Jonatani i wa hi wanuna wo tiya hlanha ni wo tsumbeka

Jonatani, a n’wana loyi wa nhondzo wa Hosi Sawule, i wa hi musochwa wo tiya hlanha. Dhavhidha i wulile lezvaku Jonatani i wa tsutsuma a ku hundza gama niku i wa hi ni ntamu wa ku pala ni nghala. Ka siku go kari, Jonatani i no wona 20 wa masochwa ya vaFilistiya laha ka citsungana. I no byela loyi a nga khoma matlhari yakwe, aku: ‘Hi ta va dhumela ntsena loku Jehovha a hi nyika cikombiso. Loku a vaFilistiya va hi vitana, hi ta zvi tiva lezvaku hi fanele ku va dhumela.’ A vaFilistiya va no banguleka, vaku: ‘Ngonani hi talwa’! Hikwalaho, a vavanuna lavo va vambiri va no kandziha citsungana va ya hlasela a masochwa lawo ya vaFilistiya.

Kota lezvi Jonatani a nga hi n’wana wa nhondzo wa Sawule, hi yena a nga hi ni fanelo ya ku vhaleta Sawule kota hosi. Kanilezvi, Jonatani i wa zvi tiva lezvaku Jehovha i hlawulile Dhavhidha kasi a vhaleta Sawule kota hosi ya Izrayeli. Hambulezvo, a nga vangi ni ciluse hi Dhavhidha. Jonatani na Dhavhidha va nova vanghana va susa ndzi kandzihela. Va no tsumbisana ku va ta vhikelana va tlhela va vhunana. Jonatani i no nyika Dhavhidha a bhaji gakwe, ni cipadha, ni wura ni libhandi lakwe a kombisa lezvaku va wa hi vanghana.

A cikhati leci Dhavhidha a nga tsutsuma Sawule, Jonatani i noya a ya mu tiyisa, aku: ‘Tiya-hlanha uva ni ntamu. Jehovha i ku hlawulile lezvaku uva hosi. Hambu papayi wa zvi tiva lezvo’. Wenawu wa zvi lava kuva ni munghana wa munene wo fana na Jonatani?

Jonatani i no veka wutomi gakwe mhangweni makhati yo tala kasi ku vhuna munghana wakwe. Jonatani i wa zvi tiva lezvaku Hosi Sawule i wa lava ku daya Dhavhidha. Hikwalaho, i no byela papayi wakwe, aku: ‘U tava ni ciwonho loku u daya Dhavhidha; a nga wonhangi nchumu’. Sawule i no zangarela Jonatani. Andzhako ka malembe yo kari, Sawule na Jonatani va nofa yimpini hi siku gin’we.

Andzhako ka loku Jonatani a file, Dhavhidha i no lavetela Mefibhoxete, a n’wana wa Jonatani. A cikhati leci a nga mu kuma, i no mu byela lezvi: ‘Kota lezvi a papayi wa wena a nga hi munghana wa mina wa hombe, ndzi ta ku hlayisa wutomini ga wena gontlhe. U ta tshama ndlwini ya mina ya wuhosi u tlhela uga mezeni ya mina’. Dhavhidha a nga tshukangi a rivala munghana wakwe Jonatani.