Kutilongisela — Nchumu Wa Lisima Maenzweni Yo Wuyela
1. Xana a wutireli ga wuKristu gi wa fanele ku hangalaswa kala kwihi?
1 Jesu i va longisele khwatsi a vapizani vakwe lezaku vava vaxumayeli vo humelela va “ivangeli ya mufumo.” (Mat. 4:23; 9:35) Yena i lo va gonzisa na a xumayela le Palestina ntsena. Hambulezo, na a nga se tlakukela tilweni, Jesu i lo tivisa lezaku a wutireli ga wuKristu gi wa ta hangalaswa hi kuanzileko kasi ku “maha vapizani a matiko wontlhe.” — Mat. 28:19, 20.
2. Xana a kuingisa a xilayelo xa Jesu xa ku “maha vapizani” zi patsa yini?
2 A ntiro lowo wu wa ta patsa ku tlhelela a vanhu lava va kombisileko kutsakela a mahungu ya Mufumo wa Nungungulu ni ku va gonzisa a ku hlayisa zilo zontlhe lezi Kristu a layileko zona. Kasi ku maha a maenzo lawo yo wuyela, hi fanele ku ti longisela khwatsi.
3. Xana u nga yi vululisa kuyini a ndlela yo maha a lienzo lo wuyela?
3 Ti Longisele Hi Mahlweni: A vahuweleli vo kari va ti karatela ku maha xiwutiso magumo ka lienzo lo sangula va tlhela va tsumbisa ku wuya va ta nyika a hlamulo wa kona. Va wonile lezaku a ku wulawula hi timhaka ti kumekako ka bhuku A Biblia Gi Gonzisako ka lienzo lo wuyela, zi va vuna a ku tekela ku sangula a xigonzo xa Biblia.
4. Hikuyini hi nga faneliko ku rinzela a marevista ya maswa lezaku hi maha a lienzo lo wuyela?
4 Loku hi mbheta a ntsengo wa marevista lawa hi ma amukelako hweti ni hweti a zi wuli lezaku hi fanele ku rinzela kala hi amukela a marevista ya maswa na hi nga se maha maenzo yo wuyela. Zi nga ha koteka a ku engetela a kutsakela ka munhu loye hi ku bhulisana naye hi timhaka ti kumekako ka marevista lawa a sinako a hi nawo.
5. Hi gihi a bhinzu ga kuva ni kungo a xikhati lexi hi mahako a maenzo yo wuyela?
5 Ngha Uva Ni Kungo: Na u nga se tlhelela a munhu wo kari, ti nyike xikhati xa ku vuxeta lezi u nga tsala lomu ka kaderno wa wena kasi u kota ku tiva lexi u xi yelako ka munhu loye. Hi xikombiso, wulawula hi timhaka ti nga ka bhuku legi u gi siyileko ka lienzo li hunzileko kutani ku siya a mabhuku manwani ma wulawulako hi timhaka ti yelanako ni lezi mu nga bhula hi zona lienzweni li hunzileko. Loku ku hi lezaku u mahile xiwutiso ka lienzo lo sangula, handle ko kanakana a kungo ga wena gi ta patsa ku hlamula a xiwutiso lexo. A xikhati lexi u kombako a mutsalo lowu wu vunako ku hlamula a xiwutiso lexo, ti karatele ku gonza lomu ka Biblia hi kukongoma.
6. Hi gihi a kungo ga hina a xikhati lexi hi mahako a maenzo yo wuyela?
6 Kungo Ga Hina: Hi lisine, a kungo ga hina ku sangula a xigonzo xa Biblia. A makabye wo kari wa xinuna i ringetile ku sangula a xigonzo xa Biblia ka lienzo lo wuyela, kanilezi a wanuna loye a nga vumelangi. Makabye i lo tlhela na a hi ni marevista ya maswa, zonake aku, “Hi famba hi komba a vanhu a hlamulo wa Biblia ka xiwutiso xa lisima lexi a vanhu va ti mahako inyamutlha.” Anzhako ka kuzwa a mitlhamuselo ya wanuna loye, makabye i lo gonza a mutsalo zinwe ni nzimana yi zwananako nawo lomu ka bhuku legi gi tiriswako kufambiseni ka zigonzo za Biblia. Lezo zi mahile lezaku ku sangulwa a xigonzo xa Biblia xo khanzakanya.
7. Xana a kuva u ti longisele khwatsi zi ku vunisile kuyini lezaku u sangula a xigonzo xa Biblia?
7 Ngha hi ti nyika xikhati xa ku ti longisela lezaku hi maha a maenzo yo wuyela. Loku hi maha lezo, a litsako la hina li ta engetela niku hi nga hava ni lungelo ga ku vuna loyi a ti yimiseleko ndleleni yi yisako wutomini. — Miti. 13:48.