Esteri a ponisa vanhu vakwe

Esteri i wa hi nhanyana wa muJudha a nga hanya dhoropeni ga Xuxani, le Persia. Ku wa hundza malembe yo tala a maxaka yakwe na ma khomilwe hi Nebhukadnezare le Jerusalema. Esteri i wa wundlilwe hi tio wakwe Mordhekayi, loyi a nga hi mutiri wa Ahasuwerusi, a hosi ya Persia.

Hosi Ahasuwerusi i wa lava muzindza wa muswa. A vatiri vakwe va no hlawula vavasati vo saseka nguvhu va lomu tikweni va famba navo kakwe — a ku patsa na Esteri. Ka vavasati vontlhe lavo, a hosi yi no langa Esteri kasi a maha muzindza. Mordhekayi i no byela Esteri lezvaku a nga wuli ku muJudha.

Ku wa hi ni wanuna wo kari wa matshandza wa ku hi Hamani, loyi a nga rangela tihosana tontlhe. I wa lava lezvaku vontlhe va mu khizamela. Mordhekayi i wa ala ku mu khizamela. Hikwalaho, Hamani i no zangara nguvhu laha ka kuza a lava ku mu daya. A cikhati leci Hamani a nga tiva lezvaku Mordhekayi muJudha, i no maha makungo ya ku daya vaJudha vontlhe va nga hi tikweni legiyani. I no byela hosi, aku: ‘A vaJudha zvigevenga; va fanele ku lovisiwa’. Ahasuwerusi aku: ‘Maha ni cihi u ci wonako’. I no tlhela a mu nyika ni ntamu wa ku yimisa nayo. Hamani i no yimisa nayo wu nga kari wu byela vanhu lezvaku va daya vaJudha vontlhe hi siku ga 13 ka hweti ya Adhare. Jehovha i wa zvi wona.

Esteri i wa nga tivi nchumu. Hikwalaho, Mordhekayi i no mu rumelela kopiya ya nayo lowo a tlhela a mu byela lezvi: ‘Famba u ya wulawula ni hosi’. Esteri aku: ‘Wa zvi tiva ku ni wihi a yako ka hosi na a nga vitaniwangi i ta dawa. Ku hundza 30 wa masiku a hosi na yi nga se ndzi vitana. Kanilezvi, ndzi ta famba. Loku yi ndzi tlakusela nhonga ya wuhosi, ndzi nga ta dawa. Loku yi nga ndzi tlakuseli, ndzi file’.

Esteri i noya ndlwini ya wuhosi. A cikhati leci a hosi yi nga mu wona, yi no tlakusa nhonga ya wuhosi. Esteri i no tshinela kusuhani; a hosi yi mu wutisa lezvi: ‘Esteri, u lava ku ndzi ku mahela yini’? Yena aku: ‘Ndzi lava ku wena na Hamani muta ka festa ndzi lavako ku mu mahela nyamutlha’. Loku va yile ka festa leyo, Esteri i no va ramba lezvaku va wuya ka festa yin’wani kambe ya wumbiri. Ka festa ya wumbiri, a hosi yi no phinda yi wutisa Esteri, yiku: ‘U lava ku ndzi ku mahela yini’? I no hlamula aku: ‘Ku na ni munhu a lavako ku daya mina ni vanhu va tiko ga mina. Hi kombela ku u hi ponisa’. A hosi yi no mu wutisa, yiku: ‘Himani a lavako ku mu daya’? Esteri aku: ‘Hi Hamani, a wanuna loyi wa kubiha’. Ahasuwerusi i no kwata nguvhu laha ka kuza a rumisa ku Hamani a tekela ku dawa.

Kanilezvi, ku wa nga hi na munhu a nga hi ni ntamu wa ku vhinya nayo wa Hamani lezvaku wu nga ha tiri, hambu hosi yi wa nga hi na fanelo leyo. Hikwalaho, a hosi yi no yimisa Mordhekayi lezvaku a rangela tihosana tontlhe yi tlhela yi mu nyika ntamu wa ku yimisa nayo wuswa. Mordhekayi i no yimisa nayo wa lezvaku a vaJudha va ti lwela loku va vhukelwa. Hi siku ga 13 ka hweti ya Adhare, a vaJudha va no hlula valala vabye. Kusukela kwalaho, a vaJudha va no sangula ku maha festa lembe ni lembe hi siku lego.