Zezi nzi ti wona na nzi ringanelwa hi ku vuna vanwani

KALE KA MINA:

Nzi pswalilwe le Acul, xi nga xidoropana xi nga tlhelweni ga mupela-gambo. A xidoropana lexo xi ka matshamu ya zitsunga ya Guatemala. A ngango wa hina wu huma ka vaIxil, ku nga lixaka li humako ka vaMaia. Ahandle ka xiPanyoli, nzi kulile na nzi wulawula lirimi la hina la mabeleko. A malembe yo sangula ya wutomi ga mina ma kotleni ni yimpi yo tshisa ya xinwanamamani yi mbhetileko 36 wa malembe le Guatemala. Ku file vaIxil vo tala yimpini leyo.

A xikhati nzi nga hi ni mune wa malembe, a makabye wa mina wa 6 wa malembe i wa kari a hlakana hi bhomba ga lixaka lo kari gi vitwako granada legi gi nga buwuka hi xitshuketi. Kota wuyelo ga mhango leyo, nzi lofa mahlo; zi bayisa ni ku zi wula, a makabye wa mina i lofa. Anzhako ka lezo, nzi lo mbheta wunwanana ga mina xikoleni xa vanana va zikhumu Doropeni ga Guatemala, ku nga lomu nzi nga gonza kona a xiBraile. Hi zigelo nzi nga kala nzi nga zi zwisisi khwatsi, a vatiri va xikola lexo va lo nzi beletela ku bhula ni vanana vanwani niku a zigonzani-kulori zi wa nga ti tlhanganyisi na mina. Nzi wa tshama ni xiwunza ni ku xuva a maferiya ya tihweti timbiri hi nga kari hi ma kuma lembe ni lembe, laha nzi ngaya kaya nzi ya tshama na mamani, loyi a nga nzi kombisela liranzo ni wunene ga hombe. A ya kubiha hi lezaku, laha nzi nga hi ni 10 wa malembe i lofa. Nzi lo tshoveka mbilu, hi ku alakanya lezaku a munhu loyi a nga nzi ranza nguvu ku hunza vontlhe laha misaveni i file.

Laha nzi nga hi ni 11 wa malembe, nzi lo tlhela doropeni ga le kaya nzi ya sangula ku tshama ni nhonzo ya mina ya xinuna yo pswaliwa nayo papai munwe, zinwe ni ngango wa yona. Va lo khatalela zilaveko za mina za nyama, kanilezi i hava a nga khatalela zilaveko za kutizwa ka mina. Ka zikhati zo kari, nzi wa rilela Nungungulu nziku: “Hikuyini mamani a fileko? Hikuyini nzi nga maha xikhumu?” A vanhu va wa nzi byela lezaku a makhombo lawo kuranza ka Nungungulu. Nzi lo chikelela magumo ya lezaku Nungungulu a nga na mhaka ni munhu niku i na ni xihlawulela. Lexi xi nga maha lezaku nzi nga ti sungi, hi ku nzi wa nga hi na xo tisunga hi xona.

Kota xikhumu, zi wa nga karati a ku nzi xanisiwa hi tlhelo ga nyama ni kutizwa. Na nza ha hi jaha, nzi lo pfinyiwa makhati yo tala nzi tlhela nzi xakelwa. A nzi tshukangi nzi kecara a wugevenga lego — nzi wa alakanya lezaku i hava a nga wa ta zi khatalela. Zi wa kala a ku a vanhu va bhula na mina, niku nzi wa nga bhuli ni munhu. Nzi wa tshama nzoce na nzi karatekile, niku nzi wa nga tsumbi munhu.

LEZI A BIBLIA GI NGA CICISA ZONA A WUTOMI GA MINA:

Laha nzi ga hi ni 13 wa malembe, a Timboni timbiri ta Jehova (nuna ni sati) ti lo nzi tshinelela hi xikhati xa kuhumula le xikoleni. A munwe wa vagonzisi va mina, loyi a nga nzi zwela wusiwana hi kota ya xiyimo xa mina, i lo va kombela lezaku va nzi enzela. Va lo nzi bhulela xitsumbiso xa Biblia xa lezaku a vafileko va ta vuka niku ka siku go kari a zikhumu zi ta tlhela zi wona. (Isaya 35:5; Johani 5:28, 29) Zi wa nzi tsakisa nguvu lezi va nga nzi gonzisa, kanilezi zi wa nzi karatela ku bhula navo, kota lezi nzi nga kala nzi nga tolovelangi ku bhula. Hambulezo, na ku nga khataliseki lezi nzi nga hi munhu wo miyela nguvu, va lova ni wunene ni lihlaza-mbilu va simama va nzi enzela kasi va ta nzi gonzisa a Biblia. A patswa lowo wu wa famba pfhuka wo hunza 10 wa tikilometro, niku kasi vaza va chikela doropeni ga hina zi wa lava lezaku va kwela zitsunga.

