Rute na Nawomi

Ka cikhati co kari ku nga hi ni ndlala le Izrayeli, a wasati wo kari wa ku hi Nawomi i no rura a ya Mowabhi ni nuna wakwe ni vana vakwe va vambiri va vafana. Hi kufamba ka cikhati, a nuna wa Nawomi i nofa. A vafana vakwe va no chadha ni vasati va vaMowabhi, ku nga Rute na Orpa. Leci ci nga tsakisiko hi ku a vafana vakwe vonawu va no gumesa vafa.

A cikhati leci Nawomi a ngazwa lezvaku a ndlala le Izrayeli yi mbhelile, i no boha ku tlhela kaya. Rute na Orpa va no famba naye, kanilezvi na va hi lomu ndleleni, Nawomi i no va byela lezvi: ‘N’wina mu va hlayisile khwatsi a vana va mina mu tlhela mu ndzi hlayisa khwatsi na minawu. Ndzi lava ku mu tlhela mu chadha kambe. Tlhelani Mowabhi’. A vavasati lavo, vaku: ‘Hina ha ku randza! A hi lavi ku ku tsika’. Nawomi i no simama ku va kurumeta ku va tlhela. Hi kugumesa, Orpa i no tlhela, kanilezvi Rute a nga tlhelangi. Nawomi i no byela Rute, aku: ‘Orpa o tlhela ka vanhu vakwe ni ka vanungungulu vakwe. Tlhela naye, uya kaya ka mamani wa wena.’ Kanilezvi Rute i te: ‘Ndzi nga ta ku tsika. A vanhu va wena va tava vanhu va mina, ni Nungungulu wa wena i tava Nungungulu wa mina’. U alakanya ku Nawomi i ti zwisisile kuyini a cikhati leci Rute a nga mu byela lezvo?

Rute na Nawomi va chikele Izrayeli hi nguva ya ku sangula ku tshovela sevhadha. Ka siku go kari, Rute i noya a ya kutsula masin’wini ya wanuna wa ku hi Bhowazi, a nga hi n’wana wa Rahabhi. Bhowazi i nozwa lezvaku Rute muMowabhi a nga kombisile kutsumbeka ka Nawomi. I no byela zvitiri zvakwe lezvaku zvi siya timbewana titsongwani lomu masin’wini kasi Rute a ti kuma a cikhati a kutsulako.

Ni gambo ga kona, Nawomi i no wutisa Rute, aku: ‘U wa tira lomu masin’wini ya mani nyamutlha’? Rute aku: ‘Lomu masin’wini ya Bhowazi’. Nawomi aku: ‘Bhowazi i xaka ga nuna wa mina. Simama ku tira lomu masin’wini yakwe ni vanhanyana van’wani. U ta hlayiseka’.

Rute i no simama ku tira lomu masin’wini ya Bhowazi kala va mbheta ku tshovela. Bhowazi i no wona lezvaku Rute i wa tira hi zvigingi niku wasati wa munene nguvhu. Cikhatini leco, loku a wanuna afa na a nga se pswala vana, a sati wakwe i wa sala a chadha ni xaka gakwe. Hikwalaho, Bhowazi i no chadha na Rute, va pswala n’wana wa mufana va mu chula ku hi Obhedhi, loyi a ngava kokwani wa hosi Dhavhidha. A vanghana va Nawomi va no tsaka nguvhu, vaku: ‘Co sangula, Jehovha i ku nyikile Rute, loyi a ku hlayisako khwatsi. Makunu zvezvi u na ni zukulu! I wa dhumisiwe Jehovha’.