Dumisa Jehova Siku Ni Siku
1. Xini lexi a malanza ya Nungungulu ma kucekako a ku maha, niku hikuyini?
1 Hosi Davida i lo wula a kutiyimisela kakwe ka ku dumisa Jehova “wontlhe masiku,” kala kupinzuka. (Tis. 145:2, 7, 21) Hinawu hi na ni zigelo zo zwala za ku dumisa Jehova siku ni siku. — Tis. 37:10; 145:14, 18; 2 Ped. 3:13.
2. Xana a mingango yi nga mu dumisisa kuyini Jehova siku ni siku?
2 Laha Kaya Ka Hina: Hi na ni mabhuku ma akako kasi hiva ni mabhulo yo nyawula ya moya a xikhati lexi hi kambisisako a mutsalo wa siku, Wukhozeli ga Ngango, ni xikhati lexi hi longiselako a mitlhangano ya bandla. A mingango yo tala yi zi maha tolovelo wa yona a ku tlhangana yiga zinwe a zakuga khati ginwe hi siku hi wutsongwani ga kona. Lezo zi va vuna a kuva ni mabhulo ma nene, na va tlhatlhekile niku zi va nyika a xikhati xa ku dumisa Jehova. A mabhulo lawo ma sanguliwako hi vapswali ma ngava xivuno xi nene kuwundleni ka vana vabye hi “kululeka ni kulaya ka Hosi.” — Efe. 6:4; Deut. 6:5-7.
3. Malungelo muni hi nga nawo a xikhati lexi hi nga ni vamakabye va hina?
3 Ni Vamakabye Va Hina: A xikhati lexi hi nga ntirweni wa simu kutani mitlhanganweni ya bandla, hi na ni malungelo ya ma nene nguvu ya ku dumisa Jehova zinwe ni makholwa-kulori. (Mav. 15:30; Fil. 4:8; Maheb. 13:15) Kota lezi hontlheni hi ranzako Jehova, zi wa fanela ku hi olovela a ku patsa a magezu ya ku bonga a wunene ga Jehova a xikhati lexi hi bhulako. — Tis. 106:1.
4. Hi ka ziyimo muni u nga dumisako Jehova?
4 A Xikhati Lexi Hi Bhulako Ni Vangakholwiko: Hambu lezi kuzilava a ziyimo zi nga hi vumeleliko a ku hlengela wutirelini ga laha kubaseni siku ni siku, a ku bhula hambu kova xikhati xi tsongwani ni vatiri-kulori, zigonzani-kulori, ni vanwani lava va nga kusuhani na hina xungetano hi Jehova ni makungo yakwe zi nga nyika kutsumba ka vanhu va timbilu ti nene. (Tis. 27:14; 1 Ped. 3:15) A makabye wo kari wa xisati i zi kotile a ku nyika wukustumunyu ka wasati wo kari a nga enza naye hi xihaha-pfhuka, loyi a ti zwileko na a chavelelwe ni ku tiyisiwa hi lezi a zi zwileko laha ka kuza a nyika a makabye loye a makhero yakwe ni nombora ya telefone kasi va simama ku bhulisana. Laha a tiko gi xanisekako hi kuengeteleka ka zikarato ni kubiha ka ziyimo, a vanhu va Jehova va simama ku yisa a “mahungu yo saseka yo tsakisa” ka lava va nga ni tindleve ta ku ingisela. A mahungu lawo ma nyika vanwani a kutsumba ni ku va maha va dumisa Jehova. — Isa. 52:7; Rom. 15:11.
5. Hikuyini hi lavako a ku dumisa Jehova, niku zini hi nga zi kotako loku hi maha lezo?
5 A zo ku mu tsakisa Jehova a kuzwa a malanza yakwe na ma mu dumisa siku ni siku! A ku fana ni zivangwa zi wonekako za Jehova lezi zi hi ranzelako, hinawu ha zi kota a ku wulawula hi wudzunzo ga Jehova siku ni siku mitini ya hina, bandleni, ni loku hi wulawula ni vanwani lava va kalako va nga se sangula a ku dumisa Jehova. — Tis. 19:1-4.