Jehovha a tiyisa Elija

A cikhati leci Jezebheli a nga zvizwa lezvi a vaphrofeti va Bhaali va nga mahiwa, i no zangara nguvhu. I no rumela mahungu ka Elija, aku: ‘A mandziko, wenawu u tafa a ku fana ni vaphrofeti va Bhaali’. Elija i no chava nguvhu a tsutsuma aya ciwuleni. I no khongela, aku: ‘Jehovha, ndzi karele. I chukwana ndzifa basi’. Elija i no gumesa a etlela lahasi ka sinya, hi ku kala a nga ha gwenti.

Ku nota ngilozi yi ta mu vhuxa hi khwatsanyana, yiku: ‘Vhuka uga’. A cikhati leci a nga vhuka, i no wona pawa laha ka maribye yo hisa ni jaru ya mati. I noga, anwa a tlhela a etlela kambe. A ngilozi yi nota yi ta mu vhuxa kambe, yiku: ‘Gana, u fela ku kuma ntamu wa ku famba’. Hikwalaho, Elija i no vhuka aga kambe, a famba 40 wa masiku, wusiku ni mumu, kala a chikela Citsungeni ca Horebhe. Loku a chikele, i no nghena lomu mhakweni a etlela. Kanilezvi, Jehovha i no wulawula naye, aku: ‘Elija, zvini u mahako laha’? Elija aku: ‘A vaIzrayeli va tsikile ku maha lezvi va nga ku tsumbisa. Va khungumulile maalati ya wena va tlhela va daya vaphrofeti va wena. Zvezvi va lava ku daya na minawu’.

Jehovha aku: ‘Huma u ya yima laha citsungeni’. A kusangula, ku noba moya wa hombe wu hundza hi laha mhakweni. Hi kulandzela, ku no tsekatseka misava ku tlhela ku vhura ndzilo. Hi kugumesa, Elija i nozwa a gezu go rula, go zwalela hasi. Elija i no ti vhala nghohe hi bhaji a yima lahandle ka mhako. Jehovha i no mu wutisa ku hikuyini a nga tsutsuma. Elija aku: ‘Hi mina ndzoce ndzi seleko’. Kanilezvi, Jehovha i no mu byela lezvi: ‘A wu wece. Ku na ni 7000 wa vanhu lomu Izrayeli lava va ha ndzi khozelako. Famba u ya yimisa Elixa kota muphrofeti kasi a ku vhaleta’. Elija i no tekela ku famba a ya maha lezvi Jehovha a nga mu byela. U alakanya ku Jehovha i ta ku vhuna wenawu loku u maha lezvi a lavako ku u maha? Ina, i ta ku vhuna futsi. A hi wone zvokari zvi nga maheka a cikhati leci ku nga kala ku ngani vhula.