CIGONDZO 6

Tirisa mitsalo hi ndlela yi faneleko

Johani 10:33-36

LEZVI U FANELEKO KU MAHA: U nga leri mutsalo basi u gumesa u hundza uya ka mhaka yi landzelako. Ti karate kala lava u bhulako navo va zvi wona zviku dlunya lezvi a mutsalo lowu u nga gondza wu yelanisako zvona ni mhaka leyi u wulawulako hi yona.

U TA ZVI MAHISA KUYINI?

Hlawula magezu lawa ma seketelako a mhaka ya wena. Andzhako ka ku lera a mutsalo, dlunyatisa a magezu lawa ma bako a hloko ya mhaka leyi u wulawulako hi yona. U nga maha lezvo hi ku phinda a magezu lawo kutani ku wutisa ciwutiso ci vhululako a maalakanyo ya lava u bhulako navo lezvaku va pola a magezu lawa ma seketelako a mhaka ya wena.

Loku u tirisa a magezu yo hambana ni lawa ma nga ka vhesi kasi ku phinda lezvi a mutsalo wu wulako, ti karatele ku lava u bhulako navo va simama ku zvi wona zviku dlunya lezvi a magezu ya Bhibhiliya ma zwananisako zvona ni mhaka-tshinya leyi u wulawulako hi yona.
Dlunyatisa a mhaka ya wena. Loku u sangulile hi ku wula zviku dlunya leci ci ku mahako u lera a mutsalo lowo, tlhamusela lezvi a magezu-tshinya ya mutsalo lowo ma ci seketelisako zvona a cigelo leco.

A cikhati leci u tlhamuselako a mutsalo, u nga vhali a Bhibhiliya ga wena. Lezvo zvi vhuna lava u bhulako navo a ku zwananisa a magezu ya wena ni vhesi legi wa ha mbhetako ku lera.
Wula ntsena lezvi zvi lavekako. U nga tlhamuseli timhaka to tala ti nga seketeliko a mhaka-tshinya. Makunu na u ti seketela ka lezvi lava u bhulako navo va sinako va zvi tiva xungetano hi mhaka leyo, tiva ku mahungu mangani ma lavekako kasi ku dlunyatisa a mhaka leyi u gondzisako.