Citsumbiso ca Jefta

A vaIzrayeli va no tlhela va tsika Jehovha va sangula ku khozela vanungungulu va mawunwa. A cikhati leci a vaAmoni va nga dhumela vaIzrayeli valwa navo, a vanungungulu lavo va mawunwa a va mahangi nchumu kasi ku va vhuna. A vaIzrayeli va no xaniseka hi malembe yo tala. Hi kugumesa va no byela Jehovha, vaku: ‘Hi wonhile. Hi kombela u hi ponisa ka valala va hina’. A vaIzrayeli va no fayetela zvifananiso zvabye va tlhela va sangula ku khozela Jehovha. Jehovha i wa nga lavi ku va wona na va simama ku xaniseka.

Ku no hlawuliwa musochwa wo kari wa ntamu a vitaniwako ku hi Jefta lezvaku a rangela vanhu kasi va yalwa ni vaAmoni. Jefta i no byela Jehovha, aku: ‘Loku u hi vhuna ku hlula yimpini leyi, ndzi ku tsumbisa lezvaku loyi a to ranga a ndzi khinga a cikhati leci ndzi to wuya, ndzi ta mu nyikela ka wena’. Jehovha i nozwa a mukhongelo wa Jefta a tlhela a mu vhuna ku hlula yimpini.

A cikhati leci Jefta a nga wuya kaya, loyi a nga ranga hi yena a huma a mu khinga i nhanyana wakwe, yaloyi wa mun’we a nga hi naye. I humile na aba mutandanda a kina. Zvini lezvi Jefta a nga wa ta maha? I no alakanya citsumbiso cakwe, aku: ‘O n’wananga, u ndzi pandzile mbilu. Ndzi mahile citsumbiso ka Jehovha. Kasi ndzi maha lezvi ndzi nga mu tsumbisa, ndzi fanele ku ku rumela tabhernakelini le Xilo u ya tshama u tira seyo’. Kanilezvi a nhanyana wakwe i te: ‘Papayi, loku u mahile citsumbiso ka Jehovha, maha zvalezvi u nga mu tsumbisa. Ndzo kombela nchumu mun’we basi. Ndzi kombela ku u ndzi tsika ndziya zvitsungeni ndzi ya tshama seyo tihweti timbiri ni vanghana va mina va vanhanyana, ndzi ta gumesa ndzi famba’. A nhanyana wa Jefta, i noya tira le tabhernakelini hi kutsumbeka a wutomi gakwe gontlhe. Lembe ni lembe, a vanghana vakwe va waya le Xilo va ya mu vhuxela.