Jehova — a Munyiki wa hina ni Muvikeli wa hina

1, 2. Kuhambana muni hi nga nako hi ka ziyimo za mingango ya hina ni lezi hi nga gonzisa zona a lisine?

JEHOVA hi yena muvangi wa ngango. (Efe. 3:14, 15) Kanilezi, hambu loku hi lumba ngango munwe, hi na ni matshamela yo hambana niku a ziyimo za hina a zi fani. Za koteka ku ngha u hanyile ni vapswali va wena kusukela kupswaliweni kala uva wahombe. Ginwani siku a vanwani va felwe hi vapswali vabye, kuzilava hi kota ya mababyi, timhango, kutani manwani makhombo. A vanwani kambe ne ku hi vamani a vapswali vabye a va zi tivi.

² Xikari ka ziro za ngango wa vakhozeli va Jehova, lezi zi nga gonzisa zona a lisine zonawu za hambana. Za koteka ku ngha u ‘pswalelwe lisineni,’ khwatsi hi lezi vanwani va zi wulisako zona, ni ku ngha a vapswali va wena va ku gonzisile a matshinya ya milayo ya Nungungulu. (Deut. 6:6, 7) Kuzilava u munwe wa lava va makume ya mazana va tivileko lisine hi ku xumayelwa hi malanza manwani ya Jehova. — Rom. 10:13-15; 1 Tim. 2:3, 4.

3. Xini lexi hina hontlhe hi nga hiko na kutiphendla ka xona?

³ Na ku nga khataliseki a zigelo lezi za ha hiko ku tlhamuselwa laha, ku na ni nchumu lowu hina hontlhe hi nga hiko na kutiphendla ka wona. Ha xaniseka kota mbhanzu wa kungaingisi ka Adamu niku hi thapelwe hi xionho, kungambheleli, ni kufa. (Rom. 5:12) Hambu zi hi tano, kota vakhozeli va lisine, ha zi kota ku tshinela ka Jehova kota “Dadani wa hina.” Na a wulawula hi vanhu va hlawulilweko va Nungungulu va xikhatini lexo, Isaya 64:8 i ngalo: “Wena Jehova u dadani wa hina.” Tlhatakumbiri, Jesu i lo sangula a mukhongelo wakwe wa xikombiso hi magezu lawa: “Dadani wa hina wa le tilweni, a vito ga wena a gi [basisiwe].” — Mat. 6:9.

4, 5. A xikhati lexi hi hlolako a kueta ka lezi hi mu tsakelisako zona Jehova, a Dadani wa hina, xini xi to hi vuna a ku ehleketa hi mhaka leyi?

⁴ A Dadani wa hina wa le tilweni wa hi khatalela ni ku hi vikela kota vanhu va vitanako a vito gakwe hi kukholwa. A muyimbeleli wa tisimu i tshaha magezu yakwe na aku: “Khwatsi hilezi [mukhozeli wa lisine] a nzi ranzako, nzi ta mu tlhatlhisa, nzi . . . mu hlayisa hakuva i tivile a vito ga mina.” (Tis. 91:14) Hakunene, Jehova Nungungulu wa hi ponisa hi liranzo ka valala va hina ni ku hi vikela kota vanhu vakwe, kasi hi nga lovi.

⁵ Kasi hi engetela lezi hi mu tsakelisako zona a Dadani wa hina wa le tilweni, a hi wulawuleni hi zilo zinharu za lisima: (1) I Dadani wa hina ni Munyiki wa hina. (2) Jehova Muvikeli wa hina. (3) Niku hi yena Munghana wa hina wa mu nene ku hunza vontlhe. A xikhati lexi hi wulawulako hi zilo lezi, zi tava zi nene a ku ehleketa hi kuzwanana ka hina na Nungungulu hi tlhela hi alakanyela hi ndlela yo mu dzunza kota Dadani wa hina. Zi tava ni xivuno kambe a ku ehleketa hi makatekwa lawa Jehova a ma vekeleko lava va tshinelako kakwe. — Jak. 4:8.

