‘A matshamela yakwe ma nga wonekiko, ma woneka maku dlunya’

Wa kholwa lezaku Nungungulu i kona ke? Loku u kholwa, xini xi ku kholwisako? A mhaka yo tiya hi lezaku hi ranzelwe hi zikombiso zo tala zi tiyisako lezaku ku na ni Muvangi a nga ni wutlhari, ni ntamu, ni liranzo. Zikombiso muni zalezo, niku xana za kholwisa hakunene? Kasi ku kuma a hlamulo wa kona, wona a magezu ya mupostoli Paule ma nga ka papilo legi a tsaleleko maKristu ya le Roma.

Paule i te ngalo: ‘A matshamela ya Nungungulu ma nga wonekiko, ma woneka maku dlunya kusukela kuvangiweni ka misava, hakuva ma tibyiwa hi mitiro yakwe.’ (Va Le Roma 1:20) Kota lezi zi kombilweko hi Paule, a Muvangi i siyile titiho mitirweni yakwe. A hi kambisiseni khwatsi a magezu ya Paule.

Paule i wula lezaku a matshamela ya Nungungulu ma woneka kusukela “kuvangiweni ka misava.” Ka mhaka leyi, a gezu ga xiGreki legi gi hunzuluselweko ku “misava” a gi wuli misava leyi hi kanzihetelako — gi wula vanhu.a Hikwalaho, Paule i wula lezaku zalezi a vanhu va nga vangiwa, va lo sangula ku wona a matshamela ya Muvangi ka zilo lezi a zi vangileko.

A zikombiso lezo zi hi ranzele. A zi fihlalangi lomu ka zivangwa, kanilezi zi ‘woneka ziku dlunya.’ Kusukela ka xivangwa xa hombe ka zontlhe kala ka lexi xa xitsongwani xa kona, zontlhe zi komba lezaku ku na ni Muvangi loyi a nga ni matshamela yo hlamalisa. Xana a wutivi legi gi wonekako lomu ka zivangwa a gi dlunyatisi a wutlhari ga Nungungulu ke? Xana a tinyeleti ni mabyandlati ya bimbi a zi kombisi a tamu wakwe ke? A kuhambanahambana ka tixaka ta zakuga zo nanziha lezi hi gako ni kusaseka ka gambu a xikhati gi humako ni ku pela, xana a zi kombisi lezaku Nungungulu wa va ranza vanhu ke? — Tisimu 104:24; Isaya 40:26.

Xana a zikombiso lezo zi dlunyateka kala kwihi? Zi dlunyatekile nguvu laha ka ku lava va nga zi woniko ni lava va alako ku kholwa ka Nungungulu ha womu “a va na ku ti phendla.” A tlhari yo kari yi zi fananisa hi ndlela leyi: Alakanyela a mufambisi wa mova loyi a kanyisako xapa yi mu byelako ku, “U nga ngheni hi laha — Djika hi xibhabha.” Zonake a nyimisiwa hi phoyisa gi sangula ku mu tsalela multa. A muchembeli loye i zama ku ti yimelela aku a nga yi wonangi a xapa leyo. Kanilezi, a magezu yakwe a ma na ntamu hakuva a xapa leyo yi laha kubaseni, niku a mahlo yakwe ma wona khwatsi. Ahandle ka lezo, kota mufambisi wa mova, i fanelo yakwe a ku wona ni ku lanzela lezi a tixapa leto ti mu byelako. A zikombiso za lezaku Nungungulu i kona zonawu zi tshamisile zalezo. A “xapa” leyo yi laha kubaseni. Kota zivangwa zi pimisako, ha zi kota ku yi wona a xapa leyo. A ku na xigelo xa ku wula lezaku a hi yi woni.

Kunene, a zivangwa zi hi byela zotala xungetano hi Muvangi wa hina. Hambulezo, ku na ni bhuku kambe gi hi byelalako zinwani xungetano hi yena — ku nga Biblia. Nzeni ka gona, hi nga kuma hlamulo wa xiwutiso lexi xa lisima: I kungo muni legi Nungungulu a nga nago hi misava leyi zinwe ni vanhu lava va hanyako ka yona ke? A ku tiva hlamulo wa xiwutiso lexi zi nga ku vuna ku tshinela ka Nungungulu loyi ‘a matshamela yakwe ma nga wonekiko, ma wonekako maku dlunya’ laha misaveni leyi hi hanyako ka yona.