Xana U Nga Engetela A Wutireli Ga Wena?
1. Xihatla muni xi nga kona wutirelini ga simu, niku hikuyini?
1 Hi ku wona a kutsakela loku a zidlemo zi nga ku kombisa ka mahungu yo saseka ya Mufumo, Jesu i lo leletela a vapizani vakwe a ku ‘kombela a Hosi ya kutshovela, lezaku yi rumela a zitiri kutshoveleni ka yona.’ (Mat. 9:37, 38) Kota lezi hi nga ka tihora to gumesa ta nguva ya kutshovela, a ntiro wa hina wu fanele ku mahiwa hi xihatla nguvu a ku hunza zikhati zontlhe. Lezi zi wula ku hi fanele ku kambisisa hi mukhongelo lezi hi nga zi kotisako zona a ku engetela a wutireli ga simu. — Joh. 14:13, 14.
2. Xana a vo kari va xi hlamulisa kuyini a xilaveko xa vatiri vo engeteleka lomu sinwini?
2 Ntiro Wo Engeteleka: Hi ku rangelwa ni ku vuniwa hi Jehova, a vo tala va zi wona na zi koteka a ku sangula ntiro wa wuphayona. (Tis. 26:2, 3; Fil. 4:6) A vo kari va mahile a mizamo yo hlawuleka lezaku va tira kota maphayona yo vunetela hi hweti yinwe kutani kuhunza nzeni ka lembe. Leyo yive ndlela ya yi nene nguvu ya ku engetela a wutireli ga vona. A litsako leli va li kumileko hi ku tira kota maphayona yo vunetela li mahile a vo tala va alakanyela kuva maphayona ya xikhati xontlhe. — Miti. 20:35.
3. Loku ku hi lezaku u tirile kota phayona xikhatini xi hunzileko, zini lezi u faneleko ku zi kambisisa makunu?
3 U Nga Tlhela U Nghenela A Ntiro Wa Wuphayona?: Loku ku hi lezaku u tirile kota phayona ka xikhati xi hunzileko, handle ko kanakana wa alakanya a litsako leli u nga hi nalo xikhatini lexo. Xana wa tshuka u maha mukhongelo na u alakanyela hi ku tlhelela ntirweni wa wuphayona? Kuzilava lexi xi ku mahileko u nyima a ku tira kota phayona xi hunzile. Za koteka ku ngha xi chikele a xikhati xa lezaku u ti buza hi lungelo legi go hlawuleka. — 1 Joh. 5:14, 15.
4. I lungelo muni go hlawuleka legi hontlheni hi zi kotako kuva nago?
4 A ntiro wa kutshovela wu kari wuya mahlweni hi kuhatlisa niku lokuloku wu ta gumesa. (Joh. 4:35, 36) Ngha hina hontlhe hi kambisisa a xiyimo hi nga ka xona zalezi kasi ku wona a ku xana hi nga hehukisa a mitiro ya hina ya siku ni siku kasi hi kota a ku engetela a wutireli ga hina. Loku ku hi lezaku hakunene a hi zi koti a ku engetela a wutireli ga hina, xana hi nga lavetela tindlela ta ku chukwatisa a wuzikoti ga hina ga kuxumayela? (Mar. 12:41-44) A hi kusaseka ka lungelo va nga nago zalezi lava a xiyimo xabye xi va vumelelako a ku tiriswa hi Jehova ntirweni lowu wo hlawuleka! — Tis. 110:3.