Jehovha i vhikele Jesu

Le mutsuwuka-gambo wa Izrayeli, ku wa hi ni vanhu va nga kari va kholwa lezvaku a tinyeleti ti nga va komba ndlela. Ka wusiku go kari, a vavanuna vo kari va le Mutsuwuka-gambo va no wona nchumu wo fana ni nyeleti na wu famba le tilweni va wu landzela. A nchumu lowo wo khwatsi i nyeleti wu no va yisa le Jerusalema. A vavanuna lavo va no wutisela, vaku: ‘I kwihi a n’wanana loyi a to maha hosi ya vaJudha? Hita hi ta mu khizamela’.

A cikhati leci Herodhi, a hosi ya Jerusalema, a ngazwa vanhu na va wulawula hi hosi ya yiswa, i no karateka nguvhu. I no wutisa vapristi lava va tihosana, aku: ‘Ku wulilwe lezvaku a hosi leyo yi ta pswaliwa kwihi’? Vaku: ‘A vaphrofeti va wulile lezvaku yi ta pswalelwa Bhetlehema’. Hikwalaho, Herodhi i no vitana a vavanuna lavo va le Mutsuwuka-gambo a ta va byela lezvi: ‘Fambani Bhetlehema mu ya lavetela a n’wanana loye. Loku mu mu kuma, wuyani mu ta ndzi byela a ku i kwihi ka kona, minawu ndzi lava ku ya mu khizamela’. Kanilezvi i wo hemba.

A nchumu lowo wo khwatsi i nyeleti wu no sangula ku famba kambe. A vavanuna lavo, va no wu landzela kala Bhetlehema. A nchumu lowo wo khwatsi i nyeleti wu no ya nyima hehla ka yindlu yo kari, a vavanuna lavo va no nghena — va kuma Jesu ni mamani wakwe Mariya. Va no mu khizamela, va gumesa va mu nyika ouro, ni hlakati yo nuhela, ni mira. Ku wa hi Jehovha futsi a nga rumele a vavanuna lava vaya ka Jesu ke? Ahihi.

Ka wusiku galego, Jehovha i no byela Josefa lomu ka noro, aku: ‘Herodhi i lava ku daya Jesu. Teka sati wa wena ni n’wanana mu tsutsuma mu ya Gibhite. Fambani mu ya tshama seyo kala ndzi mu byela ku ku rulile hi kona mu to wuya’. Josefa ni sati wakwe ni n’wanana va no tekela kuya Gibhite.

Jehovha i wa byelile a vavanuna va le Mutsuwuka-gambo lezvaku va nga ha tlheli ka Herodhi. A cikhati leci Herodhi a nga zvi wona ku va nga ta ha wuya hi kona, i no zangara nguvhu. Lezvi a nga kala a nga mu kumi Jesu, i no laya lezvaku ku dawa zvifanyana zvontlhe zva tanga ya Jesu le Bhetlehema. Kanilezvi, Jesu i wa no ge, kwale Gibhite ka kule a nga hi kona.

Hi kufamba ka cikhati, Herodhi i nofa. Jehovha i no byela Josefa, aku: ‘Zvezvi ku rulile. Mu nga tlhela makunu’. Josefa, na Mariya, na Jesu va no tlhela Jerusalema, va ya aka muti wabye dhoropeni ga Nazareta.