CIGONDZO 48

Hlawula khwatsi a vanghana va wena

Ka bhuku go gandliwa

A vanghana va hi vhuna kutsaka ka zvikhati zva zvinene, niku va hi tiyisa ka zvikhati zva zvikarato. Kanilezvi, a Bhibhiliya ga hi tlharihisa giku a hi vontlhe vanhu va nga vanghana va vanene. Makunu hi nga va tivisa kuyini a vanghana va vanene? Ehleketa hi zviwutiso zvi landzelako.

1. A vanghana va wena va ku khumbisa kuyini?

Loku hi tolovela ku mbheta a cikhati co tala na hi hlakana ni vanhu va tshamela go kari, kani hi nghohe ni nghohe kutani hi internet, hi nga sangula ku pimanyisa a mahanyela yabye. Kota lezvi a Bhibhiliya gi wulako, “loyi a fambako ni munhu wo tlhariha i ta tlharihawu, kanilezvi loyi a hlakanako ni cipumbu [ku nga ni wihi loyi a kalako a nga mu randzi Jehovha] zvi nga ta mu fambela khwatsi.” (Mavingu 13:20) A vanghana lava va randzako Jehovha ni ku mu khozela va nga hi vhuna a kuva ni wunghana ga hombe naye hi tlhela hi maha zviboho zva zvinene. Kanilezvi, a ku maha wunghana ni vanhu va kalako va nga mu randzi Jehovha, zvi nga wonha a wunghana ga hina na Jehovha. Hikwalaho, a Bhibhiliya gi hi kuca ku hlawula khwatsi vanghana va hina! Loku a vanghana va hina va hi vanhu va randzako Nungungulu, ku vhuneka hina na vona hakuva hi ta zvi kota “ku tiyisana ni ku akana”. — 1 Va Le Tesalonika 5:11.

2. Jehovha i ti zwisa kuyini hi lezvi u hlawulisako zvona vanghana?

Jehovha i hlawula khwatsi vanghana vakwe. Yena “munghana wa hombe wa lava va lulamileko”. (Mavingu 3:32) Makunu Jehovha i wa ta ti zwisa kuyini loku a ho hlawula vanghana va kalako va nga mu randzi? I wa nga ta tsaka! (Lera Jakobe 4:4.) Kanilezvi loku hi potsa a vanghana vo biha, hi maha wunghana na Jehovha zvin’we ni vanhu lava a va randzako, yena i ta tsaka a tlhela a hi hlawula kota vanghana vakwe. — Lisimu 15:1-4.

GONDZA ZVI ETA

Wona ku hikuyini zvi nga zva lisima a ku hlawula vanghana va vanene u tlhela u wona lezvi u nga chatisako zvona a vanghana lava va to ku vhuna wutomini ga wena.

3. Ti wonele ku hlawula vanghana vo biha

A vanhu lava va kalako va nga mu randzi Jehovha ni milayo yakwe a hi vanghana va vanene. Bisani VHIDHIO, mu gumesa mu bhula hi ciwutiso ci landzelako.

VHIDHIO: Gondza ku ala ku tolovelana ni vakubiha (6:17)

Hi nga sangulisa kuyini a ku maha wunghana ni vanhu vo biha na hi nga zvi poli?

Lerani 1 Va Le Korinte 15:33, mu gumesa mu bhula hi zviwutiso lezvi:

Vanhu vo tshamisa kuyini va nga vako vanghana vo biha ka wena? Hikuyini?

Lerani Lisimu 119:63, mu gumesa mu bhula hi ciwutiso leci:

Cini ci to ku vhuna a ku tiva munghana wa munene?

Tijela ya masã. A sã legi gi hinileko gi vitanisa tinhongani gi tlhela gi sangula ku hinisa lawa man’wani. — Loku a handzu wun’we wu hinile, wu nga hinisa yontlhe. A munghana wo biha a nga ku khumbisa kuyini?

4. Hambu vanhu va hambeneko na hina va ngava vanghana va hina va vanene

A Bhibhiliya gi wulawula hi vavanuna vambiri va Izrayeli wa kale, ku nga Dhavhidha na Jonatani. Jonatani i wa hi wa hombe nguvhu ka Dhavhidha niku i wa hi n’wana wa hosi. Hambulezvo, va vile ni wunghana ga susa ndzi kandzihela. Lerani 1 Samuweli 18:1, mu gumesa mu bhula hi ciwutiso leci:

Hikuyini zvi kalako zvi nga bohi a ku contlhe cikhati a vanghana va hina vava va tanga yin’we na hina kutani ku vava va ciyimo co fana ni ca hina?

