Hi Na Ni Titshomba Ta Lisima Ta Ku Avela Vanwani
1 A Mhaka ya Nungungulu yi tele hi titshomba ta moya leti hi ti nyikako lisima. (Tis. 12:6; 119:11, 14) Ka xikhati xo kari, Jesu i lo tirisa mifananiso na a komba a matshamela yo hambanahambana ya Mufumo, hi nzhako a wutisa vapizani vakwe aku: “Mu ti pimile a timhaka tontlhe leti ke?” Laha va nga hlamula vaku ina, yena i te ngalo: “Makunu kani hi wihi mutsali [“mugonzisi,” Tradução do Novo Mundo] loyi a gonzisilweko hi za mufumo wa tilo i fanana ni munhu loyi a nga nwinyi wa yindlu, loyi a humesako mabakweni yakwe a zilo ziswa ni zilo za kale.” — Mat. 13:1-52.
2 A zinene za Biblia lezi hi zi tivileko a xikhati hi nga sangula ku gonza zi nga woniwa kota titshomba ta kale. Hi kuengetela ka hina a wutivi hi xigonzo xa hina wutsumbu xa zilo zi etileko za Mhaka ya Nungungulu, hi tiva a zinene zinwani za Biblia, lezi a ka hina zi nga titshomba tiswa. (1 Kor. 2:7) Ku nga hi lezo ntsena, hi ku vuniwa hi “nanza gi tsumbekileko ni go tlhariha,” hi zile hi kuma a titshomba tiswa. — Mat. 24:45.
3 Ha nyika nguvu lisima a titshomba leti, a ta kale ni ta tiswa. Lezo zi hi kuca a kuva hi hlota ku gonzisiwa ni ku kuma wutlhari kota vagonzisi va Mhaka ya Nungungulu, na hi avela vanwani a zinene za lisima lezi hi zi gonzileko.
4 Gonza Hi Ka Xikombiso Xa Jesu: Na a kombisa lezi a nga ti zwisa zona xungetano hi titshomba leti, Jesu i lo ti karata nguvu kasi ku avela vanwani a titshomba leto. Hambu ka xikhati lexi a nga karele, a nga tsikangi a ku humesa a titshomba leto “magombeni” yakwe. — Joh. 4:6-14.
5 A liranzo la Jesu hi lava va nga hi zisiwana hi tlhelo ga moya li mu kucile a ku va avela a titshomba ta zinene za Nungungulu leti ti nyikako wutomi. (Tis. 72:13) I wa va zwela wusiwana lava va nga hi ni ndlala ya zilo za moya zonake a kuceka ku va “gonzisa timhaka to tala.” — Mar. 6:34.
6 Pimanyisa Jesu: Loku hi nyika nguvu lisima a titshomba leti hi nga nato, a ku fana na Jesu, hi ta xuva nguvu a ku komba vanhu a zinene lezo lomu ka Biblia hi kukongoma. (Mav. 2:1-5) Hambu lezi a zikhati zo kari hi nga ha karalako, hi ta wulawula hi zinene za Mitsalo hi kuhiseka ka mbilu. (Mar. 6:34) A kutsakela ka hina ka hombe a titshomba leti hi nga nato ku ta hi kuca a ku ti karata nguvu wutirelini, na hi zama ku hlengela ka gona hi kumbhelela a xikhati xontlhe.