Hikuyini hi simamako ku maha Xilalelo xa Hosi?

1, 2. Zini lezi Jesu a zi mahileko ka wusiku ga 14 ka Nisani wa 33 Nguveni ya hina? (Wona mufota laha hehla.)

GI WA hi wusiku le Jerusalema, kanilezi ku wa hi ni kuwonekela ka hweti. Gi wa hi wusiku ga 14 ka Nisani wa 33 Nguveni ya hina. Jesu ni vapostoli vakwe va wa ha hi kuga Pasika, ku nga mubuzo wa ku alakanya a kutlhatlhiswa ka vaIsraeli wukhumbini ga le Gipite ku mahekileko 15 wa mazana ya malembe nzhako. Na a hi ni vapostoli vakwe vo tsumbeka va 11, Jesu i lo yimisa xilalelo xo hlawuleka — lexi xi to alakanyisa a kufa kakwe loku ku nga wa ta maheka na gi nga se mbhela siku lego.a — Mat. 26:1, 2.

² Jesu i lo katekisa xibaba xi nga hiko na comelo zonake a hunzisela vapostoli vakwe aku: “Tekani, muga.” I lo teka gombe ga vinya, a bonga kambe, aku: “Nwanani nwentlhe ha gona.” (Mat. 26:26, 27) Jesu i wa nga ta ha va nyika zinwani zoga, kanilezi i wa ha hi ni zotala za ku byela valanzeli vakwe vo tsumbeka ka wusiku lego.

3. Ziwutiso muni hi to wulawula hi zona ka nzima leyi?

³ Hi ndlela leyo, Jesu i lo yimisa a Xialakanyiso, lexi xi vitaniwako kambe lezaku “Xilalelo xa Hosi.” (1 Kor. 11:20) Mhakeni leyi a vokari va nga ha wutisa lezi: Hikuyini hi alakanyako a kufa ka Jesu? A xibaba ni vinya zi yimela yini? Hi nga ti longiselisa kuyini na hi nga seya Xialakanyisweni? Hi vamani va faneleko kuga xibaba ni kunwa vinya? Niku a maKristu ma hlamulisa kuyini ka lezi a Mitsalo yi wulako xungetano hi kutsumba kabye?

HIKUYINI HI ALAKANYAKO A KUFA KA JESU?

4. A kufa ka Jesu ku hi vululele ndlela ya yini?

⁴ Kota pswalo wa Adamu, hi thapelwe hi xionho ni kufa. (Rom. 5:12) A ku na munhu a nga mbhelelangiko a zi kotako ku hakhela nzhiho wa wutomi gakwe kutani ga vanwani ka Nungungulu. (Tis. 49:6-9) Kanilezi, hi kufa kakwe Jesu i lo hakhela a ntsengo wa nzhiho lowu wu nga wona woce wu amukelekako — ku nga miri wakwe ni nkhata wakwe wo mbhelela wu halatilweko. Hi ku hendleleta a ntsengo wa nzhiho ka Nungungulu, Jesu i lo vulula ndlela ya kuva hi tlhatlhiswa ka xionho ni kufa hi tlhela hi kuma a xinyikiwo xa wutomi ga pinzukelwa. — Rom. 6:23; 1 Kor. 15:21, 22.

5. a) Hi zi tivisa kuyini lezaku Nungungulu na Kristu va va ranza vanhu? b) Hikuyini hi faneleko kuva kona xialakanyisweni xa kufa ka Jesu?

⁵ A lulamiselo ga nzhiho ga hi tiyisekisa lezaku Nungungulu wa va ranza vanhu. (Joh. 3:16) A muphahlo wa Jesu xikombiso xa lezaku yenawu wa hi ranza. A xikhati lexi a nga tira kota “xigogo xa mitiro” xa Nungungulu na a nga seta misaveni, Jesu i wa “tsaka zinwe ni vana va vanhu”! (Mav. 8:30, 31) A mbilu yi bongako Nungungulu ni N’wana wakwe yi fanele ku hi kuca kuva kona xialakanyisweni xa kufa ka Jesu, hi ingisa a xileletelo lexi xi nge: “Mahani lezo kasi ku nzi alakanya.” — 1 Kor. 11:23-25.

