Jehovha a ruma Jeremiya lezvaku a ya chumayela

Jehovha i hlawulile Jeremiya lezvaku ava muphrofeti wa vanhu va le Judha. I no mu ruma ku ya chumayela vanhu a tlhela a va byela lezvaku va fanele ku tsika ku maha zvilo zva kubiha. Jeremiya i no ti wona na a nga ringanelwi, a byela Jehovha, aku: ‘Jehovha, phela mina ndza hi cifanyana. A ndzi zvi tivi ku wulawula lomu ka vanhu’. Jehovha aku: ‘U nga chavi. Ndzi ta ku byela lezvi u faneleko ku wula. Ndzi ta ku vhuna’.

Jehovha i no byela Jeremiya lezvaku a tlhanganisa madhota ya Judha, a faya mbita ya wumba na ma zvi wona, a gumesa a ma byela lezvi: ‘Jerusalema gi ta fayiwa a ku fana ni mbita leyi’. A cikhati leci Jeremiya a nga maha lezvi Jehovha a nga wula, a madhota ma no kwata nguvhu. A mupristi wo kari wa ku hi Paxuri i noba Jeremiya a tlhela a mu boha mawoko ni minenge laha ka makhotso. Jeremiya i no tshama wusiku gontlhe ne na a nga zvi koti ku ti henya. Ni mixo ya kona, Paxuri i no mu tlhatlha. Jeremiya aku: ‘Ndzi karele hi kuxaniseka. I chukwana ndzi tsika ku chumayela’. I zvi tsikile futsi? Ahihi. Loku Jeremiya a tshamile a ehleketanyana kambe hi zvona, i no gumesa a wula lezvi: ‘A mahungu ya Jehovha ma fana ni ndzilo wu vhurako ndzeni ka mina. A ndzi zvi koti ku miyela ndzi nga chumayeli’. Jeremiya i no simama ku chumayela a tlharihisa vanhu.

Ku no hundza malembe, ku gumesa kuva ni hosi yiswa lomu Judha. A vapristi ni vaphrofeti va mawunwa va wa venga a mahungu ya Jeremiya. Va no byela tihosana, vaku: ‘A munhu loyi i fanele kufa’. Jeremiya aku: ‘Hambu loku mu ndzi daya, a ndzi na nandzu. Lezvi ndzi mu byelako zvita hi ka Jehovha, a hi zva mina’. A cikhati leci a tihosana ti ngazwa lezvo, ti no wula lezvi: ‘A munhu loyi a nga faneli kufa’.

Jeremiya i no simama ku chumayela niku a tihosana ti no zangara nguvhu. Ti no ya kombela hosi lezvaku Jeremiya a dawa. A hosi yi no va byela lezvaku va nga maha ni cihi va ci lavako hi Jeremiya. Ti no teka Jeremiya ti mu hoxela lomu ka hlowo yo eta, yi nga hi ni madhaka, na ti rindzela lezvaku i ta fela lomo. Jeremiya i no sangula ku phowomela lomu ka madhaka.

Makunu a wanuna wa ku hi Ebhed-Meleki, a nga tira lomu ndlwini ya wuhosi, i no byela hosi, aku: ‘A tihosana ti hoxele Jeremiya lomu hloweni! Loku hi nga mu humesi, i tafa’. A hosi yi no ruma Ebhed-Meleki lezvaku a teka 30 wa vavanuna a famba navo va ya humesa Jeremiya lomu hloweni. A hi chukwana hinawu hi fana na Jeremiya, hi nga tsiki nchumu wu hi tsandzekisa ku chumayela?