A Ngango Wa Wena Wa Ti Longisela A Ku Poniswa Ke?
1 A ziprofeto za Biblia lezi zi tatisekileko zi nyika wukustumunyu gi kholwisako ga lezaku a kugumesa ka tiko legi go biha ka tshinela hi kuhatlisa. Zalezi hi hanya zikhatini za zikarato zo fana khwatsi ni lezi za xikhati xa le mahlweni ka Ntalo. (Mat. 24:37-39) Noa i ponile a kulobyiswa ka tiko lego ga kale hakuva “i lo famba zinwe na Nungungulu.” (Gen. 6:9) Handle ko kanakana Noa i wa gonzisa a ngango wakwe a tindlela ta Jehova hakuva vonawu va lo poniswa. Xana hi nga mu pimanyisisa kuyini Noa hi tlhela hi ti longisela hi ngango lezaku hi poniswa a kugumesa ka mafambisela lawa yo biha ya zilo?
2 Mukaneli Wa Kululama: Noa i lo timisela hi xipimo xa 40 kuya ka 50 wa malembe na a hi “mukaneli wa kululama.” (2 Ped. 2:5) A vaakelani vakwe, kani va wa kucetelwa hi tingelosi ti hluwukileko leti ti nga ambele a mimiri ya nyama kutani ahihi, handle ko kanakana va wa mu tseketsela hi kota ya kuxumayela kakwe. Zikhati zinyingi loku hi hi wutirelini, hi yimisana ni kungakhatali kutani kutseketselwa, lezi zi tiyisako ku a mafambisela lawa ya zilo ma laha kusuhani ni ku gumesa. (2 Ped. 3:3, 4) Hambulezo, a ku hambana ni vanhu va le masikwini ya Noa, a vanhu vo tala inyamutlha va kari va hlamula ka mizamo ya hina va tlhela ‘vata’ wukhozelini ga Jehova. (Isa. 2:2) Hi ta hanyisa a ‘wutsumbu ga hina, ni lava va hi zwako kambe’ ntsena loku hi timisela. (1 Tim. 4:16) Hakunene za lisima nguvu lezaku a vapswali va gonzisa a vana vabye xungetano hi xihatla xa ntiro wo xumayela, hi magezu ni zimaho! — 2 Tim. 4:2.
3 I Lo Mahisa ‘Zalezo’: A kuponiswa ka Noa ni ngango wakwe ku lo khegela ka kuva va lanzela khwatsi a zileletelo za Jehova. (Gen. 6:22, Tradução do Novo Mundo) Za lisima kambe ka hina inyamutlha lezaku hi ti yimisela ku “ingisa” a wurangeli ga Biblia ni ga nanza gi tsumbekileko. (Jak. 3:17) A vana va kulileko va ngango wo kari va alakanya lezi a dadani wabye a nga zi tirisisa zona a zileletelo lezi zi nyikiwako hi hlengeletano ya Jehova. Hi xikombiso, yena i wa fambisa a xigonzo xa ngango viki ni viki a tlhela a famba ni ngango wakwe wutirelini kumbheleni ka viki ginwe ni ginwani kota lezi hi kuciswako zona. I wa maha mizamo ya lezaku a viki ginwe ni ginwani a tira ni n’wana munwe wutirelini, kala a tlhanganyisa a vana vakwe vontlhe. A kutserama kakwe a mahisa ‘zalezo’ ku khumbile nguvu a vana vakwe, niku vontlhe va ntlhanu ni munwe va kulile vava malanza yo tsumbeka ya Jehova.
4 A kugumesa ka mafambisela lawa ku tata hi xitshuketi. (Luka 12:40) Loku hi pimanyisa Noa hi tlhela hiva ni kukholwa loku ku ta nga maha lezaku hi poniswa, handle ko kanakana hina ni ngango wa hina hi tava hi ti longisele! — Maheb. 11:7.