A vapizani va Jesu va amukela a moya wo basa

Andzhako ka 10 wa masiku Jesu na a tlhelile tilweni, a vapizani vakwe va no amukela moya wo basa. Ku wa hi Pentekosta ya 33 Nguveni ya Hina, niku a vanhu va ngata hi ka matshamu yo hambanahambana va wa tlhangene le Jerusalema kasi va maha festa. Lomu ka yindlu yo kari ya le hehla, ku wa hi ni 120 wa vapizani va Jesu va nga tlhangene. Ku no maheka nchumu wo hlamalisa hi citshuketi. Laha hehla ka tihloko ta vapizani va Jesu ku no woneka nchumu wo fana ni langavi, vontlhe va sangula ku wulawula tirimi to hambanahambana. A guwa ga hombe go fana ni ga moya wa hombe gi no tata yindlu.

Lava va nga tile Jerusalema hi ka matiko man’wani va nozwa guwa lego, va tsutsuma vaya lomu ndlwini kasi va ya wona lezvi zvi nga kari zvi humelela. Va no hlamala nguvhu a cikhati leci va ngazwa vapizani va Jesu na va wulawula tirimi to hambanahambana. Va te: ‘Phela lava vata hi Galileya. Makunu va zvi kotisa kuyini ku wulawula tirimi ta hina’?

Pedro ni vapostoli van’wani va no yima phambeni ka citshungu. Pedro a tlhamusela vanhu lezvi Jesu a nga dayisiwa zvona ni lezvaku Jehovha i mu vhuxile hi ka vafileko. A tlhela aku: ‘Zvezvi Jesu i le tilweni laha tlhelweni ga cinene ga Nungungulu. Makunu i chululile a moya wo basa lowu a nga wu tsumbisa. Hi wona wu mahako lezvaku mu wona mu tlhela muzwa zvihlamaliso lezvi’.

A vanhu va no khumbeka nguvhu hi lezvi Pedro a nga wula, va mu wutisa lezvi: “Hi maha yini?” I no va byela lezvi: ‘Ti soleni, ka zviwonho wa n’wina, mu bhabhatiswa vitweni ga Jesu. Mu ta amukela a cinyikiwo ca moya wo basa’. Ka siku lego, ku no bhabhatisiwa 3000 wa vanhu. Kusukela kwalaho, a vapizani va Jesu le Jerusalema va no sangula ku engetela va tala nguvhu hi kuhatlisa. A vapostoli va no wumba mabandla yo tala hi ku vhuniwa hi moya wo basa, kasi va va gondzisa kona a vapizani lavo zvontlhe lezvi Jesu a nga va rumile.