CIGONDZO 14

Dlunyatisa timhaka-tshinya

Mahebheru 8:1

LEZVI U FANELEKO KU MAHA: Vhuna lava u bhulako navo lezvaku va longoloka na wena ka kanelo yontlhe, u tlhela u dlunyatisa lezvi a mhaka-tshinya yin’we ni yin’wani yi yelanisako zvona ni kungo ga wena zvin’we ni mhaka yontlhe (tema).

U TA ZVI MAHISA KUYINI?

U fanele kuva ni kungo ka kanelo ya wena. Zama ku pola lezvaku a kungo ga kanelo ya wena ku andlala mhaka, ku kholwisa kutani ku kuca lava u bhulako navo ke. Loku u tivile lezvo, tlhamusela mhaka ya wena hi kuyelana ni kungo lego. Ti karatele ku a mhaka-tshinya yin’we ni yin’wani yi ku vhuna ku tatisa a kungo ga wena.

Ti wutise lezvi: ‘Zviwutiso muni lezvi lava ndzi bhulako navo va nga nazvo kutani ku zvini zvi va karatelako ku zvi vhumela ka mhaka leyi? Zvini zvi va mahako va ti wutisa zviwutiso lezvo niku va ti wutisisa kuyini?’ Hi kulandzela, xaxameta timhaka-tshinya ta wena hi ndlela ya ku lava u bhulako navo va zvi kota ku longoloka na wena, va zvi zwisisa, va tlhela va vhumela a mhaka leyo.
Khanyisa a mhaka yontlhe (tema) ya kanelo ya wena. Kusukela kusanguleni, tana na u kumbuka a mhaka yontlhe (tema) ya kanelo ya wena hi ku phinda a magezu-tshinya ya yona, kutani hi ku tirisa magezu ma wulako zvalezvi zva zvin’we.
Dlunyatisa timhaka-tshinya u tlhela u ti olovisa. Hlawula ntsena a timhaka-tshinya ti yelanako ni mhaka yontlhe (tema) leti u to ti gondzisa khwatsi hi cikhati leci u pimelweko. U nga tati timhaka-tshinya, wula mhaka-tshinya yin’we ni yin’wani yi dlunyateka, koka moya na u nga se hundza uya ka yin’wani, u tlhela u tlhavinyeta khwatsi a mhaka-tshinya leyi wa ha ku wulawulako hi yona ni leyi yi to landzela.

U nga xaxameta timhaka-tshinya kusanguleni ka kanelo ya wena kasi u vhuna lava u bhulako navo lezvaku va longoloka na wena, kutani ku ti xaxameta a cikhati leci u mbhetiselako kanelo ya wena kasi u vhuna lava u bhulako navo lezvaku va ti alakanya.