hi citshuketi, a misava yi no vhululeka, yi va mita vontlhe vaku bhi! Lomu tabhernakelini, ku nota ndzilo hi le tilweni wu ta hisa Kora ni vavanuna vakwe va 250.

Jehovha i no gumesa a byela Mosi, aku: ‘Teka nhonga ya murangeli mun’we ni mun’wani wa lixaka la Izrayeli, u tsala vito ga yena laha ka yona. Kanilezvi, laha ka nhonga ya lixaka la ka Levhi, tsala vito ga Aroni, u gumesa u ti veka lomu tabhernakelini. A nhonga ya loyi ndzi mu hlawulileko, yi ta huma zvitsangi’.

Ka siku gi nga landzela, Mosi i nota ni tinhonga tontlhe a ta komba varangeli. A nhonga ya Aroni yi wa hi ni zvitsangi, niku yi wa hi ni timendwa to buvha. Lezvo zvi wa komba lezvaku Jehovha i hlawulile Aroni kasi ava mupristi wa hombe.