Jesu — A ndlela ya ku kuma litsako wutomini

XANA Jesu hakunene i wa hi ni litsako wutomini? Jesu i wundlilwe ka ngango wa wusiwana, niku wutomini gakwe gontlhe i wa nga hi na titshomba to tala. Hi lisine, i wa nga hi na “wutshamu go khigela kona hloko yakwe.” (Luka 9:57, 58) Ahandle ka lezo, i wa vengiwa, a lumbetiwa, niku i gumesile hi ku dawa hi valala vakwe.

U nga ha ehleketa uku, ‘legi a hi gona wutomi nzi gi wonako kota go tsakisa!’ Kanilezi ku na ni zo tala xungetano hi wutomi ga Jesu hi faneleko ku zi tiva. A hi woneni a mune wa zona.

1. JESU I WA HI NI KUNGO WUTOMINI — KU NGA KU MAHA KURANZA KA NUNGUNGULU.

“A zakuga za mina hi ku maha a kuranza ka loyi a nzi rumileko.” — Johani 4:34.

Hi magezu yakwe ni mitiro, Jesu i wa ti karatela ku maha kuranza ka Jehova,a a Dadani wakwe wa le tilweni. Jesu i wa xalala nguvu hi ku maha kuranza ka Nungungulu. Hi lisine, i fananisile ku maha lezo ni zakuga kota lezi hi zi wonako ka mutsalo lowu laha hehla. Wona a xiyimo lexi a nga hi ka xona a xikhati a nga wula a magezu lawo.

Jesu i wulile magezu lawo kwalomo ka xikhati xa dina. (Johani 4:6) I wa mbhetile mixo yontlhe na a enza tikweni ga zitsunga ga Samaria, hikwalaho handle ko kanakana i wazwa ndlala. Kunene a vapizani vakwe va wa ha hi ku mu khongotela vaku: “Rabi, gana!” (Johani 4:31) Hi hlamulo wakwe, Jesu i kombile lezaku i wa tizwa na a xurile a tlhela a tiyiswa hi ku maha ntiro wa Nungungulu. Xana loye a wu mu woni kota munhu a nga hi ni litsako wutomini?

2. JESU I WA HI NI LIRANZO LO ETA HI DADANI WAKWE.

“Nza mu ranza Dadani.” — Johani 14:31.

Jesu i wa hi ni kuzwanana ka hombe nguvu ni Dadani wakwe wa le tilweni. A liranzo lo eta la Jesu hi Nungungulu li mu susumetele ku tivekisa a Dadani wakwe — vito Gakwe, makungo Yakwe, ni matshamela Yakwe. Hi magezu yakwe, zimaho, ni mahanyela, Jesu i mu pimanyisile khwatsi a Dadani wakwe — laha ka kuza a ku wona Jesu zi fana ni ku wona a Dadani wakwe. Hikwalaho, a xikhati lexi Filipu a nga kombela Jesu aku: “Hi wonise Dadani,” Jesu i te: “Loyi a wonileko mina, i wonile ni Dadani.” — Johani 14:8, 9.

Jesu i wa mu ranza nguvu a Dadani wakwe laha ka kuza a vumela ku mu ingisa kala kufeni. (Va Le Filipi 2:7, 8; 1 Johani 5:3) A liranzo lelo lo eta hi Nungungulu li mahile Jesu a kuma litsako wutomini.

3. JESU I WA RANZA VANHU.

“A ku na munhu a nga ni liranzo la hombe lo hunza leli, lezaku munhu a nyikela kuhanya kakwe hi kota ya maxaka yakwe.” — Johani 15:13.

A wumanziko ga hina kota vanhu va nga mbhelelangiko ga tshisa. A Biblia gi tlhamusela lezi: “Khwatsi hi lezi a kuonha ku nga enghena misaveni hi kota ya munhu munwe [Adamu], ni kufa ku tile hi kota ya kuonha; hizalezo a kufa ku lo thapela vanhu vontlhe hakuva vontlhe va onhile.” (Va Le Roma 5:12) A hi nge zi koti ku ti ponisa ha hoce ka hakhelo ya xionho, ku nga kufa. — Va Le Roma 6:23.

Lambi Jehova a nga maha malulamiselo hi liranzo kasi ku hi tlhatlhisa. I vumelele N’wana wakwe wo mbhelela, loyi a tivilweko kota Jesu, lezaku a xaniseka a tlhela afa kasi kuva nzhiho lowu wu nga laveka lezaku ku tlhatlhiswa vanhu ka xionho ni kufa. Hi ku ranza Dadani wakwe ni vanhu, Jesu hi kuziranza i vumelile ku nyikela a wutomi gakwe go mbhelela kasi ku hi tlhatlhisa. (Va Le Roma 5:6-8) A liranzo lelo lo eta li mu nyikile litsako wutomini.b

4. JESU I WA ZI TIVA LEZAKU A DADANI WAKWE WA MU RANZA NIKU WA XALALA HI YENA.

“Loyi hi Nwana wa mina a ranzekako, nzi xaleleko khwatsi ha yena.” — Mateu 3:17.

Jehova i wulile a magezu lawo na a hi le tilweni a xikhati lexi Jesu a nga bapatizwa. Hi ndlela leyo, Jehova i lo dlunyatisa a liranzo ni kuxalala loku a nga hi nako hi N’wana wakwe Jesu. A zi hlamalisi a kuva Jesu a wulile a magezu lawa: “Dadani wa nzi ranza”! (Johani 10:17) Hi ku tiva lezaku a Dadani wakwe wa mu ranza a tlhela a xalala hi yena, Jesu i lo kuma ntamu wa ku lwisana ni kukanetwa. Lezo zi tlhelile zi mu vuna ku simama a tiyile a tlhela a ngavi ni gome hambu kufeni kakwe. (Johani 10:18) Handle ko kanakana, a ku tiva lezaku wa ranziwa a tlhela a tsakelwa hi Dadani wakwe zi vunile Jesu a kuva a kuma litsako wutomini gakwe.

Handle ko kanakana, Jesu i wa hi ni litsako wutomini. Zi la su dlunya lezaku hi nga gonza zo tala kakwe xungetano hi lezi hi nga kongomisisako zona a wutomi ga hina kasi hiva ni litsako. A nzima yi lanzelako yi ta wulawula hi wusungukati go kari legi Jesu a gi nyikileko a valanzeli vakwe xungetano hi lezi va nga fanele ku hanyisa zona.