A makabye wa mina wa ku pswaliwa naye papai munwe, i lo nzi tlhamusela lezaku a vanhu lavo va ambala khwatsi kanilezi a va ganyangi. Hambulezo, xontlhe xikhati va wa kombisa kukhatala hi mina, va nzi tela ni zinyikiwo zo kari. Nzi lo zi wona lezaku ntsena a maKristu ya lisine hi wona ma nga kombisako kutikarata loko ka le mbilwini.

Nzi lo gonza Biblia na nzi vuniwa hi mabhuku ya xiBraile. Hambu lezi nzi nga zi zwisisa lezi nzi nga kari nzi gonza, hi tlhelo ga kutizwa a zokari zi wa nzi karateka ku zi vumela. Hi xikombiso, zi lo nzi karatela ku kholwa lezaku hakunene Nungungulu wa nzi khatalela kota munhu, niku a vanwani va nga nzi khatalela a ku fana na Nungungulu ke. Nzi lo zwisisa lezaku hikuyini Nungungulu a vumelelako kubiha hi xikhatanyana, kanilezi zi nzi nonohele nguvu a ku mu wona kota Dadani wa liranzo futsi.a

Hi kutsongwani-kutsongwani, lezi nzi gonzileko lomu ka Mitsalo zi nzi vunile ku cica mawonela ya mina. Hi xikombiso, nzi lo gonza lezaku Nungungulu wa va zwela nguvu wusiwana lava va xanisekako. Xungetano hi vakhozeli vakwe lava va nga kari va xanisiwa, Nungungulu i te ngalo: “Nzi wonile kuxaniseka ka vanhu va mina . . . nza tiva a hlomulo wabye.” (Eksodusi 3:7) Laha nzi nga tiva a matshamela ya ma nene ya Jehova, nzi lo kuceka ku hendleleta wutomi ga mina ka yena. Hi 1998, nzi lo bapatizwa kota Mboni ya Jehova.

Anzhako ka lembe na nzi bapatizilwe, nzi lo gonzela ntiro wa zikhumu ka xikola xi nga hi kusuhani ni doropa ga Escuintla. A dota go kari ga bandla gi lo pola zikarato nzi nga yimisana nazo, za kuya mitlhanganweni na nzi hanya doropeni ga hina. Wona lezi: A bandla ga laha kusuhani gi wa hi ka xitsunga xalexi xi nga kweliwa hi patswa wa Timboni leti ti nga kari ti nzi gonzisa a Biblia, niku zi wa nzi karatela ku teka pfhumba lego. Kasi ku nzi vuna, a dota lego gi lo kuma ngango wa Timboni le Escuintla, lowu hi kuziranza wu nga vumela ku tshama na mina kaya kabye, va tlhela va nzi vuna kuya mitlhanganweni. Kala nyamutlha, va nzi khatalelisa ku khwatsi nzi xiro xa ngango wabye.

Nzi nga hlawutela zikombiso zo tala za liranzo la lisine nzi kombiselwako hi ziro za bandla ga hina. A zilo lezo zontlhe loku nzi zi patsa, zi nzi tiyisekisa lezaku kota Mboni ya Jehova, nzi xikari ka maKristu ya lisine. — Johani 13:34, 35.

LEZI NZI NGA VUNEKISA ZONA:

A nza ha ti woni na nzi nga vuni nchumu kutani kuva nzi nga hi na kutsumba. Zezi nzi hanyela xo xi tiva. Kota lezi nzi nga mutiri wa xikhati xontlhe wa ntiro wa Timboni ta Jehova wa ku gonzisa a Biblia, nzi veka kupima ka mina kugonziseni ka lisine lo saseka la Biblia nzi siya nzhako a wukhumu ga mina. Nzi na ni lungelo kambe ga ku tira kota dota ga bandla ni ku veka tikanelo ta laha kubaseni ti seketelweko lomu ka Biblia. Niku nza tshuka nziva ni lungelo ga ku veka tikanelo ti seketelwako lomu ka Biblia ka migotsovanyano ya muganga leyi ku vako ni vanhu vo tala nguvu.

Hi 2010, nzi lo pasa Xikola xa Gonziselelo ya Wutireli (zalezi xi vitaniwako ku Xikola xa Vavangeli va Mufumo) xi mahilweko le El Salvador. A xikola lexi xi nzi vunile ku tatisa khwatsi a wutihlamuleli ga mina laha bandleni. A gonziselelo leyo yi nzi mahile nzi tizwa na nzi hi wa lisima ni kuva nzi ranziwa hi Jehova Nungungulu, loyi a nga hlawulako ni wihi ntirweni wakwe.

Jesu i te ngalo: “Ku katekile ku nyika ku hunza ku nyikiwa.” (Mitiro 20:35) Inyamutlha, nzi nga wula na nzi tiyile lezaku nzi xalele, hambu lezi kusanguleni nzi nga alakanya lezaku a zi nge koteki, zezi nzi ti wona na nzi ringanelwa hi ku vuna vanwani.