MIHLAMULO YA BIBLIA
Xana Jesu i vuxile vanhu va nga file hakunene?
Jesu i vuxile Lazaru hi ka vafileko, loyi ku nga hunza mune wa masiku na a file
A Biblia gi zi veka kubaseni lezaku Jesu i vuxile vanhu hi ka vafileko. A matimu lawo a hi tsheketo. Ma mahekile ka wutshamu ga lisine ni ka xikhati xo kongoma. Hi xikombiso, hi ximumu xa lembe ga 31 Nguveni ya Hina, a xidlemo xo kari xa hombe xi lo suka zinwe na Jesu le Kapernaume na vaya Naine. Laha va nga chikela, va lo kuma xidlemo xinwani. Hi kulanzela, Jesu i lo vuxa munhu hi ka vafileko. U nga kholwa a matimu lawo hakuva ma tsalilwe lomu ka Mhaka ya Nungungulu, a Biblia, niku zi mahekile na zi woniwa hi vanhu vontlhe lavo vo tala. — Gonza Luka 7:11-15.
Jesu i tlhelile a vuxa munghana wakwe Lazaru hi ka vafileko, loyi ku nga hunza mune wa masiku na a file. U nga kholwa a matimu ya lezi Jesu a nga maha hakuva zonawu zi wa woniwa hi vakustumunyu vo tala. — Gonza Johani 11:39-45.
Hikuyini Jesu a vuxileko vanhu hi ka vafileko?
Jesu i vuxile vanhu hi ka vafileko hakuva i wa kuciwa hi ku va zwela wusiwana. I tlhelile a maha lezo kasi ku komba lezaku a Dadani wakwe, a Muvangi wa wutomi, i mu nyikile ntamu wa ku hlula kufa. — Gonza Johani 5:21, 28, 29.
Lezi Jesu a vuxileko vanhu va nga file zi hi tiyisekisa lezaku lezi a tsumbisileko ku maha xikhatini xi tako, zi tiyile. I ta vuxa vanhu vo tala nguvu, a kupatsa ni vangalulamangiko lava va fileko na va nga tivi nchumu xungetano hi Nungungulu wa lisine. Va ta nyikiwa a xikhati xa ku tiva ni ku ranza Jehova Nungungulu. — Gonza Mitiro 24:15.