MIHLAMULO YA BIBLIA
Himani loyi hakunene a fumako tiko legi?
Loku ku wa hi Nungungulu a fumako tiko legi, ku wa tava ni kuxaniseka kontlhe loku hi ku wonako ke?
A vanhu vo tala va kholwa lezaku a Nungungulu wa lisine hi yena a fumelako tiko legi. Kanilezi loku lezo zi wa hi lisine, xana a misava yi wa tava ni wubihi go tala? (Deuteronome 32:4, 5) A Biblia gi wula lezaku a misava yi mandleni ya munhu wo biha. — Gonza 1 Johani 5:19.
Zi sukele kwihi a kuza a misava yiva mandleni ya munhu wo biha ke? Kusanguleni ka matimu ya vanhu, a ngelosi yo kari yi lo hluwukela Nungungulu yi tlhela yi kucetela a patswa wo sangula wa vanhu lezaku wu hluwukawo. (Genesisi 3:1-6) A patswa lowo wu lo hlawula ku ingisa ngelosi leyo yo hluwuka, ku nga Satani, wu mu maha mufumeli wabye. Nungungulu Nyamintamu hi yena yece a Mufumeli a faneleko, kanilezi i lava lezaku a vanhu va mu hlawula kota mufumeli wabye hi ku mu ranza. (Deuteronome 6:6; 30:16, 19) Lexi xi nga tsakisiko hi lezaku a kutala ka vanhu va kari va khohliswa va hlawula mufumeli wa hava a ku fana ni patswa lowo. — Gonza Kuvululelwa 12:9.
Himani a to mbheta zikarato za vanhu?
Xana Nungungulu i ta tsika Satani a simama ni wufumeli gakwe go biha? Ahihi! Nungungulu i ta tirisa Jesu kasi ku fuvisa a wubihi legi Satani a gi mahako. — Gonza 1 Johani 3:8.
Hi ntamu wa Nungungulu, Jesu i ta lovisa Satani. (Va Le Roma 16:20) Hi kulanzela, Nungungulu i ta fuma vanhu a tlhela a va tlhelisa wutomini go tsakisa ni go rula kota lezi a nga zi lavisile zona kusanguleni. — Gonza Kuvululelwa 21:3-5.