Dhaniyeli lomu nkeleni wa tinghala

A hosi yin’wani yi fumileko le Bhabhuloni kuve Dhariyusi a muMedhi. Dhariyusi i no wona lezvaku Dhaniyeli i wa hi ni wutlhari ku hundza van’wani. Hikwalaho, i no mu hlawula lezvaku ava murangeli wa vavanuna va lisima nguvhu va tiko. A vavanuna lavo va wa hi ni ciluse hi Dhaniyeli niku va wa nga ha lavi ni ku mu wona. Va wa zvi tiva ku Dhaniyeli i khongela makhati manharu siku ni siku. Hikwalaho, va no byela Dhariyusi, vaku: ‘Hosi, ku fanele ku vekiwa nayo wu wulako lezvaku vontlhe va fanele ku khongela ka wena basi. Ni wihi a to kala ku ingisa nayo lowu, i fanele ku hoxiwa lomu nkeleni wa tinghala’. Dhariyusi i no vhumela mawonela lawo, a gumesa a sinara nayo lowo.

A cikhati leci Dhaniyeli a ngazwa nayo lowo wa wuswa, i no tekela kuya kaya. I noya khizama laha janeleni gakwe gi nga vhulilwe, a khongela ka Jehovha. A vavanuna lavo va ciluse va no nghena lomu ndlwini yakwe va mu kuma na a khongela. Va no tsutsuma va ya byela Dhariyusi, vaku: ‘Dhaniyeli a nga ku ingisi. I khongela ka Nungungulu wakwe makhati manharu siku ni siku’. Dhariyusi i wa mu randza Dhaniyeli niku i wa nga lavi ku a dawa. I no tshama siku gontlhe na a zama ku lavetela ndlela yo ponisa Dhaniyeli. Kanilezvi hambu yena kota hosi i wa nga hi na fanelo ya ku cica nayo a wu sinarileko. I wa fanele ku ruma vavanuna vakwe lezvaku va hoxa Dhaniyeli lomu nkeleni wa tinghala to leva.

Ni wusiku ga kona, Dhariyusi i no karateka hi kota ya Dhaniyeli laha ka kuza a nga kumi ni wurongo. Ni mixo, i no tsutsuma aya nkeleni a ya vitana Dhaniyeli aku: ‘Dhaniyeli, a Nungungulu wa wena i ku ponisile’?

Dhariyusi i nozwa gezu go kari. Ku wa hi Dhaniyeli! I no hlamula Dhariyusi, aku: ‘A ngilozi ya Jehovha yi vhalile minomu ya tinghala. Ne a ti ndzi bayisangi’. Dhariyusi i no tsaka nguvhu! I no laya lezvaku va humesa Dhaniyeli lomu nkeleni. Dhaniyeli i wa nga kwarambutiwangi. A hosi yi no gumesa yi ruma vanhu, yiku: ‘A vavanuna lava va nga lumbeta Dhaniyeli va hoxeni lomu nkeleni wa tinghala’. A cikhati leci a vavanuna lavo va nga hoxiwa lomu nkeleni, a tinghala ti no va khadamula.

Dhariyusi i no rumela nayo lowu ka vanhu vakwe, aku: ‘A vanhu vontlhe va fanele ku chava a Nungungulu wa Dhaniyeli. I ponisile Dhaniyeli lomu ka tinghala’.

Wa khongela ka Jehovha siku ni siku a ku fana na Dhaniyeli?