‘Tshamani Liranzweni La Nungungulu’
1. Xana a bhuku ‘Tshamani Liranzweni La Nungungulu’ gi humeselwe yini?
1 Hi xuva nguvu a ku gonza a bhuku giswa ‘Tshamani Liranzweni La Nungungulu’ ka Xigonzo xa Biblia xa Bandla kusukela ka viki ga 23 ka Fevereiro. A papilo ga Hubye yi Fumako gi tsalelweko a muranzi munwe ni munwani wa Jehova gi gumesa hi magezu lawa: “Hi xuva hi mbilu yontlhe lezaku a bhuku legi gi ku vuna a ku simama u hanya hi zinene wutomini ga wena niku hi ku maha lezo u tshama ‘liranzweni la Nungungulu, na u cuwukela kuhanya ka pinzukelwa.’ — Juda 21.”
2. Xana a bhuku legi ga giswa gi ta hi vuna ka matlhelo wahi ya wutomi?
2 Lezi Hi Faneleko Ku Zi Rinzela: Xana a matshinya ya milayo ya Biblia ma tirisiswa kuyini zilweni zo kota vanghana, zihungato, ku chava wuhosi, matshamela, wukati, kuwulawula, ni mikhuwo? A tivalo ta hina ti ta tolovetwa hi kuyelana ni milayo yo tlakuka ya kululama leyi yi kombiswako Mhakeni ya Nungungulu. (Tis. 19:7, 8) A xikhati lexi a kuzwisisa ka hina a maalakanyo ya Jehova ku yako ku engetela, a kuingisa ka hina matlhelweni wontlhe ya wutomi ku ta kuciwa hi kuxuva ka hina a ku mu xalalisa. — Mav. 27:11; 1 Joh. 5:3.
3. Hikuyini hi faneleko a ku ti karatela ku nyika mihlamulo xigonzweni viki ni viki?
3 Ti Yimisele Ku Nyika Mihlamulo: A xikhati lexi u longiselako a xigonzo, ngha a kungo ga wena giva ku dumisa Nungungulu xikari ka hlengeletano wa vanhu vakwe. (Maheb. 13:15) A bandla gontlhe gi ta khoma a xigonzo xa bhuku legi ga giswa na gi hi zinwe. Kota lezi a xipanze lexi xi to kambisiswa xi tova xi tsongwani, lezo zi ta hi vuna a ku longisela khwatsi kasi hi tiya a ku tlhamusela lezi hi zi gonzileko. A mihlamulo ya hina yi longiselweko khwatsi na yi hi yo kongoma yi ta kuca vanwani lezaku vava ni liranzo zinwe ni mitiro yo saseka yi tlhela yi maha a xigonzo xi hanya ni ku nyawula. (Maheb. 10:24) Ahandle ka lezo, a kutsaka ka hina ku ta tatiswa a xikhati lexi hina hi munwe munwe hi kombisako a kukholwa ka hina hi magezu.
4. Hikuyini zi nga xilaveko a kuva hi hlayisa a milayo ya Jehova?
4 Ka wusiku gakwe go gumesa laha misaveni kota munhu wa nyama, Jesu i zwananisile a ku hlayisa a milayo ya Jehova ni ku tshama liranzweni la Nungungulu. (Joh. 15:10) Hi ku vuniwa hi bhuku ‘Liranzo La Nungungulu,’ hi ta ti yimisela nguvu a ku tirisa matshinya ya milayo ya Biblia wutomini ga siku ni siku hi tlhela hi ‘tshama liranzweni la Nungungulu.’ — Juda 21.