Kukarateka hi kota ya mhango

Alona i wula lezi: “A xikhati nzi ngazwa a xitlharihiso xa lezaku ku tava ni mhango, a mbilu ya mina yi lo sangula kuba zonake nzi tsutsuma nziya ka wutshamu ga ku vikela timhango, loku ku buwuka mabhomba kutani zinwani. Kanilezi hambu kwalomo nzi lo karateka. A xa kubiha nguvu ku a xikhati lexi nzi nga huma lahandle ku wa nga hi na wutshamu go fihlala kona. Zonake na nzi famba laha ruweni, nzi lo sangula ku rila laha ka kuza nzi nga ha zi koti ni ku hefemula. Zi tekile tihora kasi nzi tlhela nzi rula. Zonake, a xitlharihiso xa mhango xi lo zwala kambe.”

Ka zontlhe lezi zi vangako timhango, a yimpi hi yona yo sangula. Hi xikombiso, a ku tiva lezaku wena kutani a munhu wo kari u mu ranzako i na ni wubabyi ga hombe zi nga fana ni loku u no bayisiwa hi bhomba kutani xibhamu. Niku a vanwani va karateka hi ku chava za manziko. Va karateka vaku: ‘Xana a vana va hina, kutani vana vabye, va ta hanya ka misava ya yimpi, ya wugevenga, yi chakisilweko, ya ku hisa kutani ku titimela nguvu, ni yo tala hi mitungu?’ Hi yihi ndlela ya ku lwisana ni kukarateka loko?

Hi ku tiva lezaku a zilo za kubiha za humelela, “a munhu a tlharihileko wa wona mhango a fihlala.” (Mavingu 27:12) Niku khwatsi hi lezi hi zamako ku vikela miri wa hina lezaku wu hanya khwatsi, hi nga teka mazambo yo kari kasi ku vikela a maalakanyo ni kutizwa ka hina lezaku ziva ka xiyimo xi nene. A mihlakano yi kombisako wugevenga ni zihaxa-mahungu zi teleko hi zilo zo tshisa zi nga engetela a kukarateka ka hina ni ka vana va hina. Kanilezi, a ku potsa zithombe zi kombisako wugevenga a zi wuli ku ala lisine la zilo. Nungungulu a nga mahangi maalakanyo ya hina lezaku ma tshama hi ku alakanyela zilo za kubiha. A kuhambana ni lezo, hi fanele ku ma tata hi zilo ‘zontlhe zi nga zi nene, zi lulamileko, zi basileko, ni zi ranzekako.’ Loku hi maha lezo, “Nungungulu wa kurula” i ta hi nyika kurula ka maalakanyo ni ka mbilu. — Va Le Filipi 4:8, 9.

LISIMA LA MUKHONGELO

A kukholwa ka lisine ku hi vuna a ku lwisana ni kukarateka. A Biblia gi hi kuca ‘ku tshama na hi rinzele hi ku maha mikhongelo.’ (1 Pedro 4:7, NM) Hi nga kombela Nungungulu lezaku a hi vuna, a hi nyika wutlhari ni kutiya-hlana lezaku hi maha lezi hi zi kotako ka xiyimo xa hina, na hi tsumba ‘lezaku wa hizwa, ni ka xihi hi xi kombelako.’ — 1 Johani 5:15.

A Biblia gi wula lezaku Satani, na ku nga hi Nungungulu, hi yena ‘hosana ya tiko legi’ ni lezaku “a tiko gontlhe gi le ntanwini wa loyi wa kubiha.” (Johani 12:31; 1 Johani 5:19) Hikwalaho, Jesu a nga tirisangi a magezu yo fananisa a xikhati lexi a nga hi gonzisa a kukhongela hiku: “Hi tlhatlhise ka loyi wa kubiha.” (Mateu 6:13) Alona i ngalo: “Ni ka xihi xikhati nzi zwako xitlharihiso xa kuta ka mhango, nzi kombela Jehova lezaku a nzi vuna a ku ti khoma. A nuna wa mina wo ranzeka i tlhela a nzi vitana hi ta khongela zinwe. A mukhongelo wa nzi vuna nguvu.” Zi tano hi laha a Biblia gi wulako hi kona: “Jehova i kusuhi ni vontlhe lava va mu khongelako, lava va mu vitanako hi zinene.” — Tisimu 145:18.

LEZI HI ZI RINZELAKO XIKHATINI XI TAKO

Ka kanelo yakwe ya le xitsungeni, Jesu i gonzisile a valanzeli vakwe va khongela vaku: “A wute mufumo wa wena.” (Mateu 6:10) A Mufumo wa Nungungulu wu ta fuvisa kukarateka kontlhe kala kupinzuka. Hi ku tirisa Jesu, a “Hosi ya kurula,” Nungungulu i ta “maha a tiyimpi ti khawula kala magumelweni ya misava.” (Isaya 9:6; Tisimu 46:9) ‘Nungungulu i ta lamula matiko manyingi, a tiko ginwe gi nga ta vukela ginwani hi matlhari, cima va nga ta ha gonza kulwa kambe. Niku a nga kona a ta nga va chavisa.’ (Mika 4:3, 4) A mingango yi tsakileko yi ta ‘aka tiyindlu yi tshama ka tona, ni loku yi byala zivina yi taga mihanzu ya zona.’ Niku “a ku na muaki ni munwe a ta ngaku: Nza babya!” — Isaya 33:24.

Inyamutlha, hambu lezi ku nga ni zitlharihiso zo tala, a hi xontlhe xikhati zi kotekako a ku valela ‘zilo zo dzuka zi humelela’ kutani ku potsa kuva ka wutshamu go kari hi xikhati xa hava. (Mutshawuteli 9:11) Khwatsi hi lezi zi ngava tano hi mazana ya malembe, a tiyimpi, wugevenga, ni mababyi za ha simama ku daya vanhu va va nene. Kurinzela muni ku nga kona hi vanhu lavo vo kala nanzu va delweko?

A vanhu lavo va timiliyoni ta tsanza-vahlayi, a ntsengo wabye wu tiviwako hi Nungungulu ntsena, va ta tlhela va hanya. Kanilezi zezi, va lo etlela, na va hlayisekile maalakanyweni yo mbhelela ya Nungungulu, kala ka siku legi “vontlhe va nga le zilahleni va ta . . . huma.” (Johani 5:28, 29) Na gi wulawula hi kuvuxiwa ka vafileko, a Biblia gi hi tiyisa giku: “A kutsumbeni loku hi na ni xirikhiso xa muhefemulo, lexi xi tsumbekileko ni ku tiya.” (Maheberu 6:19) Niku Nungungulu “i nyikile a xitsumbiso ka vanhu vontlhe, hilezi a nga mu vuxa hi ka vafileko [Jesu].” — Mitiro 17:31.

Zalezi hambu lava va ti karatelako ku tsakisa Nungungulu va tshuka va karateka. Hi kuva Paul, Janet, na Alona va tirisa tindlela ti vunako to kota ku tshinela ka Nungungulu hi mukhongelo, kuva ni kukholwa ko tiya hi xitsumbiso xa Biblia xungetano hi xikhati xi tako, vontlhe va humelela kulwisaneni kabye ni kukarateka. Khwatsi hi lezi a nga mahisa lezo ka ziyimo zabye, ‘Nungungulu loyi a nyikako kutsumba a ku tati hi kutsaka kontlhe ni kurula, laha u kholwako ka yena.’ — Va Le Roma 15:13.