A ku tekana ‘Hosini ntsena’ za ha tira ke?

A malanza yo kari ya Nungungulu ma tshuka ma wula magezu lawo xungetano hi ku kuma munhu wo tekana naye. Hambulezo, va gi tiva khwatsi a wusungukati ga Paule ga ku tekana ‘Hosini ntsena’— legi gi faneleko ku rangela maKristu wontlhe. (1 Kor. 7:39) Makunu, hikuyini va zako va wula lezo?

HIKUYINI A VOKARI VA KANAKANAKO?

Lava va wulako lezo va alakanya lezaku a ntsengo wa vamakabye va xinuna a wu ringani ni ntsengo wa lava va xisati. Kunene, matikweni yo tala zi tshamisile lezo. Wona zikombiso zimbiri: Xikari ka 100 wa Timboni ta magwenza le Corea, a xipimo xa 57 wa tona vavasati, a 43 vavanuna. Le Colômbia ku bikwa lezaku a 66 wa tipursento ta Timboni vavasati, a 34 vavanuna.

Matikweni yo kari, a xikarato xa hombe hi lezaku a vapswali va nga kholwiko va nga ha lonza lowolo wo dura, va maha lezaku vamakabye va xinuna va zisiwana zi va karatela ku chada. Hi ku wona zikarato lezo, a makabye wa xisati a nga ha alakanya lezaku a ku kuma munhu wo tekana naye “Hosini” zi ngoya hi ku tshuka. A nga ha ti wutisa lezi: “Xana ku wa nga tava ku ti kalavela a ku alakanya lezaku nzi ta kuma munhu wo faneleka wo tekana naye xikari ka maKristu-kulori ke?”a

A KU TSUMBA JEHOVA ZA LISIMA

Loku ku hi lezaku wa tshuka u telwa hi maalakanyo lawo, tiyiseka lezaku Jehova wa xi zwisisa xiyimo xa wena. Wa zi tiva lezi u ti zwisako zona hi mhaka leyi. — 2 Kro. 6:29, 30.

Hambulezo, Jehova i yimisile Mhakeni yakwe a xileletelo xa ku tekana Hosini ntsena. Hikuyini? Hakuva wa zi tiva lezi zi nga zi nene ka vanhu vakwe. A hi ku khwatsi o lava ku vikela malanza yakwe ka mihanzu yo bayisa ya ku maha xiboho xa wupumbu ntsena kanilezi i lava kambe lezaku ma tsaka. Masikwini ya Nehemia, laha a vaJuda vo tala va nga kari va tekana ni vamatiko lava va nga kala va nga khozeli Nungungulu, Nehemia i lo kumbuka a xikombiso xo biha xa Solomoni. Hambu lezi Solomoni a nga “ranziwa hi Nungungulu, . . . a vavasati va matiko va lo mu onhisa.” (Neh. 13:23-26) Hikwalaho, hi ku ranza malanza yakwe nyamutlha, Nungungulu i hi leletela ku tekana ni vakhozeli va lisine ntsena. (Tis. 19:7-10; Isa. 48:17, 18) A maKristu ya lisine ma bonga hi kukhatala ka liranzo ka Nungungulu ma tlhela ma tsumba wurangeli gakwe ga wutlhari. Hi ku ti koramisa ma mu ingisa kota Hosi, ma komba lezaku ma mu wona kota yena a nga Hosi ya Wuako gontlhe. — Mav. 1:5.

Handle ko kanakana u lava ku potsa ku ‘bohelwa ntsungwa munwe’ ni munhu loyi a nga ku hambukisako na Nungungulu. (2 Kor. 6:14) A maKristu yo tala nyamutlha ma ingisa xileletelo lexi xa Nungungulu xi sinako xi wonekile lezaku xa vikela, ma tlhela ma zi wona lezaku lexo xiboho xa wutlhari. Kanilezi ma kona ma hlawulako ku nga xi ingisi.

