Lanzela A Xikombiso Xi Nyikilweko Hi Jesu
1. Xikombiso muni lexi Jesu a xi nyikileko?
1 A xikhati lexi hi hlengelako ntirweni wa ku maha vapizani, hi fanele ku alakanya lezaku a xikombiso xa hina xa zi kota kuva ni kucetelo wa ntamu ka lava va hi wonako. Jesu i gonzisile hi magezu ni zimaho. Lava va nga mu lanzela va wa zi kota ku wona a kuchivirika kakwe, liranzo lakwe ka vanhu, ku xuva kakwe ka hombe hi kubasisa a vito ga Dadani wakwe, ni kutiyimisela kakwe a ku tatisa kuranza ka Dadani wakwe. — 1 Ped. 2:21.
2. Xana a xikombiso xa hina xi zi kotisa kuyini a ku kuca lava va tirako na hina wutirelini?
2 Loku Hi Hi Wutirelini Ga Muti-Ni-Muti: Kota lezi zi nga maheka ka Jesu, a xikombiso xa hina xa va kuca lava va tirako zinwe na hina. A vahuweleli va vaswa lava va nga buvangiko lava va wonako a kuhiseka ka hina wutirelini va ta alakanyela lezi vona va hlengelisako zona ntirweni wa kuchumayela. A xikhati lexi va wonako a litsako la hina ni kukhatala ka hina hi vanwani, va ta alakanya hi lisima la ku kombisa a matshamela lawo wutirelini ga vona. Loku va wona a kupinyama ka hina kutiriseni ka Mitsalo, kumaheni ka maenzo yo wuyela, ni ku fambiseni ka zigonzo za Biblia, vonawo va ta kuceka a ku maha zo fana.
3. Xana a xikombiso xa hina xi nga zi gonzisisa kuyini a zigonzani za Biblia?
3 Kufambiseni Ka Zigonzo Za Biblia: A Zigonzani za hina za Biblia hi zona nguvunguvu zi to wona a mahanyela ya hina. Hi xikombiso, hambu loku ho zi tlhamusela a ku za lisima a ku ti lulamisela mahlweni ka xigonzo, ku kambela a mitsalo, ni ku funga hi lahasi ka mihlamulo, zona zi ta wona loku hina hi ti lulamisele kutani ahihi. (Rom. 2:21) Loku hi chikela hi xikhati lexi hi zwananileko ku sangula xigonzo nazo, zona zi nga ta byekelela nguvu ka ku tsika mitiro yinwani yi nghenelela ka xigonzo xabye xa Biblia. Handle ko kanakana zona kambe zi ta wona a kutikarata ka hina ka kuziranza wutirelini ni kukholwa ka hina ko tiya. A zi hlamalisi lezi a zigonzani za lava va xi lanzelako khwatsi a xikombiso xa Jesu zi andako a ku maha vaxumayeli vo hiseka ni va pswalako mihanzu.
4. A xikhati lexi hi kumekako mitlhanganwini ya bandla, zini lezi a xikombiso xa hina xi zi gonzisako?
4 A Xikhati Lexi Hi Nga Mitlhanganwini Ya Bandla: Vontlhe lava va nga lomu bandleni ga wuKristu va na ni xipanze ka kugonzisa hi xikombiso xabye lomu mitlhanganwini ya bandla. Lava va tsakelako, lava va ha sangulako kuva kona mitlhanganwini va vuneka hi xikombiso xi nene lexi va xi wonako lomu bandleni. Vona va ta wona a wumakabye ga wuKristu go kufumela, wumunwe ga wuKristu, ku ambala ni kutisasekisa khwatsi. (Tis. 133:1) A xikombiso xa hina ni kuvakona ka hina xontlhe xikhati mitlhanganwini ya bandla ni kuwula ka laha kubaseni ka kukholwa ka hina na zonawu zi ta woniwa. A wo kari loyi a enzeleko a wunwe wa mitlhangano ya hina i wonile a ndlela leyi a xinhanyatana xo kari xi nga zi kotisa zona a ku hatla xi kuma mavesi lawa ma kumbukilweko, lomu ka Biblia ga xona wutsumbu ni ndlela leyi xi nga lanzela khwatsi ha yona a kugonza. A xikombiso xa xinhanyatana lexo xi mu kucile lezaku a kombela xigonzo xa Biblia.
5. Hikuyini hi nga faneliko ku yi tekela hasi a lisima la xikombiso xa hina?
5 A Mitsalo yi hi kuca lezaku hi pimanyisa a xikombiso xi nene xa munwe ni munwani. (Fil. 3:17; Maheb. 13:7) Hikwalaho, hi fanele hi alakanya lezaku loku hi xi lanzela khwatsi a xikombiso xi nyikilweko hi Jesu, zi ta woniwa hi vanwani zi tlhela zi va kuca. Na hi pima lezo, ngha hi ingisa a magezu ma kumekako ka 1 Timote 4:16: “Ti wonele wutsumbu ga wena, ni kugonziseni ka wena.”