Jehovha a kombisa ku i Nungungulu wa lisine

Le mufun’weni wa Izrayeli wa 10 wa tixaka ku fumile tihosi to tala to biha. Kanilezvi Ahabhi ive yin’we ya leti to biha nguvhu. I no chadha ni wasati wo biha a nga khozela Bhaali. A vito gakwe ku wa hi Jezebheli. Ahabhi na Jezebheli va no tata tiko hi wukhozeli ga Bhaali va tlhela va daya vaphrofeti va Jehovha. Zvini lezvi a nga maha Jehovha? I no ruma muphrofeti Elija ka Ahabhi kasi a ya mu byela mahungu yo kari.

Elija i no byela hosi Ahabhi lezvaku lomu Izrayeli ku nga ta hana vhula hi kota ya wubihi gakwe. Lomu tikweni ku no tshama ku nga mili timbewu hi malembe manharu ni kuhundza niku a vanhu va no xoka hi ndlala. Hi ndzhako ka cikhati, Jehovha i ruma Elija aya ka Ahabhi. Hosi Ahabhi i no byela Elija, aku: ‘Hi wena u hi vangelako zvikarato! Zvontlhe lezvi i nandzu wa wena’. Elija a hlamula, aku: ‘A hi mina ndzi nga vhalela vhula. Hi wena u nga yi vhalela hi ku khozela Bhaali. Hi ta maha zvokari kasi hi tiva loyi a nga Nungungulu wa lisine. Tlhanganisa vanhu ni vaphrofeti va Bhaali le Citsungeni ca Karmeli’.

A vanhu va no tlhangana le citsungeni. Elija aku: ‘Hlawulani loyi mu lavako ku mu tirela. Loku Jehovha a hi Nungungulu wa lisine, mu landzeleni. Loku ku hi Bhaali, landzelani yena. Hi ta maha lezvi: A vaphrofeti va Bhaali, lava va 450, va ta longisela munyikelo kasi ku nyika nungungulu wabye, va gumesa va mu vitana. Minawu ndzi ta longisela wa mina ndzi vitana Jehovha. Loyi a to hlamula hi ku rumela ndzilo, hi yena a nga Nungungulu wa lisine’. A vanhu va no vhumela.

A vaphrofeti va Bhaali va no longisela munyikelo. Va no vitana a nungungulu wabye kusukela ni mixo kala ni gambo, vaku: ‘O Bhaali, hi hlamule!’ Lezvi Bhaali a nga kala a nga hlamuli, Elija i no va hleka, aku: ‘Bangulekani nguvhu. Kuzvilava Bhaali i etlele, i lava ku vhuxiwa’! Gi noza gi pela a vaphrofeti va Bhaali na va ha vitana. Kanilezvi, a va zangi va hlamuliwa.

Elija i no teka munyikelo wakwe a wu veka laha alatini, a wu chetela mati ma tala, a gumesa a khongela, aku: ‘O Jehovha, ndza ku kombela, komba a vanhu lava lezvaku hi wena Nungungulu wa lisine’. Jehovha i no rumela ndzilo hi le tilweni hi cihatla, wu ta hisa munyikelo wontlhe. A vanhu va banguleka, vaku: ‘Jehovha i Nungungulu wa lisine’! Elija aku: ‘Mu nga tsiki vaphrofeti va Bhaali va pona’! Ka siku lego, ku no dawa 450 wa vaphrofeti va Bhaali.

A cikhati leci ku nga woneka refu gitsongwani le bimbini, Elija i no byela Ahabhi, aku: ‘Kuta cingulo ca hombe. Nghena lomu kareteni ya wena u famba kaya’. A tilo gi no sangula ku phuma hi marefu, kuba moya, ku sangula kuna vhula ya hombe. A cihala ci mbhela makunu. Ahabhi i no tsutsumisa a kareta yakwe hi laha a nga zvi kota hi kona. Elija i no tsutsuma nguvhu a siya ni kareta hi ku vhuniwa hi Jehovha! Kanilezvi, xana a zvikarato zvontlhe zva Elija zvi wa mbhelile? A hi zvi woneni.