Murangeli muswa ni vavasati vambiri va kutiya-hlanha

Joxuwa i rangele vanhu va Jehovha hi malembe yo tala a gumesa afa na a hi ni 110 wa malembe. Ka malembe wontlhe lawa a nga kari a hanya, a vaIzrayeli va wa khozela Jehovha. Kanilezvi andzhako ka loku a file, a vaIzrayeli va no sangula ku khozela zvifananiso, a ku fana ni lezvi va nga maha a vaKhanani. Kota lezvi a vaIzrayeli va nga kala va nga ha mu ingisi Jehovha, i no tsika a hosi ya Khanani ya ku hi Jabhina, yi va xanisa. A vaIzrayeli va no khongotela Jehovha lezvaku a va vhuna. Hikwalaho, Jehovha i no va nyika murangeli muswa. A vito gakwe hi Bharaki. Bharaki i wa ta vhuna vanhu lezvaku va tlhela ka Jehovha.

Jehovha i no ruma Dhebhora, a muphrofeti wa cisati, ka Bharaki kasi a ya mu byela lezvi: ‘Teka 10 000 wa vavanuna muya le cicongwaneni ca Kixoni u yalwa kona na Sisera a hosana ya masochwa ya Jabhina, u va hlula’. Bharaki a byela Dhebhora aku: ‘Ndzi ta famba loku u vhumela ku famba na mina’. Dhebhora aku: ‘Ndzi ta famba na wena. Kanilezvi, tiva lezvaku a hi wena u to daya Sisera. Jehovha i te Sisera i ta dawa hi wasati’.

Dhebhora i no famba na Bharaki ni masochwa yakwe le citsungeni ca Tabhora kasi ma ya ti longisela kulwa. A cikhati leci Sisera a nga zvizwa, i no tlhanganyisa tikareta takwe ta yimpi ni masochwa yakwe le nkoveni. Dhebhora a byela Bharaki, aku: ‘Hi nyamutlha Jehovha a to ku vhuna ku hlula’. Bharaki ni vavanuna vakwe va 10 000 va no relela hi le citsungeni va ya kumana ni masochwa ya ntamu ya Sisera.

Jehovha i no maha lezvaku a cicongwana ca Kixoni ci tala hi mati. A marodha ya tikareta ta Sisera ma no ti kelela lomu ka madhaka, ti tsandzeka ku famba. Sisera i no huma lomu ka kareta yakwe a tsutsuma. Bharaki ni masochwa yakwe va no hlula masochwa ya Sisera. Kanilezvi, Sisera i no pona a tsutsuma a ya fihlala ka tenda ga wasati wa ku hi Jayeli. Jayeli i no mu nyika leti anwa a tlhela a mu fenengeta kumba. A musochwa loye wa ntamu a nga karele, i no kuma wurongo a etlela. Makunu Jayeli i no xiyelela, a mu belela cikhongwani ca tenda laha hlokweni yakwe, afa.

Bharaki i no famba a lavetela Sisera. Jayeli i no huma hi lomu tendeni gakwe, aku: ‘Ngone seno. Hi loyi a wanuna loyi u mu lavako’. Bharaki i no nghena lomu tendeni a wona Sisera na a file. Bharaki na Dhebhora va no dhumisa Jehovha hi ku yimbelela lisimu hi kota ya lezvi a nga vhuna vaIzrayeli ku hlula valala vabye. A vaIzrayeli va no hanya hi kurula ndzeni ka 40 wa malembe ma nga landzela.