Jehovha a lwela Jehoxafati

Jehoxafati a hosi ya Judha, i no khungumula maalati ya Bhaali ni zvifananiso lomu tikweni gontlhe. I wa lava lezvaku a vanhu va tiva milayo ya Jehovha. Hikwalaho, i no ruma tihosana ni vaLevhi lezvaku va gondzisa milayo ya Jehovha lomu tikweni gontlhe ga Judha.

A matiko ma nga gamekene ni tiko ga Judha, ma wa chava ku va vhukela hakuva ma wa zvi tiva lezvaku Jehovha i wa hi zvin’we ni vanhu vakwe. A vanhu va matiko lawo va wa tlhela vata ni zvinyikiwo va ta nyika Jehoxafati. Kanilezvi a vaMowabhi, ni vaAmoni, ni van’wani vanhu va le tikweni ga Seyire va nota kasi ku talwa ni tiko ga Judha. Jehoxafati i wa zvi tiva lezvaku ku wa laveka ku Jehovha a mu vhuna. Hikwalaho, i no ramba vanhu vontlhe — a vavanuna, ni vavasati, ni vanana — lezvaku vata le Jerusalema. I no yima mahlweni kabye a maha mukhongelo, aku: ‘O Jehovha, ha zvi tiva ku loku u nga hi vhuni a hi nge hluli. Hi kombela ku u hi byela lezvi hi faneleko ku maha’.

Jehovha i no hlamula mukhongelo wakwe, aku: ‘U nga chavi. Ndzi ta mu vhuna. Nyimani muku tse, mu wona lezvi ndzi to mu ponisisa zvona’. Xana Jehovha i va ponisisile kuyini?

Ka mixo yi nga landzela, Jehoxafati i no hlawula vayimbeleli a va byela lezvaku va ranga le phambeni ka masochwa, va marxara. Va no marxara ku sukela Jerusalema kala ka wutshamu legi va nga wa talwa kona, gi vitaniwako ku i Tekowa.

Laha a vayimbeleli va nga kari va dhumisa Jehovha hi kutsaka hi gezu go tlakuka, Jehovha i wo lwela vanhu vakwe. I no maha lezvaku a vaAmoni ni vaMowabhi va jikelana, va sangula ku dayana hi ci vona niku a ku ponangi ne mun’we. Kanilezvi, Jehovha i vhikele vaJudha vontlhe, a masochwa ni vapristi. A vanhu va matiko wontlhe lawa ma nga gamekene ni Judha va no zvizwa lezvi Jehovha a nga zvi mahile va se tiva lezvaku Jehovha i wa ha vhikela vanhu vakwe. Xana Jehovha i va vhikelisa kuyini a vanhu vakwe? Hi tindlela to tala niku a nga lavi ku vhuniwa hi vanhu kasi a maha lezvo.