A XIBABA NI VINYA ZI YIMELA YINI?

6. Hi fanele ku xi wonisa kuyini a xibaba ni vinya za Xialakanyiso?

⁶ A xikhati lexi a nga yimisa a Xialakanyiso, Jesu a nga hunzulangi xibaba ni vinya hi xihlamaliso zi maha nyama yakwe ni nkhata wakwe wa xiviri. Kanilezi, laha ka xibaba i lo wula lezi: “Lexi hi miri wa mina.” Laha ka vinya aku: “Lowu hi nkhata wa mina wa xivumelwano, lowu wu halatelweko a vanyingi.” (Mar. 14:22-24) Kota lezi Jesu a nga hi kona kwalaho, na va mu wona, zi te dlunya lezaku a xibaba ni vinya zi wa fanele ku woniwa kota zikombiso ntsena.

7. A xibaba lexi xi tirisiwako Xialakanyisweni xi yimela yini?

⁷ Ka ximaho lexo xa lisima nguvu hi 33 Nguveni ya Hina, Jesu i lo tirisa xibaba xi nga hiko na comelo lexi xi nga sala ka Pasika. (Ekso. 12:8) Lomu ka Mitsalo, a comelo gi yimela kubola kutani xionho. (Mat. 16:6, 11, 12; Luka 12:1) Hikwalaho, a kuva Jesu a tirisile xibaba xi nga hiko na comelo zi komba mhaka ya lisima hakuva xi yimela khwatsi a miri wakwe wu nga hiko na xionho. (Maheb. 7:26) Hi xigelo lexo, ku tirisiwa xibaba xa tshamela galego Xialakanyisweni.

8. Xana a gombe ga vinya gi tiriswako Xialakanyisweni gi yimela yini?

⁸ A vinya legi Jesu a nga gi tirisa hi 14 ka Nisani wa 33 Nguveni ya hina gi wa yimela a nkhata wa Jesu, niku nyamutlha kambe hi zalezo. Ka wutshamu gi vitwako Golgota, le handle ka Jerusalema, a nkhata wakwe wu lo halatiwa kasi a vanhu va ‘tsetselelwa zionho.’ (Mat. 26:28; 27:33) Kota lezi a xibaba ni vinya za Xialakanyiso zi yimelako muphahlo wo mbhelela lowu Jesu a wu maheleko vanhu vo ingisa ni lezi hinawu hi gi nyikako lisima lulamiselo legi, za fanela kuva hina wutsumbu hi ti longisela na hi nga seya Xilalelweni xa Hosi.

TINDLELA TO KARI TA KU TI LONGISELA

9. a) Hikuyini zi nga za lisima ku lanzela a longoloko wa kugonza ka Biblia ka nguva ya Xialakanyiso? b) U ti zwisa kuyini hi nzhiho?

⁹ Loku hi simama ku lanzela a longoloko wa kugonza ka Biblia ka nguva ya Xialakanyiso wu kumekako ka kalendari ga hina ni ka xibhukwana Kambisisa a Mitsalo siku ni siku, hi nga ehleketa hi lezi Jesu a mahileko na a nga sefa. Lezo zi ta hi vuna ku longisela a mbilu ya hina na hi nga seya Xilalelweni xa Hosi.b A makabye wo kari wa xisati i tsalile lezi: “Hi rinzela Xialakanyiso hi mahlo yo pswhuka. Lembe ni lembe xiya xi engetela kuva xo hlawuleka. Nza ha ti alakanya na nzi yimile ndlwini ya zirumbi . . . nzi cuwuka papai wa mina zonake nzi tala hi kubonga ka lisine hi nzhiho. . . . Nzi wa yi tiva yontlhe mitsalo nzi tlhela nzi zi kota a ku yi tlhamusela! Kanilezi ntsena ka xikhati lexo xo bayisa xa kufelwa hi kona a mbilu ya mina yi nga tala hi litsako hi kota ya lezi hi to mahelwa hi nzhiho lowu wa lisima.” Kunene, a xikhati lexi hi ti longiselelako Xialakanyiso, zi tava zi nene a ku hi ehleketa hi lezi a muphahlo wa Jesu wu hi tlhatlhisisako zona ka wukhumbi ga xionho ni kufa.

