Va lo hlamula ziwutiso zontlhe hi ku tirisa Biblia!

KALE KA MINA:

A xikhati nzi nga pswaliwa, a vapswali va mina va wa hi ni xisinwana xidoropaneni xa Galícia, nwalungu wa Espanya. Nzi wa hi n’wana wa wumune laha ka ntlhanu ni vanharu. Hi wa zwanana nguvu laha ngangweni. Ka xikhati lexo, le Espanya zi wa tolovelekile a kuva a n’wana munwe hi wutsongwani ga kona a nghena ka xikola xa vapaderi ni vafreira. Laha ngangweni wa hina hi vanharu hi nga nghena ka xikola lexo.

Na nzi hi ni 13 wa malembe, nzi loya ka xikola xa vafreira le Madri, laha a makabye wa mina a nga sina a hi kona. A mahanyela seyo ma wa nga hi ya wumunhu. Ku wa nga hi na wunghana — ntsena milayo ni mikhongelo. Ni mixo, hi wa tlhangana lomu chechini kasi ku ehleketa, hambu lezi a kutala ka zikhati nzi nga vumala xo ehleketa hi xona. Hi nzhako hi wa yimbelela tisimu ta chechi zonake hi maha nkhozo, zontlhe hi xiLatini. Nzi wa nga zwisisi nchumu niku Nungungulu nzi wa mu wona na a hi kule nguvu na mina. Nzi wa nga hi na mabhulo. Hambu loku nzi kumana ni makabye wa mina, hi wo “Hozana Maria wa kubasa” ntsena. Hi wo vumelelwa ku bhula khihlanya ga hora ntsena loku ha ha hi ku mbheta kuga. Lezo zi wa hambene nguvu ni wutomi go tsakisa legi nzi nga hi nago kaya! Nzi wazwa xiwunza niku nzi wa tolovela ku tshama nzi rila.

A nzi zangi nzi ti wona nzi hi kusuhani na Nungungulu, hambulezo, nzi lo tatisa xifungo xa mina, nzi maha freira na nzi hi ni 17 wa malembe. Hi lisine nzi no maha lezi va nga zi rinzela, kanilezi zalezo nzi lo sangula ku ti wutisa a ku hakunene Nungungulu i nzi hlawulile ke. A vafreira va wa tolovela ku nzi byela lezaku a munhu a nga ni kukanakana loko i taswa tilweni! Hambulezo, nzi lo simama ku kanakana. Nzi wa zi tiva lezaku Jesu a nga ti tsawukanisangi ni vanhu; kanilezi, i wa tshama a khomekile hi ku gonzisa ni ku vuna vanwani. (Mateu 4:23-25) Laha nzi nga hi ni 20 wa malembe, nzi wa nga woni zigelo zo zwala za ku simama kuva freira. Hi xitshuketi a freira loyi a nga hi wonelela i lo nzi byela lezaku loku nzi kanakana i chukwana nzi zi tsika na ga ha hi mixo. Kuzilava i wa chava lezaku nzi maha vanwani va kanakanawo. Hikwalaho nzi lo tlhela kaya.

A xikhati nzi nga chikela kaya, a vapswali va mina va lo kombisa kuzwisisa. Kota lezi ku nga hi hava mitiro xidoropaneni xa hina, nzi loya ka makabye wa mina le Jerimani. I wa lumba ntlawa wa valuveli va vaPanyoli va nga lwela lezaku vanhu vontlhe vava ni tifanelo tinwe (vakomunista). Nzi wa tizwa khwatsi xikari ka vanhu lavo va nga lwela a tifanelo ta vavasati mitirweni. Nzi lo ti patsa ni ntlawa lowo, laha hi magumo nzi nga chada ni munwe wabye. Nzi wa tizwa na nzi maha nchumu wa lisima; hi wa avela mabhuku ya hina ni ku maha zitereka.

