Elizabheti a pswala n’wana

Ku wa hundza a 400 wa malembe a mimuro ya dhoropa ga Jerusalema na yi aketilwe. Kusuhani ni dhoropa lego, ku wa hanya a mupristi wa ku hi Zakariya ni sati wakwe Elizabheti. Ku wa hundza malembe yo tala na va chadhile; kanilezvi, va wa nga hi na n’wana. Ka siku go kari, Zakariya na a hisa libani lomu wutshan’wini go basa ga tempeli, ngilozi Gabriyeli i no woneka kakwe. Zakariya i no chava. Kanilezvi, Gabriyeli ite: ‘U nga chavi. Jehovha i ndzi rumile ku ta ku byela mahungu ya manene. A sati wa wena Elizabheti i ta pswala n’wana wa mufana, a vito gakwe i tava Johani. Jehovha i hlawulile Johani lezvaku a maha ntiro wo hlawuleka’. Zakariya i no mu wutisa lezvi: ‘Ndzi nga zvi kholwisa kuyini zvezvo? Phela mina ni sati wa mina hi kumbile nguvhu. A zvi nge koteki a ku hi pswala n’wana’. Gabriyeli aku: ‘Ndzi rumilwe hi Nungungulu kasi ndzi ta ku byela mahungu lawa. Lezvi u nga kala ku kholwa, u nga ta ha wulawula kala a n’wana loye a pswaliwa’.

Zakariya i no hlwela nguvhu lomu wutshan’wini go basa a ku hundza masiku man’wani. Hikwalaho, a cikhati leci a nga huma, lava va nga kari va rindzela lahandle va wa lava ku tiva ku zvini zvi nga humelela. Zakariya i wa nga ha zvi koti ku wulawula. I wo kota ku wulawula hi mawoko basi. A vanhu va no tekela ku zvi tiva ku i byelilwe mahungu ma ngata hi ka Nungungulu.

Hi kufamba ka cikhati, ku no maheka zvalezvi a ngilozi yi nga zvi wula futsi, Elizabheti i no xura nyimba a pswala n’wana wa mufana. A vanghana ni maxaka yakwe va nota va ta wona n’wana loye. Va no tsaka hi lezvi a nga pswala n’wana. Elizabheti i no va byela lezvi: ‘I ta chuliwa ku hi Johani’. Vona vaku: ‘A wu na xaka ne gin’we gi nga ni vito lego! Mu chuleni vito ga papayi wakwe, muku hi Zakariya’. Kanilezvi, Zakariya i no tsala aku: ‘A vito gakwe hi Johani.’ Ka cikhati caleco, Zakariya i no tlhela a sangula ku wulawula! A mahungu ya n’wanana loye ma no hangalaka Judhiya. A vanhu va no hlamala, vaku: ‘A n’wanana loyi i tava munhu wo tshamisa kuyini?’

Hi kulandzela, Zakariya i no tala hi moya wa ku basa. I no phrofeta aku: ‘A ku dhumisiwe Jehovha. I tsumbisile Abrahama lezvaku i ta rumela muhanyisi, ku nga Mesiya, lezvaku a ta hi tlhatlhisa. Johani i tava muphrofeti niku i ta longisela ndlela kasi kuta Mesiya’.

A xaka ga Elizabheti ga ku hi Mariya gonawu gi no humelelwa hi zvilo zvo hlamalisa. Hi ta zvi wona ka cipimo ci landzelako.