Mimuro ya Jerusalema

Masikwini ya Ezra, ku wa hi ni muIzrayeli wa ku hi Nehemiya a nga hanya le Persia, dhoropeni ga Xuxani, loyi a nga hi citiri ca hosi Artaxerxesi. A makabye wa Nehemiya i no mu endzela a ya mu byela mahungu yo kala ku tsakisa, aku: ‘A vanhu lava va nga tlhela Jerusalema va le mhangweni. A mimuro ni tivati ta dhoropa leti a vaBhabhuloni va nga hohlola a zvi se aketwa’. Nehemiya i no bayiseka. I wa zvi lava nguvhu a kuya Jerusalema kasi a ya va vhuna, hikwalaho, i no khongela kasi a hosi yi mu vhumelela ku a famba.

Ka siku go kari, a hosi yi no wona lezvaku Nehemiya a nga tsakangi. Yiku: ‘A ndzi se ku wonisa lezvi! Zvini’? Nehemiya aku: ‘A ndzi nge xalali kuveni Jerusalema a dhoropa ga hina gi hohlokile’. A hosi yi no mu wutisa, yiku: ‘U lava ku ndzi ku mahela yini’? Nehemiya i no tekela ku khongela hi le mbilwini, a gumesa aku: ‘Ndzi kombela ku u ndzi tsika ndziya Jerusalema ndzi ya aketa mimuro ya gona’. Hosi Artaxerxesi i no chusa Nehemiya lezvaku a famba, a tlhela a maha zvontlhe zvi nga laveka kasi a famba khwatsi kala a chikela. I no tlhela a mu yimisa kota govhernadhori wa Judha, a mu nyika ni mapulangu kasi a maha hi wona tivati ta dhoropa.

Loku Nehemiya a chikele le Jerusalema, i no hlola mimuro ya kona. Hi kulandzela, i no tlhanganisa vapristi ni tihosana a va byela lezvi: ‘Lezvi zva tshisa. Hi fanele ku suka hi tira’. A vanhu va no vhumela, va sangula ku aketa mimuro.

Kanilezvi, a vanhu vo kari va nga zonda vaIzrayeli va no sangula ku va hleka, vaku: ‘A muro lowo mu akako hambu linghowo li nga wu nikinya wuwa’. Lava va nga kari va aka, a va chelangi kota hi ciruko leco, va no simama ku aka. A mimuro yi waya yi tlakuka ni kutiya.

A valala vabye va no boha kuta hi ka matlhelo yo hambanahambana va ta dhumela Jerusalema na va nga zvi rindzelangi. A cikhati leci a vaJudha va nga zvizwa, va no chava. Kanilezvi, Nehemiya i no va byela lezvi: ‘Mu nga chavi. Jehovha i na hina’. I no yimisa vagadhi lezvaku va vhikela vatiri. Hikwalaho, a valala a va zvi kotangi ku va dhumela.

Va no mbheta ku aka mimuro yontlhe ni tivati ta yona hi 52 wa masiku basi. Nehemiya i no vitanisa vaLevhi vontlhe le Jerusalema lezvaku va ta maha festa ya kukangula. I no va veka hi mitlawa yimbiri kasi va yimbelela. Va no kandziha hi zvikadha zva Nyangwa ya Cibuka, a ntlawa wun’we wu famba hi seno, lowu wun’wani wu famba hi tlhelo legi gin’wani, va rendzelekela dhoropa. Va noba mimpundzu, tingomana ni zvitende va yimbelela ka Jehovha. Ezra i no famba ni ntlawa mun’we, Nehemiya a famba ni lowu wun’wani kala va ya kumana le tempeleni. A vanhu vontlhe — a vavanuna, vavasati ni vanana — va no maha miphahlo ka Jehovha va tsaka. A magezu yabye ya kutsaka ma wa zwala kule.