Lerani Va Le Roma 1:11, 12, mu gumesa mu bhula hi ciwutiso leci:

A va ka vanghana lava va randzako Jehovha va nga tiyisanisa kuyini?

Ka vhidhio leyi, u ta wona lezvi a makabye wo kari wa jaha a nga va kumisa zvona a vanghana ka wutshamu a nga kala a nga gi rindzeli. Bisani VHIDHIO, mu gumesa mu bhula hi zviwutiso zvi landzelako.

VHIDHIO: Phela a vanghana u nga va kuma laha u nga ku rindzeliko (5:06)

Hikuyini a vapswali va Akil va nga karateka hi kota ya vanghana vakwe va le cikoleni?
Kusanguleni, hikuyini a nga va tsakela a vanghana lavo?
Akil i ci hlulisile kuyini ciwundza cakwe?

5. U nga va kumisa kuyini a vanghana va vanene?

Wona lezvi u nga mahako kasi u kuma vanghana va vanene ni lezvi wena u nga mahako kasi uva munghana wa munene. Bisani VHIDHIO.

VHIDHIO: Himani a munghana wa lisine? (4:14)

Mifota ya lomu ka vhidhio ‘Himani a munghana wa lisine?’ Muswa a randzelweko hi vanghana vakwe va titanga to hambanahambana, midhawuko yo hambanahambana, ni wutlhari go hambanahambana.

Lerani Mavingu 18:24 ni 27:17, mu gumesa mu bhula hi zviwutiso lezvi:

A vanghana va vanene va vhunisana kuyini?
U na ni vanghana vo tshamisa lezvo? Loku u nga hi navo, zvini u nga mahako kasi u va kuma?

Lerani Va Le Filipi 2:4, mu gumesa mu bhula hi ciwutiso leci:

Kasi uva ni vanghana va vanene u fanele kuva ni cinghana. U nga zvi mahisa kuyini lezvo?

Mifota: I nhanyana a endzelwako hi vanghana vakwe va vanharu. 1. I bhula ni mun’we wabye hi fone. 2. I bhula ni loyi wo khosahala le Salawini ya Mufumo. 3. I endzela mun’we wabye a felweko. — Kasi uva ni vanghana va vanene u fanele *kuva* ni cinghana

A VOKARI VE: “U nga maha munghana wa ni wihi munhu.”

Wena ke, u wa ta ku yini?

LEZVI HI NGA GONDZA

Loku hi hlawula khwatsi vanghana, hi ta tsakisa Jehovha hi tlhela hi vhuneka.

Zviwutiso zva kuvhuxeta

Hikuyini lezvi hi hlawulisako zvona vanghana zvi nga zva lisima ka Jehovha?
Vanhu vo tshamisa kuyini hi nga faneliko ku maha navo wunghana?
U nga mahisa kuyini wunghana go tiya ni vanhu va vanene?

Ndzi mbhetile a cigondzo leci hi dhiya:

Zama ku maha lezvi

Ti karatele ku va tiva khwatsi a vamakabye va lomu bandleni.

Zvin’wani:

Your other goal

GONDZA ZVIN’WANI

Wona lezvi a vanghana va vanene va nga hi vhunisako zvona zvikhatini zva zvikarato.

“Wumba wunghana go tiya a kugumesa na ku nga se chikela” (A Murindzeli, Novembro wa 2019)

Wona lezvi u nga mahako kasi uva ni vanghana va vanene.

“Ndzi nga va kumisa kuyini a vanghana va vanene?” (Os Jovens Perguntam – Respostas Práticas, Vholume 1, cipimo 8)

Zvini u faneleko ku zvi tiva xungetano hi vanghana va lomu ka internet?

Tirisa Internet hi wutlhari (4:12)

Ka matimu lawa yaku: “Ndzi wa zvi xuva nguvhu a kuva ni papayi”, wona ku cini ci mahileko a wanuna wo kari a cica a vanghana lava a nga hi navo.

“A Bhibhiliya ga cica wutomi ga vanhu” (A Murindzeli wa 1 ka Abril wa 2012)