Hana a kombela n’wana ka Jehovha

A wanuna wo kari wa mu Izrayeli wa ku hi Elkana i wa hi ni vasati vambiri. A mun’we ku wa hi Hana a mun’wani ku wa hi Penina; hambulezvo, Elkana i wa randza nguvhu Hana. Lezvi Penina a nga hi ni vana vo tala, i wa tshama hi ku hleka Hana hi lezvi a nga kala a nga hi na n’wana. Lembe ni lembe, Elkana i wa teka ngango wakwe vaya Xilo kasi ku ya khozela. Ka khati go kari na va hi seyo, Elkana i no wona lezvaku a sati wakwe Hana, loyi a nga mu randza nguvhu, i wa swirekile nguvhu. A mu byela lezvi: ‘Hana kata, u nga rili. Mina ndzi wa wena, ndza ku randza’.

Hana i no gumesa a ya maha mukhongelo. A cikhati leci a nga kombela Jehovha lezvaku a mu vhuna, i wa nga zvi koti ni ku miyela ku rila. Hana i no tsumbisa, aku: ‘Jehovha, loku u ndzi nyika n’wana wa mufana, ndzi ta mu nyikela ka wena, a ku tirela wutomini gakwe gontlhe’.

Eli a mupristi wa hombe, i no wona Hana na a rila a tsikwila a se alakanya ku i no popiwa. Hana i no mu byela lezvi: ‘Ahihi hosi yanga, a ndzi popiwangi. Ndzova ni cikarato ca hombe nguvhu niku ndzo wulawula na Jehovha hi cikarato leco’. Eli i no pola lezvaku i wa phazamile, aku: ‘Ngha Nungungulu a ku nyika lezvi u zvi lavako’. A cikhati leci Hana a nga mbheta ku maha mukhongelo, i no pepa mbilwini yakwe a suka a ti fambela. Na ku nga se hundza lembe, Hana i no pswala n’wana wa mufana a mu chula ku hi Samuweli. Wa zvi kota ku alakanyela lezvi Hana a nga tsakisa zvona?

Hana a nga rivalangi lezvi a nga tsumbisile Jehovha. Zvalezvi a nga mu tsikisa ku an’wa Samuweli, i no famba naye le tabhernakelini kasi a ya tirela kona. I no ya byela Eli, aku: ‘Loyi i n’wana loyi ndzi nga kari ndzi kombela ka Jehovha. Ndza mu nyikela ka Jehovha masikwini wontlhe ya kuhanya kakwe’. Lembe ni lembe, Elkana na Hana va wa vhuxela Samuweli na va mu fambela ni cibhajana ciswa co kala mawoko. Hi ku vhuniwa hi Jehovha, Hana i no gumesa a pswala vafana van’wani va vanharu ni vanhanyana vambiri.