JEHOVA — A MUNYIKI WA HOMBE

6. Jehova Munyiki wa “zontlhe zinyikiwo zo saseka” hi ndlela muni?

⁶ Mupizani Jakobe i lo tsala aku: “Zontlhe zinyikiwo zo saseka ni zinyikiwo zontlhe zi mbheleleko zita hi le hehla, zi relela hi ka Dadani wa kuwonekela.” (Jak. 1:17) A wutomi ha goce xinyikiwo xo hlamalisa xi tako hi ka Jehova. (Tis. 36:9) Hi ku tirisa wutomi ga hina kasi ku maha kuranza ka Nungungulu, hi kuma makatekwa yo tala zalezi ni kutsumba ka wutomi ga pinzukelwa misaveni yiswa. (Mav. 10:22; 2 Ped. 3:13) Kanilezi, xana lezo zi kotekisa kuyini ni khombo legi gi nehilweko hi kungaingisi ka Adamu?

7. Nungungulu i vululisile kuyini a ndlela ya lezaku hiva ni kuzwanana zinwe naye?

⁷ Hakunene Jehova Munyiki wa Hombe ku hunza vontlhe. Hi xikombiso, a tipswalo takwe ti ta hi tlhatlhisa. Hina hontlhe hi vaonhi ni lezaku hi thapelwe hi kungambheleli ka mupswali wa hina wo sangula wa laha misaveni. (Rom. 3:23) Hambulezo, hi kota ya liranzo lakwe, Jehova i lo sangula hi yena a vulula ndlela ya lezaku hiva ni kuzwanana zinwe naye. Mupostoli Johani i te ngalo: “A ku hi ranza ka Nungungulu ku wonekelisilwe hi lezi, Nungungulu i rumele a N’wana wakwe a belekilweko yece ata laha misaveni, kasi hina hi fela ku hanya ha yena. A liranzo hi leli, a hi lezaku hina hi mu ranzile Nungungulu, kanilezi hi yena a hi ranzileko, a rumela N’wana wakwe a kuva nzhiho wa zionho za hina.” — 1 Joh. 4:9, 10.

8, 9. Jehova ive Munyiki wa Hombe xikhatini xa Abrahama na Isaka hi ndlela muni? (Wona mufota kusanguleni ka nzima.)

⁸ Kwalomu ka va 1893 Mahlweni ka Nguva ya Hina, kuve ni ximaho xa wuprofeti xi nga komba lezi Jehova a nga wa ta maha hi liranzo kasi ku nyika a wutomi ga pinzukelwa ka vanhu vontlhe vo ingisa. Maheberu 11:17-19 i tlhamusela lezi: “Hi kukholwa Abrahama i lo phahlela ha Isaka a siku a nga ringiwa; ina, loyi a amukeleko a zitsumbiso i lo nyikela a n’wana wakwe a belekilweko yece; loyi ku nga wulilwe ha yena ku ngalo: A pswalo wa wena wu ta vitanwa ha Isaka. Hakuva i lo alakanya lezaku Nungungulu i na ni ntamu hambu ni ku vuxa hi ka vafileko; lomo a nga mu tlheliselwa ha kona, loku hi wulawula hi ku fananisa.” A zi karati ku wona a kufanana ka zimaho lezi. Jehova i lo nyikela N’wana wakwe, Jesu Kristu, kasi ku vuna tiko gontlhe. — Gonza Johani 3:16, 36.

⁹ Hi nga wona lezi Isaka a nga tsakisa zona hi ku tlhatlhiswa ka kudawa loku kota muphahlo! Handle ko kanakana i lo bonga nguvu hi lezi Nungungulu a nga humesa xihari xo mu valeta — ku nga hamba leyi yi nga khwekele lomu likwareni. (Gen. 22:10-13) A zi hlamalisi lezi a wutshamu legi gi nga vitwa ku “Jehova-Jire,” zi wulako ku “Jehova i ta Nyika.” — Gen. 22:14.

LULAMISELO GA KUTLHANGANYISA

10, 11. Hi vamani va rangelako ‘ntirweni wa kutlhanganyisa,’ niku va zi mahisa kuyini?