ZA HA TIRA

Maggy,b a nga makabye wa xisati le Austrália, i tlhamusela lezi zi nga humelela a xikhati a nga sangula ku gangisana ni munhu a nga kholwiko. I ngalo: “Nzi lo lova mitlhangano yo tala kasi kuva naye. Nzi lo hola hi ku hatlisa hi tlhelo ga moya.” Ratana, wa le Índia i lo sangula ku ranzana ni xigonzani-kulobye xi nga sangulile ku gonza Biblia. Kanilezi hi kufamba ka xikhati, a jaha lego gi lo zi kombisa lezaku lexi gi xi lavako ku ranzana naye. Hi magumo, Ratana i lo tsika lisine a nghena ka wukhongeli ginwani kasi ku tekana nago.

A xikombiso xinwani xa Ndenguè wa le Camarões. I wa hi ni 19 wa malembe a xikhati a nga chada. A xigango xakwe xi wa mu tsumbisa lezaku xi wa ta mu tsika aya wukhongelini gakwe. Kanilezi, anzhako ka maviki mambiri na va chadile, a nuna wakwe i lo mu beletela kuya mitlhanganweni ya wuKristu. I bika lawa: “Nzi lozwa xiwunza nzi tlhela nzi rila. Nzi lo wona lezaku nzi xakele wutomi ga mina. Nzi wa tshama hi ku ti sola.”

Kunene, a hi vontlhe vanuna kutani vasati va nga kholwiko va levako hi ndlela leyo. Hambulezo, hambu loku u nga xaniseki hi ku ngha u tekene ni munhu a nga kholwiko, a wuxaka ga wena ni Dadani wa wena wa liranzo wa le tilweni gi wa ta khumbiswa kuyini? U wa ta ti zwisa kuyini hi ku tiva lezaku a wu ingisangi a wusungukati legi a ku nyikileko hi ku lava ku ku vuna? Niku a ku hunza zontlhe lezo, i wa ta ti zwisa kuyini hi xiboho xa wena? — Mav. 1:33.

A vamakabye va xinuna ni va xisati misaveni yontlhe lava va ingisako a wusungukati ga ku tekana ‘Hosini ntsena’ va zi wona lezaku lego hi gona gi nga wutlhari. Lava va kalako va nga se chada va ti yimisele ku tsakisa a mbilu ya Nungungulu; va lava munhu wo tekana naye xikari ka vakhozeli va lisine ntsena. Michiko le Japani, makabye wa xisati loyi a maxaka yakwe ma zamileko ku mu kuca ku tekana ni munhu a nga kholwiko. Ahandle ka tshikelelo lowo, i lo wona vanghana vakwe ni vanhu vanwani a va tivako na va ti kumela vanghana va wukati lomu bandleni. I ngalo: “Nzi wa tshama hi ku ti byela lezaku kota lezi Jehova a nga ‘Nungungulu wo tsaka,’ a litsako la hina a li khegeli ka lezaku hi chadile kutani a hi chadangi. Nza kholwa kambe lezaku wa tatisa kuxuva ka timbilu ta hina. Hikwalaho loku hi nga mu kumi munhu wo tekana naye hambu loku hi mu lava, i chukwana ku tshama hi hi magwenza hi xikhati xo kari.” (1 Tim. 1:11, Tradução do Novo Mundo) Hi magumo Mechiko i lo kuma nuna wa mu nene, niku wa tsaka hi lezi a nga rinzela.

A ku fana na Mechiko, a vamakabye vo kari va rinzela kasi ku kuma munhu wo faneleka wa ku tekana naye. A munwe wabye hi Bill wa le Austrália. I wula lezaku i wa tshuka a navela vavasati va le handle ka bandla. Hambulezo, i wa potsa kuva ni wunghana ga hombe navo. Hikuyini? I wa nga lavi kuba zambo go sangula legi gi yisako ka ku ‘bohelwa ntsungwa munwe’ ni munhu a nga kholwiko. Ku wa hi ni vamakabye vo kari va xisati a nga va navela, kanilezi vona va wa nga mu lavi. Bill i lo rinzela 30 wa malembe, hi kona a nga kuma makabye wa xisati va nga yelana. Bill i ngalo: “A nzi ti layi.” I engeta aku: “Nzi ti wona nzi katekile, hakuva hi famba zinwe wutirelini, hi gonza zinwe, hi tlhela hi khozela zinwe. Za nzi tsakisa ku tivana ni ku hlakana ni vanghana va sati wa mina hakuva vontlhe vakhozeli-kulori va Jehova. Wukatini ga hina hi tirisa a matshinya ya milayo ya Biblia.”