10. A malulamiselo ya Xialakanyiso ma nga khumbisa kuyini a wutireli ga wena?

¹⁰ A ku longisela Xialakanyiso zi nga ha patsa ku maha makungo ya ku engetela a wutireli ga wena hi ndlela yo kari, kuzilava hi kuva phayona go vunetela nguveni leyo ya Xialakanyiso. A xikhati lexi hi rambako zigonzani za Biblia ni vanhu vanwani lezaku vata Xilalelweni xa Hosi, hi ta kuma litsako la ku wulawula hi Nungungulu ni N’wana wakwe, zinwe nimakatekwa lawa Jehova a ma vekelako lava va mu tsakisako ni ku mu dumisa. — Tis. 148:12, 13.

11. A vokari le Korinte va waga ni kunwa a zikombiso za Xialakanyiso hi ndlela muni yi nga faneliko?

¹¹ A xikhati lexi u longiselako a Xilalelo xa Hosi, ehleketa hi lezi mupostoli Paule a nga tsalela maKristu ya bandla ga le Korinte. (Gonza 1 Va Le Korinte 11:27-34.) I lo komba lezaku ni wihi loyi a gako xibaba ni kunwa vinya na a nga ringanelwi “i tava ni nanzu wa miri ni nkhata wa Hosi,” Jesu Kristu. Hikwalaho, a munhu a totilweko i fanele ku ranga hi ku “ti hlola yena wutsumbu” hi kona a toga ni kunwa. Loku a nga mahi lezo, “i ti gela a ti nwela kulamulwa.” Hi kota ya mahanyela ya hava, a vaKorinte vo tala va wa hi “ni gome, va babya, ni vanwani va file” hi tlhelo ga moya. Kuzilava a vokari va waga ni kunwa nguvu mahlweni ka Xialakanyiso kutani kwalaha Xialakanyisweni laha koza va nga ha ti tivi. A kuga ni kunwa a zikombiso za Xialakanyiso hi ndlela leyo yi nga faneliko zi wa va maha va nga tsakelwi hi Nungungulu.

12. a) Paule i fananisile Xialakanyiso ni yini, niku xitlharihiso muni a nyikileko lava va gako ke? b) Zini lezi a munhu a gako xibaba ni kunwa vinya a faneleko ku maha loku a mahile xionho xa hombe?

¹² Paule i fananisile a Xialakanyiso ni zakuga hi gako ni vanwani, zonake a tlharihisa vagi aku: “A mu zi koti kunwa a gombe ga [Jehova] ni gombe ga madimoni; a mu zi koti ku gela mezeni ya [Jehova], ni mezeni ya madimoni.” (1 Kor. 10:16-21) Loku a munhu a gako a xibaba ni kunwa vinya Xilalelweni xa Hosi a mahile xionho xa hombe, i fanele ku kombela xivuno xa moya. (Gonza Jakobe 5:14-16.) Loku a muKristu loye a totilweko a humesa “mihanzu yi faneleko kuhunzuluka,” i wa nga ta ngha a nga kombisi xichawo hi muphahlo wa Jesu loku aga a xibaba ni kunwa vinya ga Xialakanyiso. — Luka 3:8.

13. Hikuyini hi nga vunekako loku hi khongela hi kutsumba loku Nungungulu a hi nyikako?

¹³ A xikhati lexi hina wutsumbu hi ti longiselelako Xialakanyiso, hi nga vuneka nguvu loku hi ehleketa ni ku khongela hi kutsumba loku Nungungulu a hi nyikako. A ku na nanza ga Jehova kutani mulanzeli wo tsumbeka wa N’wana wakwe a nga wa ta lava ku nga kombisi xichavo hi muphahlo wa Jesu hi kuga a xibaba ni kunwa vinya ga Xialakanyiso na a nga tiyiseki lezaku muKristu a totilweko. Makunu, a munhu a nga zi tivisa kuyini lezaku a ngaga xibaba ni kunwa vinya ke?

