A tsima gi longiselweko khwatsi gi pswala mihanzu

María Isabel muhuweleli wo hiseka a ha hiko nhanyana doropeni ga San Bernardo tikweni ga Chile le América wa le Dzongeni. A nhanyana loyi ni ngango wakwe va lumba lixaka la Mapuche. A ngango wontlhe wu kulula wu nwatseka na wu vunetela lezaku ku yimiswa bandla giswa ga lirimi la Mapuche, leli kambe li vitwako ku Mapudungun.

Laha ku nga tivisiwa lezaku a Xialakanyiso xa Kufa ka Kristu xi ta mahiwa hi xiMapudungun, niku ku gandlilwe a 2.000 wa zirambo za Xialakanyiso hi lirimi lelo kasi zi nyikelwa, María Isabel i lo alakanyela xo maha. I wa ta maha yini kasi ku vunetela ke? I lo alakanya matshango ya vaswa vanwani va Timboni lava va vileko ni litsako hi ku xumayela a zigonzani-kulobye ni vagonzisi. I lo wulawula ni vapswali vakwe xungetano hi mhaka leyi, zonake kota ngango, va lo zi wona na zi hi chukwana a ku María Isabel a hlota tindlela ta ku nyikela zirambo xikoleni. Xana i alakanyele ku zi mahisa kuyini?

A xo ranga, María Isabel i lo kombela varangeli va xikola lezaku a nameka xirambo laha nyangweni leyi ya hombe ya xikola. Va lo vumela va tlhela va mu dzunza hi lezi a alakanyileko ku maha lezo. Ka siku go kari, a xikhati lexi ku ngaba simbi yo sangula ya ni mixo, a diretor wa xikola i lo tivisa xirambo lexo hi mikrofone!

Hi kulanzela, María Isabel i lo kombela ku famba hi sala ni sala a bhula ni zigonzani zontlhe. Laha a vagonzisi va nga vumela, i lo famba hi turma ni turma a wutisa lezaku i kona a nga Mapuche ke. María Isabel i ngalo: “Nzi wa alakanya lezaku kuzilava ka xikoleni xontlhe kova ni 10 kutani 15 wa zigonzani za vaMapuche, kanilezi ku wa hi ni vo hunza ntsengo lowu — nzi lo nyikela a 150 wa zirambo!”

“I WA RINZELA KU WONA MUNHU WA HOMBE”

A wasati wo kari a nga wona xirambo laha nyangweni ya xikola i lo wutisa ku himani loyi a nga fanele ku wulawula naye xungetano hi xirambo lexo. Hi nga alakanya lezi a nga hlamalisa zona hi ku kombiwa a nhanyana wa khume ga malembe! María Isabel i wula magezu lawa na a nwayitela: “I wa rinzela ku wona munhu wa hombe.” Loku a mu nyikile xirambo ni ku mu tlhamusela zitsongwani, María Isabel i lo wutisa a wasati loye lomu a tshamako kona kasi a vapswali vakwe va mu enzela lezaku va ya bhula naye xungetano hi mahungu manwani ya Mufumo. A hi litsako li vileko kona ka 20 wa vahuweleli va tirako ka simu ga lirimi la Mapudungun a xikhati lexi va nga wona a wasati loyi zinwe ni 26 wa vanhu vanwani va tsakelako vaMapuche Xialakanyisweni. A ntlawa lowo makunu i bandla gi sangulako ku famba ha goce!

Kani u ka tanga muni, xana a wu nge mahi zo zana ni lezo hi ku ramba zigonzani kutani vatiri-kuloni lezaku vata Xialakanyisweni, mitlhanganweni ya bandla kutani gotsovanyanweni wa muganga ke? Hikuyini u nga laveteliko matshango ya tshamela lego lomu ka mabhuku ya hina kasi u kuma mawonela ya lezi u nga mahisako zona? Ku nga hi lezo ntsena, khongelela moya wa ku basa wa Jehova kasi wu ku nyika ntamu wa ku wulawula hi yena hi kutiya-hlana. (Luka 11:13) Loku u maha lezo, wenawu u nga tshuka u hlamaliswa ni ku tlhela u tiyiswa hlana hi mihanzu leyi u nga yi tshovelako ka tsima gi longiselweko khwatsi.