CIGONDZO 51
U nga mu tsakisisa kuyini Jehovha hi mawulawulela ya wena?
A cikhati leci Jehovha a nga hi vanga, i hi nyikile a cinyikiwo co hlawuleka, ku nga cinyikiwo ca ku wulawula. A ku Jehovha wa khatala hi lezvi hi ci tirisisako zvona a cinyikiwo leco? Ina! (Lera Jakobe 1:26.) Makunu hi nga ci tirisisa kuyini a cinyikiwo ca ku wulawula hi ndlela yi tsakisako Jehovha?
1. Hi nga ci tirisisa kuyini a cinyikiwo ca kuwulawula hi ndlela yinene?
A Bhibhiliya gi hi byela ku hi fanele ku ‘simama ku tiyisana ni ku akana’. (1 Va Le Tesalonika 5:11) Va kona vokari u va alakanyako va lavako ku tiyisiwa? U nga maha yini kasi ku va tiyisa? Va byele ku wa va randza. Kuzvilava u nga va byela lezvi zvi ku tsakisako kabye. Ku na ni mutsalo u wu alakanyako wa ku wu nga tiyisa a wokari u mu tivako? Ku na ni mitsalo yo tala ya ku u nga yi tirisa. Alakanya ku lezvi u wulawulisako zvona zvi nga tiyisa nguvhu van’wani. Hikwalaho, contlhe cikhati, zama ku wulawula hi ndlela ya lirandzo ni yo rula. — Mavingu 15:1.
2. Mawulawulela muni hi faneleko ku ma potsa?
A Bhibhiliya gi wula lezvi: “Ku nga humi gezu go nyenyeza hi non’wini wa n’wina.” (Lera Va Le Efesusi 4:29.) Lezvo zvi wula ku a hi faneli ku tirisa magezu yo biha, ni ku rukatela, ni magezu yo tlhava kasi ku va zwisa kubayisa van’wani. Hi fanele ku potsa a mahlevo ni dekele. — Lera Mavingu 16:28.
3. Zvini zvi to hi vhuna a ku wulawula timhaka ti tiyisako van’wani?
A kutala ka zvikhati, lezvi hi wulawulako zvi komba lezvi hakunene zvi nga lomu mbilwini ya hina kutani ka maalakanyo ya hina. (Luka 6:45) Hikwalaho, zvi lava ku hi ti gondzisa ku ehleketa hi zvilo zva zvinene, ku nga zvilo zvi lulamileko, ni zvilo zvi basileko, ni zvilo zvi randzekako, ni zvilo zvi dzundziwako. (Va Le Filipi 4:8) Kasi hi zvi kota ku maha lezvo, hi fanele ku hlawula khwatsi a mihlakano ya hina ni vanghana va hina. (Mavingu 13:20) Zva vhuna kambe a ku sangula hi ku ehleketa na hi nga se wulawula. Ehleketa hi lezvi a magezu ya wena ma khumbisako zvona van’wani. A Bhibhiliya gi wula lezvi: “A magezu yo wuliwa na ma nga pimisiwangi ma fana ni kutlhava ka cipadha, kanilezvi a lirimi la loyi a tlharihileko la hanyisa.” — Mavingu 12:18.
GONDZA ZVI ETA
Gondza u wona lezvi u nga wulawulisako zvona hi ndlela yi tsakisako Jehovha ni ku kuca van’wani.
4. Ti wonele ka lezvi u wulako
Ka zvikhati zvin’wani, hontlheni ha wula zvilo hi gumesa hi ti laya. (Jakobe 3:2) Lerani Va Le Galatiya 5:22, 23, mu gumesa mu bhula hi zviwutiso lezvi:
Ka matshamela lawa, hi wahi lawa u nga ma khongelelako kasi ma ku vhuna ku wonelela lezvi u wulawulako? A matshamela lawa ma nga ku vhunisa kuyini?