HIMANI A FANELEKO KUGA NI KUNWA?

14. A xivumelwano xiswa xi yelanisa kuyini ni kuga a zikombiso za Xialakanyiso?

¹⁴ Lava va gako ni kunwa zikombiso za Xialakanyiso hi fanelo, va tiyiseka hi kumbhelela lezaku va nzeni ka xivumelwano xiswa. Xungetano hi vinya, Jesu i te ngalo: “A gombe legi hi xivumelwano xiswa nkhateni wa mina.” (1 Kor. 11:25) Nungungulu i wa profetile hi ku tirisa muprofeti Jeremia lezaku i wa ta maha xivumelwano xiswa xo hambana ni xivumelwano xa nayo lexi a nga mahile ni vaIsraeli. (Gonza Jeremia 31:31-34.) Nungungulu i mahile xivumelwano xiswa ni vaIsraeli va moya. (Gal. 6:15, 16) A xivumelwano lexi xa xiswa xi tiyiswa hi muphahlo wa Kristu niku xi tira hi kota ya nkhata wakwe wu halatilweko. (Luka 22:20) Jesu hi yena Mutlhanganyisi ka xivumelwano xiswa; a vatotilweko vo tsumbeka lava va nghenako ka xona va kuma tshomba ya le tilweni. — Maheb. 8:6; 9:15.

15. Hi vamani va nghenisilweko ka xivumelwano xa Mufumo, niku i lungelo muni va to gi kuma loku va simama va tsumbekile?

¹⁵ Lava va ringanelwako hi kuga a zikombiso za Xialakanyiso va zi tiva lezaku va nghenisilwe ka xivumelwano xa Mufumo. (Gonza Luka 12:32.) Lava va nga maha valanzeli va totilweko va Jesu va tlhela va simama naye hi kutsumbeka, ni ku hlengela naye kuxaniseka kakwe, va wa ta fuma naye le tilweni. (Fil. 3:10) Kota lezi va nga ka xivumelwano xa Mufumo, a vatotilweko vo tsumbeka va ta fuma na Kristu kota tihosi kala kupinzuka le tilweni. (Kuv. 22:5) A vanhu lavo vaga a xibaba ni kunwa vinya Xilalelweni xa Hosi hi fanelo.

16. Tlhamusela kutsongwani lezi zi wuliwako ka Va Le Roma 8:15-17.

¹⁶ Ntsena lava va nga ni wukustumunyu ga moya ga lezaku i vana va Nungungulu hi vona va faneleko kuga ni kunwa Xialakanyisweni. (Gonza Va Le Roma 8:15-17.) Wona lezaku Paule i tirisile gezu ga xiAramaiko gaku “Abba,” gi wulako ku “O Dadani!” A nwanana a nga ha tirisa gezu legi loku a wulawula ni raru wakwe, hakuva gi patsa a gezu ga liranzo gaku “papa” ni gezu ga xichawo gaku “dadani.” Lava va amukeleko “moya wa wun’wana” i vana va Nungungulu va belekilweko hi moya. A moya Wakwe wu kustumunya ni moya wabye, yi va maha va zwisisa lezaku i vana va totilweko va Jehova. A hi mhaka ntsena ya ku kala va nga ha tsakeli ku hanya laha misaveni. Va tiyiseka lezaku va tava zigatshomba-kulobye na Jesu Mufunweni wa tilo loku va tsumbeka kala kufeni. Inyamutlha kova ni misalela ntsena ya valanzeli va Kristu va 144.000, lava va ‘totilweko hi Loyi wa Kubasa,’ Jehova. (1 Joh. 2:20; Kuv. 14:1) Va kanyuluka hi moya wakwe vaku “Abba! Dadani!” Hi nga wona a wuxaka lego va nga nago na Nungungulu!

U KU WONISA KUYINI A KUTSUMBA KA WENA KA MITSALO?