A XIKHATI HI RINZELAKO JEHOVA

Zini u nga mahako na wa ha rinzela hlamulo wa Jehova ke? A xinwe xa zilo u nga mahako ku ehleketa hi xigelo xo kala u nga se chada. Loku u wona lezaku a xigelo xa hombe xi seketelwa ka xileletelo xa Biblia xa ku tekana ‘Hosini ntsena,’ wa dzunziwa hi ku ingisa a xileletelo xa Nungungulu. Tiyiseka lezaku Jehova wa tsaka hi kuva u ti yimisele ku ingisa Mhaka yakwe. (1 Sam. 15:22; Mav. 27:11) U nga simama ku ‘chulula mbilu ya wena’ ka Nungungulu hi mukhongelo. (Tis. 62:8) A mikhongelo ya wena yi ngava ni ntamu nguvu loku u yi maha hi kutikisa u tlhela u nga tsiki. A wuxaka ga wena na Nungungulu gi ta tiyiswa siku ni siku loku u simama u tiyile hambu lezi u lwako ni tshikelelo wa mbilu ya wena ni wa vanwani. Tiyiseka lezaku Nungungulu Loyi a Hunzeleleko Kutlakuka wa khatala hi malanza yakwe wontlhe yo tsumbeka niku u wa lisima mahlweni kakwe. Wa khatala hi zilaveko za wena ni kuxuva ka wena. A nga tsumbisi munhu lezaku i ta mu lavela munhu wo tekana naye. Hambulezo, loku hakunene u hi ni xilaveko xa munhu wo tekana naye, Nungungulu wa yi tiva a ndlela ya chukwana ya ku tatisa a kunavela ka wena ka lisine. — Tis. 145:16; Mat. 6:32.

Ka zikhati zo kari u nga ha ti zwisa ku khwatsi hi Davida loyi a ngaku: “Jehova, hatlisa u nzi hlamula, a moya wa mina wa mbhela ntamu; u nga nzi fihleli nghohe ya wena.” (Tis. 143:5-7, 10) Ka zikhati lezo, mu nyike xikhati a Dadani wa wena wa le tilweni xa ku komba a ku hi kwihi kuranza kakwe hi wena. U nga maha lezo hi ku ti nyika xikhati xa ku gonza Mhaka yakwe u tlhela u ehleketa hi lezi u gonzako. U ta tiva milayo yakwe u tlhela u wona lezi a vunisileko zona a malanza yakwe xikhatini xi hunzileko. A xikhati u zwako gezu gakwe, u ta engetela kutsumba ka wena ka lezaku a ku ingisa milayo yakwe hi gona gi nga wutlhari.

Zini zinwani zi nga ku mahako u tsaka u tlhela u bhinzula malembeni ya wena ya wugwenza? U nga tirisa a wugwenza ga wena kasi ku hlakulela a kupima ka moya, kuhana, zigingi, kuranzeka, kuhiseka, ni vito gi nene — ma nga matshamela ma lavekako nguvu kasi kuva ni litsako ngangweni. (Gen. 24:16-21; Rute 1:16, 17; 2:6, 7, 11; Mav. 31:10-27) Lava Mufumo wa Nungungulu kuranga hi ku hiseka ntirweni wa kuxumayela ni ka yinwani mitiro ya wuKristu; lezo zi ta ku vikela. Bill, loyi a kumbukilweko le hehla, i wula lezi hi malembe lawa a nga rinzela munhu wa ku tekana naye: “A ma no ku tsutsuma! Nzi tirisile xikhati lexo kasi ku tirela Jehova kota phayona.”

Kunene, a ku tekana ‘Hosini ntsena’ za ha tira. A ku ingisa xileletelo lexo zi nga ku vuna ku neha wudzunzo ka Jehova u tlhela u kuma litsako la pinzukelwa. A Biblia gi ngalo: “I katekile a munhu loyi a chavako Jehova, loyi a tsakelako nguvu milayo yakwe. A titshomba ni kufuma zi tava ndlwini yakwe, a kululama kakwe ku simamisa kala kupinzuka.” (Tis. 112:1, 3) Hikwalaho, ti yimisele ku hlayisa a nayo wa Nungungulu wa ku tekana ‘Hosini ntsena.’