¹⁰ A xikhati lexi hi ehleketako hi lezi Jehova a nga Munyiki wa Hombe ha zona, ha vumela hi tlhela hi bonga lezi Jesu Kristu a zi mahileko, khwatsi hi lezi Paule a nga wula a xikhati lexi a nga tsala aku: ‘Lezi hi zona hi zi alakanyako, ku nga lezi: A munwe i lo fela vontlhe, hikwalaho vontlhe va file. Yena i lo fela vontlhe kasi lava va hanyako va nga ha ti hanyeli wutsumbu, kanilezi va hanyela loyi a ngafa a tlhela a vuka hi kota ya vona.’ — 2 Kor. 5:14, 15.

¹¹ Hi kota ya ku ranza Nungungulu ni ku bonga lungelo ga lisima nguvu ga ku mu tirela, a maKristu yo sangula ma amukele hi kutsaka “a ntiro wa kutlhanganyisa.” A ntiro wabye wa kuxumayela ni ku maha vapizani wu vululele ndlela a vanhu va timbilu ti nene lezaku vava ni kurula na Nungungulu, vava ni wunghana naye, niku hi kugumesa vava vana vakwe va moya. Inyamutlha, a malanza ya Jehova ma totilweko ma maha ntiro walowo. Lezi ma zi mahako kota vaembaxadori va Nungungulu na Kristu zi vuna vanhu lava va ti yimiseleko lezaku va kokiwa hi Jehova va tlhela vava makholwa. — Gonza 2 Va Le Korinte 5:18-20; Joh. 6:44; Miti. 13:48.

12, 13. Hi nga kombisa kuyini lezaku ha bonga a zinyikiwo zo tala zi tako hi ka Jehova?

¹² Kota ndlela yo kombisa kubonga ka Jehova kota Munyiki wa Hombe, a maKristu wontlhe ma rinzelako ku hanya laha misaveni ma tira zinwe ni vatotilweko kuxumayeleni ka Mufumo. Ka ntiro lowu, hi tirisa a Biblia, gi nga xinyikiwo xinwani xa lisima nguvu xa Nungungulu. (2 Tim. 3:16, 17) Hi ku tirisa khwatsi a Mhaka ya Nungungulu yi pimisilweko, hi nyika vanwani a lungelo ga ku kuma wutomi ga pinzukelwa. Kasi hi zi kota ku maha ntiro lowu, a munwe ni munwani wa hina i khegela ka xinyikiwo xinwani xi tako hi ka Jehova — ku nga moya wakwe wa ku basa. (Zak. 4:6; Luka 11:13) A mihanzu ya kona ya hlamalisa, khwatsi hi lezi zi kombiswako ka Anuário das Testemunhas de Jeová gi humeswako lembe ni lembe. Hakunene wudzunzo ga hombe a ku hlengela ntirweni lowu wa ku dumisa a Dadani tlhelo Munyiki wa hina!

¹³ Hi kota ya zontlhe lezi Nungungulu a hi nyikako, zi wa tava zi nene a ku ti wutisa lezi: ‘Nza maha zontlhe nzi zi kotako wutirelini ga mina kasi nzi komba Jehova lezi nzi mu bongisako zona hi kota ya lezi a nzi mahelako? Nzi nga chukwatisisa kuyini a maxumayelela ya mina kasi nziva muxumayeli wo buva wa mahungu yo saseka ke?’ Hi nga komba a kubonga ka hina hi kota ya zilo zo saseka nguvu lezi Nungungulu a hi nyikako hi ku rangisa a ntiro wa Mufumo wutomini ga hina. Loku hi maha lezo, Jehova i ta hi hlayisa. (Mat. 6:25-33) Hi kota ya lezi Nungungulu a hi liranzako, handle ko kanakana hi lava ku maha zontlhe hi zi kotako kasi hi mu xalalisa ni ku maha mbilu yakwe yi tsaka. — Mav. 27:11.

14. Jehova Mutlhatlhisi wa vanhu vakwe hi ndlela muni?

¹⁴ Davida i lo yimbelela aku: ‘Mina nzi loyi a xanisilweko, nzi muvumali, ngha Jehova a nzi alakanya; wena u muvuni wa mina ni mutiruli wa mina.’ (Tis. 40:17) Hi kuphindaphinda, Jehova Mutlhatlhisi wa vanhu vakwe kota ntlawa, nguvunguvu ka xikhati lexi va xaniswako hi ndlela ya xapi ni ku vukelwa hi valala vabye. A ho ku mu bonga Nungungulu hi lezi a hi vunako ka zikhati lezo ni lezi a hi nyikako zakuga zo tala za moya xontlhe xikhati!