Kanilezi hi kufamba ka xikhati nzi lo mbhela ntamu. Nzi lo wona lezaku a ntlawa wa hina wu wa tolovela ku nga mahi lezi wu nga xumayela. A kukanakana loko ku lo kuma ntamu hi 1971 laha a vaswa vokari ka ntlawa wa hina va nga hisa a Embaixada ya Espanya le Frankfurt. Va mahile lezo na vaku vo kombisa kusola a wubihi legi gi nga hi kona le Espanya. Kanilezi, ka mina ma wa hi masolela ya hava.

A xikhati nzi nga pswala n’wana wo sangula, nzi lo byela nuna wa mina lezaku nzi lava ku nyima kuya mitlhanganweni ya vakomunista. Nzi lozwa xiwunza xa hombe hakuva ku hava ni munwe wa vanghana va mina a tileko a ta nzi kamba, mina ni n’wana wa mina. Nzi lo ti wutisa lezaku hina vanhu hi hanyela yini. Xana zi wa hi za lisima ku zama ku chukwatisa a kupima ka vanhu?

LEZI A BIBLIA GI NGA CICISA ZONA WUTOMI GA MINA:

Hi 1976, ku lota Timboni timbiri ta Espanya ti ta nzi nyika mabhuku ma seketelwako ka Biblia. Ka khati ga wumbiri va ngata, nzi lo sangula ku va maha ziwutiso zo tala xungetano hi kuxaniseka, xihlawulela, ni wubihi. Nzi lo hlamala a xikhati va nga hlamula ziwutiso zontlhe hi ku tirisa Biblia! Nzi lo tekela ku vumela xigonzo xa Biblia.

Kusanguleni nzi wo lava ku gonza zilo basi. Kanilezi zi lo cica a xikhati lexi mina ni nuna wa mina hi nga sangula kuya mitlhanganweni Salawini ya Mufumo ya Timboni ta Jehova. Ka xikhati lexo, nzi wa hi ni vana vambiri. A Timboni ti wata ti ta hi teka ti tlhela ti hi vuna ku khatalela vanana mitlhanganweni. Nzi lova ni liranzo la hombe hi Timboni.

Hambulezo, nzi wa ha hi ni kukanakana ko kari. Nzi lo boha ku enzela maxaka ya mina le Espanya. A tio wa mina, a nga hi paderi i lo zama ku nzi tsikisa ku gonza Biblia. Kanilezi a Timboni ta kwaleyo tonawu ti lo nzi vuna nguvu. Ti lo hlamula ziwutiso za mina hi ku tirisa Biblia, a ku fana ni leti ta le Jerimani. Nzi lo boha ku simama ni xigonzo xa mina xa Biblia a xikhati nzi nga tlhela nziya Jerimani. Hambu lezi a nuna wa mina a nga boha ku tsika ku gonza, mina nzi lo simama ni xigonzo xa mina. Hi 1978, nzi lo bapatizwa kota Mboni ya Jehova.

LEZI NZI NGA VUNEKISA ZONA:

A wutivi ga lisine la Biblia ga nzi vuna ku tiva lexi nzi hanyelako xona gi tlhela gi nzi rangela wutomini. Hi xikombiso, a bhuku ga 1 Pedro 3:1-4 gi kuca vasati lezaku va ‘ingisa’ vanuna vabye hi “xichawo” ni ku hlakulela “moya wa kurula ni kuolova, lowu wu nga ni tsengo wa hombe mahlweni ka Nungungulu.” A matshinya lawo ya milayo ma nzi vuna ku tatisa wutihlamuleli ga mina kota sati tlhelo mamani.

Ka hunza xipimo xa 35 wa malembe na nzi hi Mboni. Nzi tizwa nzi tsakile hi ku tirela Nungungulu kota xipanze xa ngango wa lisine wa moya. Ka vana va mina va ntlhanu, a mune wabye va zinwe na mina ngangweni lowo, lezi zonawu zi nzi nyikako litsako la hombe.