MIHLAMULO YA BIBLIA
Xana a vafileko va ta tlhela va hanya?
Handle ko kanakana, a Muvangi wa munhu a nga zi kota ku tlhela a mu vuxa hi ka vafileko
Jehova Nungungulu hi yena xibuka xa wutomi. (Tisimu 36:9) Makunu loku zi hi tano, a zi zwisiseki lezaku a Nungungulu loye a nga wuyisa wutomi ga lava va fileko? A Biblia gi wula lezaku hi zalezo futsi a to maha xikhatini xi tako. (Gonza Mitiro 24:15) Kanilezi hikuyini a to maha lezo?
Kusanguleni a Muvangi wa hina i wa lavile lezaku a munhu a hanya kala kupinzuka. (Genesisi 1:31; 2:15-17) Za hi zalezo a zi lavako lezaku zi maheka. Nungungulu wa karateka nguvu hi ku wona lezi hi yimisanako nazo zezi — ku nga wutomi go koma gi teleko hi zikarato. — Gonza Joba 14:1, 14, 15.
Va ta hanya kwihi lava va to vuxiwa hi ka vafileko?
Xana Nungungulu i mahile munhu kasi a ya hanya tilweni? Ahihi. Nungungulu i mahile tingelosi lezaku ti hanya le tilweni. A maha vanhu kasi va hanya laha misaveni. (Genesisi 1:28; Joba 38:4, 7) Na u nga rivali lezo, ehleketa hi vanhu lava Jesu a va vuxileko hi ka vafileko. I vuxile vanhu lavo va tlhela va hanya kwalaha misaveni. Hi ndlela yo fana, a kutala ka lava va to vuxiwa hi ka vafileko xikhatini xi tako va ta tlhela va hanya kwalaha misaveni. — Gonza Johani 5:28, 29; 11:44.
Hambulezo, Nungungulu i hlawulile vanhu vatsongwani va to vuxiwa va ya hanya le tilweni, kota zivangwa za moya. (Luka 12:32; 1 Va Le Korinte 15:49, 50) Lava va to vuxiwa va ya hanya tilweni va ta fumela misava kota tihosi na va hi na Kristu. — Gonza Kuvululelwa 5:9, 10.