Ma Tirise Khwatsi A Mabhuku Ya Hina
1. Hi nga xi pimanyisisa kuyini a xikombiso xa Jesu xa ku khatala hi malulamiselo ya Jehova?
1 Anzhako ka loku Jesu hi xihlamaliso a gisile a xidlemo xa hombe, i lo laya lezaku ku rolelwa a matlhatlha ma nga sele. (Mat. 14:19-21) A kukhatala loko hi malulamiselo ya Jehova ka hi nyika xikombiso xi nene xa lezaku ‘hiva ni kubonga’ hi ku tirisa khwatsi zontlhe lezi Jehova a hi nyikako hi ku tirisa “a nekwa yi kholekileko.” — Kol. 3:15; Luka 12:42; Mat. 24:4547.
2. Hi nga potsisa kuyini a ku hlengeletela a marevista?
2 Marevista: A marevista ma nga hlengeletana hi kuolova. Loku ku hi lezaku ha khanzakanya a ku salelwa hi marevista, hi fanele ku hungula a ntsengo lowu hi kombelako. Ahati a marevista ya kale? A ma hunzelwi. Loku hi hi ni marevista manyingi ya kale, kuzilava a muwoneleli wa ntiro kutani dota ginwani gi nga hi vuna a ku kuma ndlela yi nene ya ku ma nyikela.
3, 4. Zini hi faneleko a ku tshama na hi zi alakanya a xikhati lexi hi tekako mabhuku Salawini ya Mufumo?
3 Manwani Mabhuku: Loku ku ciciwa a bhuku legi gi nyikelwako sinwini, ranga hi ku cuwuka a mabhuku lawa u nga nawo kaya lezaku xana a wu na ya ku nyikela sinwini ke na u nga se teka manwani le Salawu ya Mufumo. Ti wonele lezaku u teka a mabhuku lawa ma lavekako ka viki lego ntsena, u ta guma u tlhela balkawu ya mabhuku loku u lava manwani.
4 Xungetano hi mabhuku ya ku ma tirisa wena wutsumbu, kombela ntsena lawa hakunene u ma lavako. Tsala a vito ga wena ka wutshamu legi gi mahelweko lezo. Lezo zi ta ku vuna a ku hlayisa a bhuku ga wena. Loku u tirisa a Watchtower Library ka CD-ROM ni ku ngha u hlayisile a marevista ya wena, kuzilava u nga tava ni xilaveko xa ku kombela a tivolume ta A Sentinela ni Despertai!
5. Xini hi faneleko ku tshama na hi xi alakanya a xikhati lexi hi nyikelako a mabhuku ya hina?
5 Manyikelela Ya Mabhuku: Hi ti karatela ku nyikela mabhuku ya hina ntsena ka lava va kombisako a kutsakela ka lisine. Hi tshama na hi alakanya lezaku hi hina hi nga ni wutihlamuleli go ranga ga ku maha minyikelo ya ku hakhelela a zitiro lezi za lisima wutirelini ga hina. A xikhati lexi u siyelako mabhuku lava va kombisileko kutsakela, u nga kanakani a ku va byela lezaku va na ni lungelo ga ku seketela a ntiro wa misava yontlhe hi minyikelo yabye.
6. Hikuyini hi nyikako nguvu lisima a mabhuku ya hina, niku xana lezo zi ta hi kuca a ku maha yini hi wona?
6 Jesu i lo gisa vanhu hi xihlamaliso, kanilezi a kutala ka zikhati i lo va gisa hi tlhelo ga moya. Yena i te ngalo: “A munhu a nga ta hanya hi xibaba xoce, kanilezi hi timhaka tontlhelele leti ti humako nonwini wa Nungungulu.” (Mat. 4:4) A mabhuku ya hina ma gonzisa a zinene za Biblia zi nga za lisima kasi ku kuma wutomi ga pinzukelwa. (Joh. 17:3) A ma faneli ku xakelwa ne ni kutsongwani hi kota ya lisima la wona!