Lerani 1 Va Le Korinte 15:33, mu gumesa mu bhula hi ciwutiso leci:
A vanghana va wena ni mihlakano leyi u yi hlawulako zvi nga khumbisa kuyini a ndlela leyi u wulawulako hi yona?
Cini ci nga khumbako a ndlela leyi u wulawulako hi yona?
Lerani Mutshawuteli 3:1, 7, mu gumesa mu bhula hi ciwutiso leci:
Hi rini zvi nga vako zvinene a ku miyela kutani ku rindzela cikhati ca cinene kasi ku wulawula?
5. Wulawula zvazvinene hi van’wani
Hi nga potsisa kuyini a ku wulawula zvilo zvi nga khunguvanyisako van’wani? Bisani VHIDHIO, mu gumesa mu bhula hi zviwutiso zvi landzelako.
Hikuyini a makabye loyi hi nga mu wona ka vhidhio a nga lava ku cica lezvi a nga wulawulisa zvona hi van’wani?
Zvini lezvi a nga maha kasi a cica?
Lerani Mutshawuteli 7:16, mu gumesa mu bhula hi ciwutiso leci:
Zvini hi faneleko ku zvi alakanya loku hi ringiwa ku wulawula zvakubiha hi munhu?
Lerani Mutshawuteli 7:21, 22, mu gumesa mu bhula hi ciwutiso leci:
A mavhesi lawa ma nga hi vhunisa kuyini a ku hi nga zangari loku a munhu a wulawula zvakubiha hi hina?
6. Wulawula hi ndlela ya lirandzo ni ngango wa wena
Jehovha i lava ku hi bhula ni ngango wa hina hi ndlela ya kurula ni ya lirandzo. Bisani VHIDHIO, mu gumesa mu bhula hi ciwutiso ci landzelako.
Zvini zvi to ku vhuna a ku wulawula hi ndlela ya lirandzo ni ngango wa wena?
Lerani Va Le Efesusi 4:31, 32, mu gumesa mu bhula hi ciwutiso leci:
Hi nga wulawulisa kuyini ni vanhu va laha ngangweni wa hina hi ndlela ya lirandzo?
Jehovha i wulile lezvi a nga ti zwisa zvona hi n’wana wakwe Jesu. Lerani Matewu 17:5, mu gumesa mu bhula hi ciwutiso leci:
U nga mu pimanyisisa kuyini Jehovha ka ndlela leyi u bhulako hi yona ni ngango wa wena?
Hlota tindlela ta ku dzundza van’wani
A VOKARI VE: “Leci ndzi ci kumako mina ndzo wula. A ndzi ngheni ndhawu loku lezvi ndzi wulako zvi va swira.”
Wa yima nazvo ke? Hikuyini?
LEZVI HI NGA GONDZA
A magezu ya hina ma vhuna van’wani kutani ku va khunguvanyisa. Hi fanele ku ehleketa khwatsi hi lezvi hi wulako, ni cikhati ca ku zvi wula hi cona, ni lezvi hi to zvi wulisa zvona.
Zviwutiso zva kuvhuxeta
U nga ci tirisisa kuyini a cinyikiwo ca ku wulawula kasi ku vhuna van’wani?
Mawulawulela muni hi faneleko ku ma potsa?
Zvini zvi nga hi vhunako ku contlhe cikhati hi wulawula hi ndlela ya lirandzo ni ku tiyisa van’wani?
GONDZA ZVIN’WANI
Zvini zvi nga vhunako a ku wulawula hi ndlela yi kucako van’wani?
Gondza u tiva lezvi zvi nga ku vhunako a ku potsa a mawulawulela ya hava.
“Xana a ku rukatela zvi bihile futsi?” (Ndzima yi nga ka jw.org)
Wona lezvi u nga mahako kasi u potsa a ntlhamu wa ku hleva van’wani.
Wona lezvi Jehovha a nga mu vhunisa zvona a wanuna wo kari a ku tsika ku rukatela.