17. Hi kwihi kutsumba ka vatotilweko, niku va ku wonisa kuyini?

¹⁷ Loku u hi muKristu a totilweko, a kutsumba ka le tilweni i mhaka ya lisima mikhongelweni ya wena. Loku a Biblia gi wulawula hi “ku wutiwa” hi Muteki wa le tilweni, Jesu Kristu, u zi wona na zita ka wena, zonake u rinzela kuva xipanze xa “muswika” wa Kristu. (2 Kor. 11:2; Joh. 3:27-29; Kuv. 21:2, 9-14) Loku a Mhaka ya Nungungulu yi wulawula hi liranzo lakwe hi vana vakwe va moya, u ngalo: “Lezo ku wuliwa mina.” Loku a Mhaka ya Jehova yi nyika zileletelo ka vana vakwe va totilweko, a moya wa kubasa wu ku kuca ku ingisa u tlhela u wula lezi mbilwini ya wena: “Lezi zita ka mina.” A moya wa Nungungulu ni moya wa wena yi patsana yi nyika wukustumunyu ga lezaku u na ni kutsumba ka ku ya hanya tilweni.

18. Kutsumba muni loku va nga nako lava va “tiyivu tinwani,” niku u ti zwisa kuyini hi lezo?

¹⁸ Loku u hi wa “xidlemo xa tsanza-vahlayi” xa “tiyivu tinwani,” Nungungulu i ku nyikile kutsumba ka ku hanya laha misaveni. (Kuv. 7:9; Joh. 10:16) U lava ku hanya paradiseni kala kupinzuka, niku wa tsaka hi ku ehleketa hi lezi a Biblia gi wulako xungetano hi wutomi ga wena laha misaveni xikhatini xi tako. U rinzela hi mahlo yo pswhuka a ku ti buza hi kurula ka hombe na u hi zinwe ni maxaka ya wena ni vanhu vanwani vo lulama. U donela mari a xikhati lexi a tindlala, ni wusiwana, ni kuxaniseka, ni mababyi, ni kufa zi to kala zi nga ha xanisi vanhu. (Tis. 37:10, 11, 29; 67:6; 72:7, 16; Isa. 33:24) U xuva ku amukela lava va to vuxiwa hi ka vafileko na va hi ni kutsumba ka ku hanya kala kupinzuka laha misaveni. (Joh. 5:28, 29) A wo ku mu bonga Jehova hi makatekwa lawo ya kutsumba ka ku hanya laha misaveni! Hambu lezi u nga giko xibaba ni kunwa vinya, waya Xialakanyisweni kota ndlela ya ku kombisa ku bonga a muphahlo wu tlhatlhisako wa Jesu Kristu.

U TAVA KONA KE?

19, 20. a) A kutsumba loku u nyikwako hi Nungungulu ku ta tatiseka loku u ku yini? b) Hikuyini u tova kona Xilalelweni xa Hosi?

¹⁹ Kani a kutsumba ka wena ka laha misaveni kani ka le tilweni, ku ta tatiseka ntsena loku u kombisa kukholwa ka Jehova Nungungulu, Jesu Kristu, ni ka nzhiho. Hi kuva kona Xialakanyisweni, u tava ni lungelo ga ku ehleketa hi kutsumba loku u nga nako ni lisima la hombe la kufa ka Jesu. Hikwalaho, maha makungo ya kuva munwe wa vanhu va timiliyoni lava va to kumeka Xilalelweni xa Hosi hi Wazihlanu wa 3 ka Abril wa 2015 anzhako ka kupela ka gambo, tiSalawini ta Mufumo ni ka matshamu manwani misaveni yontlhe.

²⁰ A kuva kona Xialakanyisweni zi nga ha engetela a kubonga ka wena hi muphahlo wu tlhatlhisako wa Jesu. A ku demba khwatsi ndleve ka kanelo leyi yi to vekiwa zi nga ha ku kuca ku kombisa liranzo la wena hi vaakelane hi ku va hlawutela lezi u zi gonzileko xungetano hi liranzo la Jehova ni kungo gakwe ga hombe hi vanhu. (Mat. 22:34-40) Maha zontlhe zi lavekako kasi u nga choti.