Nzi lo hlamaliswa nguvu hi ku dlunyateka ka Biblia, ni mihlamulo ya gona yo zwala

KALE KA MINA:

Nzi pswalilwe le Székesfehérvár, Hungria, ku nga doropa gi nga ni matimu yo tala ya kwalomo ka 1.000 wa malembe ma hunzileko. Lexi xi nga tsakisiko, hi lezaku nza ha simama ku alakanya a zilo lezi zi onhetelweko hi yimpi ya wumbiri ya misava.

Kusukela wunwananeni ga mina, nzi wa wundliwa hi vakokwani. Nza ha gi alakanya khwatsi a wunene gabye — nguvunguvu ga kokwani wa mina Elisabeth. I tiyisile a kukholwa ka mina ka Nungungulu. Laha nzi nga hi ni malembe manharu, nzi wa maha naye hi kuphindaphinda a mukhongelo lowu wu vitaniwako a ku Mukhongelo wa Hosi. Kanilezi, kala laha nzi nga hi kusuhani ni ku tlhanganyisa a 30 wa malembe, hi kona nzi nga tiva a tlhamuselo wa mukhongelo lowu.

A vakokwani va mina va nzi wundlile kusukela wunwananeni ga mina, hakuva a vapswali va mina va wa tira mumu ni wusiku na va zama ku hlengeletela mali yo ringana ku xava muti wa wu nene. Hambulezo, ka Mulongiso wunwe ni wunwani wa wumbiri nzeni ka hweti, a ngango wontlhe wu wa tlhangana kasi kuga zinwe. Nzi wa zi tsakela nguvu a zikhati lezo hi nga tlhangana hontlheni.

Hi 1958, lezi a vapswali va mina va nga zi xuva nguvu zi lo tatiseka, va lo zi kota ku xava a muti lowu hina va vanharu hi nga hanya ka wona. Hi kugumesa nzi lo ya tshama zinwe ni vapswali va mina — nzi lo tsaka nguvu! Kanilezi, anzhako ka ntlhanu wa tihweti ni yinwe a litsako la mina li lo mbhela hi xitshuketi. A papai wa mina i lo dawa hi kankro.

Nzi lo sala wusiwaneni. Nzi wa khongela nziku: “Nungungulu nza ku khongotela a kuva u hlayisa a papai wa mina. Nza mu lava nguvu. Hikuyini u nga nzi hlamuliko mikhongelo ya mina?” Nzi wa lava ku tiva lomu a papai wa mina a nga hi kona. Nzi lo ti wutisa lezi: ‘Xana i yile tilweni? Kutani i lovile?’ Nzi wa va navela nguvu a vanana lava va nga hi ni vapapai.

Hi malembe yo tala, nzi waya xilahleni hi kukhanzakanya. Nzi wa khizama laha xilahleni xa papai, nzi khongela nziku: “Nungungulu nzi lava ku tiva lomu a papai wa mina a nga kona.” Nzi wa maha mukhongelo wa ku lava ku vuniwa ku tiva a ku hi hanyela yini.

Laha nzi nga hi ni 13 wa malembe, nzi lo boha ku gonza a xiAlemão. Nzi lo alakanya lezaku nzeni ka mabhuku ya xiAlemão, kuzilava nzi wa ta kuma mihlamulo ya ziwutiso za mina. Hi 1967, nzi lo sangula ku gonza le doropeni ga Jena, zonake hi nzhako ka xikhati nziya ka tlhelo ga Mutsuwuka-gambo wa Alemanha. Nzi wa ranza ku lera mabhuku ya vatsali va filozofia va le Alemanha, nguvunguvu lawa ma nga wulawula hi lezi a vanhu va hanyelako zona. Hambu lezi nzi nga kari nzi kuma mawonela yo kari yo tsakisa, ne manwe ya wona ma hlamulileko ziwutiso za mina. Nzi lo simama ku maha mukhongelo kasi nzi kuma mihlamulo.

LEZI A BIBLIA GI NGA CICISA ZONA A WUTOMI GA MINA:

Hi 1970, nzi lo tlhela le Hungria, lomu nzi nga tivana na Rose, loyi nzi nga gumesa nzi chada naye. Ka xikhati lexo a tiko ga Hungria gi wa tirisa a socialismo. Xikhatanyana nzhako ka kuva mina na Rose hi chadile, hi loya le Áustria. A kungo ga hina ku wa hi kuya le Sydney, Austrália, lomu ku nga hanya tio wa mina.