JEHOVA WA VIKELA

15. Kombisa lezi a dadani wa liranzo a hlotisako zona tindlela ta ku vikela n’wana wakwe.

¹⁵ A dadani wa liranzo a nga lumbeli ntsena ku nyika zakuga a vanana vakwe kanilezi i hlota tindlela ta ku va vikela. Loku va wela mhangweni i tekela ku va tlhatlhisa. A makabye wo kari wa xinuna wa ha alakanya a ximaho xo kari xi nga humelela na a ha hi mufanyana. Yena ni papai wakwe va wa tlhela kaya na va wuya hi sinwini. A ndlela leyi va nga famba hi yona yi wa lava lezaku va tsemakanya congo. A vula ya hombe yi nga nile ni mixo leyo yi wa tatile a congo lowo hi mati ma halakela. A ndlela yinwe ntsena yo khupuka a congo lowo ku wa hi ku tlula hi ka ribye u ya djatama ka ginwani. Laha a nga zama ku tsemakanya na a hi mahlweni ka papai wakwe, a mufanyana loyi i lo retemuka a wela matini, a dhupela makhati mambiri. Hi nga wona lezi a mufanyana loyi a nga bongisa zona laha a papai wakwe a nga mu khoma hi katla zi tiya zonake a mu tsawula lomu matini! A Dadani wa hina wa le tilweni wa hi tlhatlhisa ka lezi zi wonekisako ku khwatsi i mati ma kokako ya tiko legi ga kubiha ni ka hosi ya gona Satani. Handle ko kanakana, Jehova hi yena Muvikeli wa mu nene ku hunza vontlhe. — Mat. 6:13; 1 Joh. 5:19.

16, 17. Xana Jehova i va vunisile ni ku va vikelisa kuyini a vaIsraeli a xikhati lexi va ngalwa ni vaAmaleki?

¹⁶ A ku Jehova muvikeli wa liranzo zi woneka khwatsi ka lezi zi humeleleko a vaIsraeli anzhako ka ku va tlhatlhisa wukhumbini ga le Gipite ni ku va vikela hi xihlamaliso a xikhati lexi va nga tsemakanya Bimbi go Pswhuka hi 1513 Mahlweni ka Nguva ya Hina. Anzhako ka ku tsemakanya xiwula xa ligwangwa va kongoma Xitsungeni xa Sinai, a tiko gi lo chikela le Refidime.

¹⁷ Hi kota ya xiprofeto xa Nungungulu xi nga ka Genesisi 3:15, za koteka ku ngha Satani na a kayakayekile a xikhati lexi a nga hlota ndlela ya ku vukela vaIsraeli va nga ku khwatsi a va na muvikeli. I lo maha lezo hi ku tirisa vaAmaleki, lava va nga hi valala va vanhu va Nungungulu. (Mitse. 24:20) Ehleketa lezi Jehova a zi tatisileko hi ku tirisa mune wa vavanuna vo tsumbeka — Joxua, Mosi, Aroni, na Hura. Laha Joxua a ngalwa ni vaAmaleki, Mosi na Aroni na Hura va wa yimile kusuhani ni xitsunga. A vaIsraeli va wa hlula loku Mosi a tlakusa mawoko yakwe. A xikhati lexi a mawoko yakwe ma nga karele, Aroni na Hura va lo khoma mawoko yakwe va ma tlakusa. Hikwalaho, hi ku vuniwa ni ku vikelwa hi Jehova, “Joxua ni vanhu vakwe, va lo hlula vaAmaleki.” (Ekso. 17:8-13) Mosi i lo aka a alati ka wutshamu lego, a gi chula ku “Jehova-nisi,” zi wulako ku “Jehova i Mhanze ya Mina ya Xikombiso.” — Gonza Eksodusi 17:14, 15.

JEHOVA I LO VA VIKELA KA WUXUNGU GA SATANI

18, 19. Xana Nungungulu i vikela malanza yakwe masikwini ya hina hi ndlela muni?

