Butho ga Jehovha ga ntamu

Bhen-Hadhadhe, a hosi ya Siriya, i wa tshama hi ku dhumela vaIzrayeli. Kanilezvi, khati ni khati a nga lava ku va dhumela, muphrofeti Elixa i wa tlharihisa a hosi ya Izrayeli, hikwalaho yi wa nga dawi. Hikwalaho, Bhen-Hadhadhe i no zvi wona zvi hi chukwana ku khoma Elixa a famba naye. Bhen-Hadhadhe i no tiva lezvaku Elixa i le dhoropeni ga Dhotani. Hikwalaho, i no rumela masochwa ya Siriya kasi ma ya mu khoma.

A vaSiriya va no chikela Dhotani ni wusiku. Ni mixo ya kona, a nandza ga Elixa gi no huma lahandle gi wona lezvaku lomu matlhelweni ka dhoropa ku wa hi ni masochwa yo tala. Gi no chava nguvhu gi banguleka, giku: ‘Elixa hi ta kuyini’? Elixa aku: ‘Lava va nga na hina va tele a ku hundza lava va nga na vona’. Ka cikhati caleco, Jehovha i no vhulula matihlo ya nandza ga Elixa gi wona lezvaku a zvitsunga lezvi zvi nga hi lomu matlhelweni ya dhoropa, zvi wa tele hi mahaxi ni tikareta ta yimpi ti vhurako ndzilo.

A cikhati leci a masochwa ya Siriya ma nga zama ku khoma Elixa, i no khongela, aku: ‘Jehovha, ndza kombela, va vhale mahlo va nga woni’. Hi citshuketi, hambu lezvi a masochwa lawo ma nga kari ma wona, ma wa nga ha ku tivi lomu ma nga hi kona. Elixa i no byela masochwa lawo, aku: ‘Mu lahlekile, a hi gona dhoropa legi mu gi lavako. A hi fambeni ndzi mu heleketa ka wanuna loyi mu mu lavako’. Va no famba na Elixa kala le Samariya, lomu yi nga tshama kona a hosi ya Izrayeli.

A vaSiriya va no gumesa va ku tiva lomu va nga hi kona, kanilezvi va wa nga ha hi na ndlela. A hosi ya Izrayeli yi no wutisa Elixa, yiku: ‘Ndzi va daya ke?’ Xana Elixa i gi wonile gi hi lungelo ga ku va nyikela va dawa, kota lezvi va nga lava ku mu xanisa? Ahihi. Elixa i te: ‘U nga va dayi. Va nyike zvakuga, u gumesa u va tsika va famba’. Hikwalaho, a hosi yi no va mahela festa ya hombe, yi gumesa yi va tsika va tlhela kaya kabye.