Zalezo nzi lo kuma ntiro le Áustria. Ka siku go kari, a mutiri-kulori wo kari i lo nzi byela lezaku nzi nga kuma mihlamulo ya ziwutiso za mina lomu ka Biblia. I lo nzi nyika a mabhuku yo kari ma nga wulawula hi Biblia. Nzi lo gonza wontlhe hi xihatla, nzi tlhela nzi lava ku tiva zinwani. Hikwalaho, nzi lo tsalela a Timboni ta Jehova, lava va nga humesile a mabhuku lawo, nzi kombela manwani.

Ka siku legi hi nga tlhanganyisa lembe na hi chadile, mina na Rose hi lo enzelwa hi Mboni ya jaha ya xisumbulwa xa le Áustria. I lota ni mabhuku lawa hi nga kombele a tlhela a nzi byela lezaku loku nzi zi lava a nga nzi fambisela a xigonzo xa Biblia. Nzi lo vumela. Kusukela kwalaho nzi lo zi tsakela nguvu a ku gonza, hi wa gonza kumbiri hi viki — ka xigonzo xinwe ni xinwani hi wa mbheta xipimo xa mune wa tihora na hi gonza!

Nzi wa zi tsakela nguvu lezi nzi nga zi gonza lomu ka Biblia ni Timboni ta Jehova. Laha va nga nzi komba a vito ga Nungungulu, Jehova, lomu ka Biblia ga xiHungria, zi lo nzi hlamalisa nguvu. Nzeni ka 27 wa malembe na nziya chechini, nzi wa nga se tshuka nzizwa a vito ga Nungungulu na gi kumbukiwa. Nzi lo hlamaliswa nguvu hi ku dlunyateka ka Biblia, ni mihlamulo ya gona yo zwala ya ziwutiso za mina. Hi xikombiso, nzi lo tiva lezaku a vafileko a va tivi nchumu, a ku fana ni loku munhu a etlele wurongo ga tshongotshongo. (Mutshawuteli 9:5, 10; Johani 11:11-15) Nzi lo tlhela nzi tiva a xitsumbiso xa Biblia xa misava yiswa, lomu ku to kala ku ‘nga ha hi na kufa.’ (Kuvululelwa 21:3, 4) Nzi lo sangula ku rinzela ku tlhela nzi wona a papai wa mina, misaveni leyo ya yiswa, lomu ku tova “kona a kuvuka ka” vafileko. — Mitiro 24:15.

Rose yenawu i lo gonza a Biblia. Hi lo hatlisa nguvu ku kula hi tlhelo ga moya, hi lo mbheta ku gonza bhuku nzeni ka tihweti timbiri ntsena! Hi loya mitlhanganweni yontlhe ya Timboni ta Jehova yi nga mahelwa lomu ka Salawu ya Mufumo. Hi lo khumbiwa nguvu hi liranzo, kuzwanana, ni lezi a Timboni ta Jehova ti vunanisako zona. — Johani 13:34, 35.

Hi 1976, mina na Rose hi loya le Austrália. Hi lo tekela ku kuma Timboni ta Jehova kwaseyo. A Timboni leto ti lo hi maha hi tizwa na hi hi kaya. Hi 1978, hi lo bapatizwa, hiva Timboni ta Jehova.

LEZI NZI NGA VUNEKISA ZONA:

Hi kugumesa nzi lo kuma mihlamulo ya ziwutiso lezi zi nga nzi xanisa hi xikhati xo leha. Hi kuva nzi tshinele ka Jehova Nungungulu, nzi tlhelile nzi kuma Papai wa mu nene ku hunza vontlhe va nga kumiwako. (Jakobe 4:8) Niku nzi zi rinzela hi mahlo yo pswhuka a ku tlhela nzi wona a papai wa mina wa ku nzi pswala. — Johani 5:28, 29.

Hi 1989, mina na Rose hi lo boha ku tlhela Hungria lezaku hi ya bhulela a vanghana va hina ni maxaka hi kukholwa ka hina, zinwe ni vanwani lava hi nga wa ta va kuma. Hi vile ni lungelo ga ku gonzisa Biblia a vanhu vo tala. Niku xikari kabye a ku hunza 70 wa vona va lo maha Timboni; va tirela Jehova a ku fana na hina, a ku patsa ni mamani wa mina wo ranzeka.

Nzi lo maha mukhongelo hi xipimo xa 17 wa malembe kasi nzi kuma mihlamulo ya ziwutiso za mina. Zalezi ka hunza a 39 wa malembe, niku nza ha simama ku maha mukhongelo — kanilezi ntsena nzi wula lezi: “Nza ku bonga Dada wa mina wo ranzeka wa le tilweni, hi kuva u nzi hlamulile a mikhongelo ya mina ya kusukela wunwananeni ga mina.”