¹⁸ Jehova i vikela lava va mu ranzako ni ku mu ingisa. Khwatsi hi vaIsraeli le Refidime, hi cuwuka ka Nungungulu kasi a hi vikela laha hi vukelwako hi valala. Jehova wa hi vikela hi kukhanzakanya kota ntlawa, a tlhela a hi ponisa ka wuxungu ga Satani. Hi nga alakanya a makhati yo tala lawa Nungungulu a vikeleko a vamakabye va hina lava va nga kala ku ti nghenisela ka politika. Hi xikombiso, Jehova i lo va vikela xikhatini xa vaNazi le Alemanya ni ka matiko manwani hi va 1930 ni kusanguleni ka va 1940. A ku gonza ni ku ehleketa hi matimu ya kuhanya ni mahungu ma nga ka Anuário xungetano hi kuvikela ka Nungungulu zikhatini za tixanisa zi ta tiyisa a kutsumba ka hina ka Jehova kota Wuchavelo ga hina. — Tis. 91:2.

¹⁹ A hlengeletano ya Jehova ni mabhuku zi hi nyika zikhumbuxeto za liranzo kasi ku hi vikela. Wona a xivuno xa zona ka malembana lawa. A xikhati lexi a tiko legi gi pelako hi hloko lidakeni la mahanyela yo nyenyeza ni ku hlalela zitombe zo yila, Jehova i hi nyika zikhumbuxeto hi xikhati xi faneleko ni xivuno xa lisine xa lezaku hi ti wonela ka khombo hi tlhelo ga mahanyela. Hi xikombiso, hi amukela a wusungukati ga wudadani ga lezaku hi potsa ku tolovelana ni vakubiha hi ku tirisa a Internet hi ndlela ya hava.a — 1 Kor. 15:33.

20. Wuvikeli ni wurangeli muni legi Jehova a gi nyikako hi ku tirisa a bandla ga wuKristu ke?

²⁰ Hi nga kombisa kuyini lezaku hakunene hi gonzisiwa hi Jehova ke? Hi ku lanzela milayo yakwe hi kuchela-kota. (Isa. 54:13) Wuchavelweni go tiya ga mabandla ya hina, hi kuma wurangeli ni wuvikeli gi nene, hakuva hi lomo a vavanuna vo tsumbeka va tirako kota madota va nyikako a xivuno ni wusungukati ga Biblia. (Gal. 6:1) A kukhatala ka Jehova ka liranzo ha hina i ku kombisa hi ku tirisa ‘zinyikiwo lezi ka vanhu.’ (Efe. 4:7, 8) Hi fanele ku hlamulisa kuyini ke? Loku hi ti koramisa ni ku ingisa hi ta kuma makatekwa ya Nungungulu. — Maheb. 13:17.

21. (a) Xini hi faneleko ku ti yimisela ku maha? (b) Hi ta wulawula hi yini ka nzima yi lanzelako?

²¹ Ngha hi ti yimisela a ku fambiswa hi moya wa ku basa hi ku maha loko hi vumela a wurangeli ga Dadani wa hina wa le tilweni. Ahandle ka lezo, hi fanele ku ehleketa hi mahanyela ya N’wana wakwe, Jesu Kristu, ni ku ti karatela ku lanzela xikombiso xakwe xo mbhelela. Hi kota ya kuingisa kakwe kala kufeni, Jesu i lo amukela nchachazelo wa hombe. (Fil. 2:5-11) A ku fana na yena, hinawu hi ta katekiswa hi ku tsumba Jehova hi mbilu ya hina yontlhe. (Mav. 3:5, 6) Hikwalaho, ngha xontlhe xikhati hi cuwuka ka Jehova kota Munyiki ni Muvikeli a nga hiko na kuecanyiswa. Hi nga wona a lungelo hi nga nago ni litsako leli hi li zwako hi ku mu tirela! A liranzo la hina ha yena li ta kula laha hi ehleketako hi tshamela ga wunharu ga kukhatala ka Dadani wa hina — gi nga wunghana gakwe. A nzima yi lanzelako yi ta wulawula nguvu hi ndlela leyi Jehova a nga Munghana wa hina wa mu nene ku hunza vontlhe ha yona.